រដ្ឋបាល ត្រាំ កាត់ជំនួយសម្រាប់ប្រជាជនប៉ាឡេស្ទីនបន្ថែមទៀត ហើយបង្វិលទៅឲ្យអ៊ីស្រាអែលវិញ

អន្តរជាតិ

រដ្ឋបាល ត្រាំ កាត់ជំនួយសម្រាប់ប្រជាជនប៉ាឡេស្ទីនបន្ថែមទៀត ហើយបង្វិលទៅឲ្យអ៊ីស្រាអែលវិញ

17, Sep 2018 , 10:59 pm

រូបភាព

ដោយ: សៅ ផលនិស្ស័យ (Sao Phal Niseiy)

មន្ត្រីអាមេរិកបានទទួលស្គាល់នៅចុងសប្តាហ៍នេះថា ជំនួយរបស់ខ្លួនសម្រាប់ទ្រទ្រង់ការដោះស្រាយជម្លោះរវាងប៉ាឡេស្ទីន និងអ៊ីស្រាអែលត្រូវបានកាត់ ក្រោមយុទ្ធសាស្ត្រដាក់សម្ពាធឲ្យប៉ាឡេស្ទីនព្រមចូលចរចាជាមួយអ៊ីស្រាអែល។ កន្លងមកជំនួយពាក់ព័ន្ធជាង ៥០០លានដុល្លារផ្សេងទៀតត្រូវបានរដ្ឋបាល ដូណាល់ ត្រាំ កាត់ផ្តាច់រួចហើយដែរ។

ជំនួយដែលត្រូវកាត់ផ្តាច់នោះគឺមានទំហំ ១០ លានដុល្លារ ហើយវាជាជំនួយដែលប្រើប្រាស់សម្រាប់គាំទ្រការផ្សះផ្សារវាងប៉ាឡេស្ទីន និងអ៊ីស្រាអែលផងដែរ។ នេះបើតាមការបញ្ជាក់របស់មន្ត្រីអាមេរិកដែលបម្រើការងារនៅស្ថានទូតអាមេរិកដែលដកស្រង់ដោយទីភ្នាក់ងារព័ត៌មាន AFP។

ហិរញ្ញវត្ថុមួយចំណែកនៃជំនួយទាំង ១០លានដុល្លារដែលត្រូវបានប្រើប្រាស់សម្រាប់ជួយប្រជាជនប៉ាឡេស្ទីនដែលរស់នៅតំបន់ដែលអ៊ីស្រាអែលកាន់កាប់ West Bank និង Gaza Strip ត្រូវបានបង្វិលទៅជួយគម្រោងរវាងប្រជាជនអ៊ីស្រាអែល និងអារ៉ាប់ជំនួសវិញ។

«ដូចបានប្រកាសក្នុងខែសីហារួចហើយ រដ្ឋបាលអាមេរិកសម្រេចបង្វិលថវិកាជំនួយច្រើនជាង ២០០លានដុល្លារដែលដើមឡើយមានគោលដៅគាំទ្រកម្មវិធីជួយប្រជាជននៅ West Bank និង Gaza។ នៅពេលជាមួយគ្នានោះយើងក៏បានបង្វិលជំនួយមួយផ្នែកនៃជំនួយ ១០លានដុល្លារសម្រាប់គាំទ្រការគ្រប់គ្រងនិងដោះស្រាយជម្លោះ ទៅទ្រទ្រង់គម្រោងផ្សេងទៀតដូចគ្នា»។ នេះជាការបញ្ជាក់របស់មន្ត្រីអាមេរិក។

យ៉ាងណាក៏ដោយ មន្ត្រីអាមេរិកបានអាចបញ្ជាក់បានឡើយថា ការកាត់ជំនួយជាថ្មីទៀតនេះ បញ្ជាក់ថារាល់ជំនួយមិនពាក់ព័ន្ធនឹងបញ្ហាសន្តិសុខរបស់អាមេរិកសម្រាប់ប៉ាឡេស្ទីនពិតជាត្រូវបានកាត់ផ្តាច់ទាំងស្រុងឬយ៉ាងណាឡើយ។ ក្នុងឆ្នាំនេះ អាមេរិកនៅបន្តរក្សាជំនួយពាក់ព័ន្ធនឹងសន្តិសុខដែលមានទំហំប្រមាណ ៦១ពាន់លានដុល្លារអាមេរិកសម្រាប់ប៉ាឡេស្ទីន។

តាមពិតទៅ រដ្ឋបាលលោក ត្រាំ អះអាងថា ការបន្តកាត់ជំនួយសម្រាប់ប្រជាជនប៉ាឡេស្ទីនជាវិធីសាស្ត្រក្នុងការបង្ខំឲ្យអាជ្ញាធរប៉ាឡេស្ទីនត្រូវទៅចរចាជាមួយអ៊ីស្រាអែលដើម្បីដោះស្រាយជម្លោះដ៏រ៉ាំរ៉ៃ ខណៈដែលខ្លួនបន្តរៀបចំគម្រោងស្វែងរកសន្តិភាពសម្រាប់តំបន់មជ្ឈិមបូព៌ាទាំងមូលនោះ។

ក្រៅពីកាត់ជំនួយ កាលពីសប្តាហ៍មុន មន្ត្រីក្រសួងការបរទេសអាមេរិកបានចេញបញ្ជាទាមទារឲ្យមានការបិទស្ថានបេសកកម្មការទូតរបស់ប៉ាឡស្ទីននៅក្រុងវ៉ាស៊ីនតោនចោល។ ប្រមុខបេសកកម្មការទូតប៉ាឡេស្ទីនប្រចាំអាមេរិកលោក Husam Zomlot បានបង្ហាញការខកចិត្តខ្លាំងក្រោយទទួលការទាមទារនេះ ហើយបានថ្កោលទោសរាល់ការសម្រេចចិត្តរបស់រដ្ឋបាលលោក ត្រាំដែរ។ ប៉ុន្តែលោកសង្កត់ធ្ងន់ថា ប៉ាឡេស្ទីនជ្រើសរើសយកសិទ្ធិក្នុងនាមជារដ្ឋមួយ ហើយមិនឱនក្បាលចំពោះការបង្ខិតបង្ខំរបស់អាមេរិកឡើយ។

ការសម្រេចបញ្ជាឲ្យបិទដំណើរការស្ថានបេសកកម្មការទូតប៉ាឡេស្ទីននេះដែរ កើតឡើងចំខួប ២៥ឆ្នាំនៃការបង្កើតកិច្ចព្រមព្រៀងសន្តិភាពក្រុងអូស្លូ (Oslo Accords) ដែលជាកិច្ចព្រមព្រៀងដំបូងមួយរវាងភាគីជម្លោះអ៊ីស្រាអែល និងប៉ាឡេស្ទីន។ កាលនោះភាគីទាំងពីរសន្យាបញ្ចប់ជម្លោះដ៏រ៉ាំរ៉ៃ និងបង្ហូរឈាមគ្នាអស់រាប់ទសវត្សរ៍នេះផង។ ប៉ុន្តែការប្តេជ្ញាចិត្តនេះមិនត្រូវបានអនុវត្តឡើយ ហើយភាគីកាន់តែដើរឆ្ងាយពីផ្លូវទៅរកសន្តិភាពថែមទៀតដែលពិបាកស្តារបំផុត។

ត្រឡប់មកវិញ ទោះទើបមានការទាមទារឲ្យបិទស្ថានបេសកកម្មការទូតក្តី របបដឹកនាំប៉ាឡេស្ទីនបានសម្រេចកាត់ផ្តាច់ទំនាក់ទំនងជាមួយសេតវិមានរួចហើយក្រោយពេលលោក ត្រាំ ប្រកាសទទួលស្គាល់ទីក្រុងហ្ស៊េរុយសាឡិមជារដ្ឋធានីរបស់អ៊ីស្រាអែលចុងឆ្នាំមុន។

មេដឹកនាំប៉ាឡេស្ទីនបានបន្តចោទប្រកាន់ថា លោក ត្រាំ លម្អៀងខ្លាំងទៅរកអ៊ីស្រាអែល ហើយអាមេរិកក៏លែងជាសន្ធានការីអព្យាក្រឹត្យ និងគួរឲ្យទុកចិត្តរបស់ប៉ាឡេស្ទីនដែលជួយនាំយកសន្តិភាពបញ្ចប់ជម្លោះជាមួយអ៊ីស្រាអែលទៀតដែរ៕