Zlatan Ibrahimovic បានសម្រេចគ្រាប់ទី៥០០ក្នុងអាជីពរបស់ខ្លួនដោយប្រើក្បាច់ទាត់បាល់បញ្ចូលទីដ៏អស្ចារ្យ ដែលធ្វើបានក្នុងការប្រកួតដែល Los Angeles Galaxy ចាញ់ Toronto FC ក្នុងលទ្ធផល ៥-៣ នៃក្របខណ្ឌ Major League Soccer នៅថ្ងៃទី១៦ ខែកញ្ញា។ បើទោះមិនអាចជួយក្រុមឈ្នះក្តីប៉ុន្តែ Ibrahimovic នៅតែអាចឌឺដងគូប្រជែងខ្លួនថាជាក្រុមដែលរងគ្រោះព្រោះគ្រាប់បាល់ទី៥០០របស់គេ។
Ibrahimovic បានចូលរួមជាមួយ Lionel Messi និង Cristiano Ronaldo ក្នុងនាមជាកីឡាករដែលអាចស៊ុតបញ្ចូទីទាំងក្លិបនិងជម្រើសជាតិសរុបបានចាប់ពី៥០០គ្រាប់ បន្ទាប់ពីប្រើក្បាច់ការ៉ាត់តេទះបាល់បញ្ចូលទី។
អតីខ្សែប្រយុទ្ធ Manchester United និង PSG បានប្រាប់បណ្តាញព័ត៌មានកីឡា TSN បន្ទាប់ពីការប្រកួតថា៖ «ខ្ញុំរីករាយណាស់សម្រាប់ Toronto ព្រោះពួកគេនឹងត្រូវបានគេចងចាំថាជាក្រុមដែលត្រូវរងគ្រោះដោយគ្រាប់ទី ៥០០ របស់ខ្ញុំ»។
នេះក៏ជាគ្រាប់បាល់ទី ១៧ របស់ Ibrahimovic ដែរសម្រាប់ការបង្ហាញខ្លួន ១៨ លើកឲ្យ LA Galaxy ចាប់តាំងពីចាកចេញពី Man Utd កាលពីខែមីនា និងជាអ្នកស៊ុតបញ្ចូលទីច្រើនជាងគេទីពីរក្នុងក្របខណ្ឌ MLS រដូវកាលនេះផងដែរ។
អតីតខ្សែប្រយុទ្ធនិងប្រធានក្រុមជម្រើសជាតិស៊ុយអែត វ័យ ៣៦ឆ្នាំរូបនេះបានបង្ហាញខ្លួន ៧៤៧ប្រកួតសម្រាប់ក្រុម Malmo, Ajax, Juventus, Inter Milan, Barcelona, AC Milan, Paris St-Germain, Manchester United និង LA Galaxy ដោយរកគ្រាប់បាល់សរុប៤៣៨គ្រាប់។ ដោយឡែក៦២គ្រាប់ទៀតរូបគេធ្វើបានសម្រាប់ក្រុមជម្រើសជាតិជាមួយនឹងការបង្ហាញខ្លួន១១៤លើក។
Ronaldo ខ្សែប្រយុទ្ធចំណូលថ្មីរបស់ Juventus និងជម្រើជាតិព័រទុយហ្គាល់ រួមទាំង Messi ខ្សែប្រយុទ្ធឆ្នើម Barcelona និងអាហ្សង់ទីនជាកីឡាករដែលស៊ុបញ្ចូលទីសរុបលើសពី ៦០០គ្រាប់៕