មុននឹងសម្រេចថាប្តូរឈ្មោះឬអត់ បក្សទាំង២ រង់ចាំសេចក្តីប្រកាសផ្លូវការពីមហាផ្ទៃសិន

ជាតិ

នយោបាយជាតិ

មុននឹងសម្រេចថាប្តូរឈ្មោះឬអត់ បក្សទាំង២ រង់ចាំសេចក្តីប្រកាសផ្លូវការពីមហាផ្ទៃសិន

17, Sep 2018 , 10:39 pm

រូបភាព

ដោយ:

ភ្នំពេញ៖ ក្រោយពីសម្ដេច ស ខេង ស្នើឲ្យគណបក្សចំនួន២ ប្ដូរឈ្មោះ ដោយសារតែឈ្មោះនោះ ផ្ទុយនឹងរបបដឹកនាំប្រទេស ដែលកំណត់ដោយរដ្ឋធម្មនុញ គណបក្សទាំង២ ឆ្លើយតបថា រង់ចាំសេចក្ដីប្រកាសផ្លូវការជាមុនសិន។ ការស្នើរបស់សម្តេច ស ខេង គឺធ្វើឡើង ក្នុងពិធីជួបសំណេះសំណាលជាមួយសមាជិកគណបក្សប្រជាជនកម្ពុជា ក្នុងខេត្តព្រៃវែង កាលពីថ្ងៃទី១៦ ខែកញ្ញា។

គណបក្សទាំង២ គឺគណបក្សសាធារណរដ្ឋប្រជាធិបតេយ្យ ដែលដឹកនាំដោយលោកស្រី សុខរ័ត្ន សុវណ្ណ បច្ចៈសីលា និងគណបក្សខ្មែរសាធារណរដ្ឋ ដែលដឹកនាំដោយលោក លន់ រិទ្ធ ត្រូវបានសម្ដេច ស ខេង រដ្ឋមន្ត្រីក្រសួងមហាផ្ទៃ ប្រាប់ឲ្យប្ដូរឈ្មោះគណបក្ស។ រដ្ឋមន្ត្រីមហាផ្ទៃ បញ្ជាក់ថា ការតម្រូវឲ្យឈ្មោះគណបក្សទាំង២នេះ គឺដើម្បីឲ្យស្របទៅតាមរដ្ឋធម្មនុញដែលប្រកាន់យករបបប្រជាធិបតេយ្យ មិនមែនសាធារណរដ្ឋ។

ឆ្លើយតបនឹងការប្រកាសនេះ ប្រធានស្ដីទីគណបក្សសាធារណរដ្ឋប្រជាធិបតេយ្យ លោក ចាន់ យ៉េត បានឲ្យដឹងថា គណបក្សរបស់លោក នឹងតវ៉ា ឬបដិសេធលើការប្ដូរឈ្មោះគណបក្សឡើយ។ តែលោក លើកឡើងថា គណបក្សលោក អាចប្ដូរឈ្មោះបាន លុះត្រាតែមានសេចក្ដីប្រកាសផ្លូវការជាមុនសិន។

ប្រធានស្តីទីរូបនះ ប្រាប់សារព័ត៌មានថ្មីៗ យ៉ាងដូច្នេះថា៖«យើងមិនជំទាស់ទេ បើគេឲ្យប្ដូរឈ្មោះមែន។យើង នឹងបើកកិច្ចប្រជុំ ដើម្បីសម្រេច។ តែពេលនេះ យើងនៅមិនទាន់ទទួលបានសេចក្ដីប្រកាសផ្លូវការណាមួយនៅឡើយ។ ឲ្យតែធ្វើត្រូវតាមច្បាប់ យើងនឹងកែភ្លាម»។

ស្រដៀងគ្នានេះដែរ លោក លន់ រិទ្ធ ប្រធានគណបក្សខ្មែរសាធារណរដ្ឋ ក៏បានបញ្ជាក់ដែរថា គណបក្សលោក កំពុងរង់ចាំសេចក្ដីប្រកាសផ្លូវការពីក្រសួងមហាផ្ទៃ។ តែប្រធានគណបក្សរូបនេះ អះអាងថា លោកនៅតែចង់ប្រើឈ្មោះរបស់គណបក្សដដែល ព្រោះអ្វីដែលគណបក្សរបស់លោកធ្វើ គឺគោរពតាមរដ្ឋធម្មនុញ។ លោក លើកឡើងបែបនេះថា៖«គ្រាន់តែឈ្មោះគណបក្ស មិនមែនបង្ហាញថាយើងមិនគោរពច្បាប់កម្ពុជាឯណា ហើយឈ្មោះនេះ យើងប្រើជាង១០ឆ្នាំមកហើយ។ ខ្ញុំនៅតែចង់រក្សាឈ្មោះនេះដដែល ហើយយើងនឹងព្យាយាមរក្សាតាមអ្វីដែលយើងអាចធ្វើបាន។ តែពេលនេះយើងរង់ចាំសេចក្ដីប្រកាសផ្លូវការសិន»។

ក្នុងពិធីសំណេះសំណាលជាមួយសមាជិក-សមាជិកក្នុងខេត្តព្រៃវែង សម្តេច ស ខេង បានប្រាប់ឲ្យមន្ត្រីក្រោមឱវាទ ពិភាក្សាជាមួយគណបក្សទាំង២ ក្នុងការប្ដូរឈ្មោះឲ្យស្របតាមរបបដឹកនាំប្រទេស ដើម្បីជៀសវាងការភាន់ច្រឡំដោយប្រការណាមួយ៕