មេធាវីរបស់អតីតមេបក្សប្រឆាំង ឈរឈ្មោះជាប្រធានគណៈមេធាវី ក្នុងអាណត្តិថ្មី

ជាតិ

មេធាវីរបស់អតីតមេបក្សប្រឆាំង ឈរឈ្មោះជាប្រធានគណៈមេធាវី ក្នុងអាណត្តិថ្មី

17, Sep 2018 , 10:47 am

រូបភាព

ពីឆ្វេងទៅស្តាំ៖ លោក សំ សុគង់ មេធាវីរបស់អតីតមេដឹកនាំគណបក្សប្រឆាំង និង លោក សួន វិសាល ប្រធានគណៈមេធាវី

ដោយ: ថ្មីៗ

លោក សំ សុគង់ មេធាវីល្បីឈ្មោះម្នាក់របស់អតីតគណបក្សសង្គ្រោះជាតិ បានឈរឈ្មោះជាបេក្ខជនប្រធានគណៈមេធាវី សម្រាប់ការបោះឆ្នោតអាណត្តិទី១២នេះ (២០១៨-២០២០)។ បេក្ខជនឈរឈ្មោះ មានតែ២នាក់ប៉ុណ្ណោះ ដោយម្នាក់ទៀត គឺលោក សួន វិសាល ដែលកំពុងកាន់តំណែងជាប្រធានគណៈមេធាវីបច្ចុប្បន្ន។

លោក សំ សុគង់ ត្រូវបានមនុស្សទូទៅស្គាល់ ដោយសារតែលោក តែងតែការពារក្តីឲ្យនយោបាយ និងមេដឹកនាំកំពូលៗរបស់អតីតគណបក្សប្រឆាំង ដូចជាលោក សម រង្ស៊ី និងលោក កឹម សុខា ជាដើម។ ស្ថិតក្នុងវ័យ៤១ឆ្នាំ លោក សំ សុគង់ បានប្រាប់សារព័ត៌មានថ្មីៗតាមទូរសព្ទថា លោក បានធ្វើជាមេធាវីអស់រយៈពេល១៥ឆ្នាំហើយ ហើយលោក ចាប់ផ្តើមការពារក្តីឲ្យសកម្មជន និងនយោបាយខាងគណបក្សប្រឆាំង ចាប់តាំងពីក្រោយការបោះឆ្នោតឆ្នាំ២០១៣មក។

លោក បន្តថា មេធាវីទូទាំងប្រទេស ដែលមានសិទ្ធិបោះឆ្នោតជ្រើសតាំងប្រធាគណៈមេធាវី មានប្រមាណជា១៥០០នាក់។ ការបោះឆ្នោតនេះ នឹងប្រព្រឹត្តទៅនៅថ្ងៃទី១៦ ខែតុលា ឆ្នាំ២០១៨។

អាណត្តិនៃប្រធានគណៈមេធាវី មានរយៈពេល២ឆ្នាំ ហើយមេធាវីម្នាក់ អាចមានឱកាសធ្វើជាប្រធានគណៈមេធាវី បានតែ២អាណត្តិប៉ុណ្ណោះ៕