កីឡាជាតិ
ជាតិ
លោក ថោង ខុន ផ្តល់បទសម្ភាសដល់អ្នកសារព័ត៌មានក្នុព្រឹត្តិការណ៍រត់ប្រណាំងពាក់កណ្តាលម៉ារ៉ាតុននៅអង្គរវត្តកាលពីពេលកន្លងទៅ
×![]()
ភ្នំពេញ៖ ចិនគឺជាខ្នងបង្អែកដ៏រឹងមាំ ក្នុងការជួយអភិវឌ្ឍន៍សេដ្ឋកិច្ច និងជីវភាពរបស់ប្រជាពលរដ្ឋកម្ពុជា។ បច្ចុប្បន្នទំនាក់ទំនងរវាងកម្ពុជា-ចិន បានឈានដល់ចំណុចកំពូលយុទ្ធសាស្ត្រ និងគ្រប់ជ្រុងជ្រោយ។ នេះជាការលើកឡើងរបស់រដ្ឋមន្ត្រីក្រសួងទេសចរណ៍លោក ថោង ខុន ។
ក្នុងថ្ងៃដឹកនាំប្រតិភូអន្តរក្រសួងផ្នែកបច្ចេកទេសរបស់គណៈកម្មាធិការជាតិអូឡាំពិកកម្ពុជា(NOCC)ទស្សនកិច្ចការដ្ឋានសាងសង់ទីលានបាល់ទាត់នៅពហុកីឡដ្ឋានជាតិមរតកតេជោ ដែលជាជំនួយឥតសំណងរបស់រដ្ឋាភិបាលចិន លោក ថោង ខុន បាននិយាយថា ចិនគឺជាដៃគូវិនិយោគធំជាងគេនៅកម្ពុជា ទាំងផ្នែកអចលនទ្រព្យ សេដ្ឋកិច្ច ពាណិជ្ជកម្ម និងទេសចរណ៍ ហើយទំនាក់ទំនងរវាងប្រទេសទាំងពីរប្រៀបដូចជាដែកថែប ដែលគ្មានថ្ងៃប្រេះស្រាំ។
«ទំនាក់ទំនងរវាងកម្ពុជា-ចិនបានឈានដល់ចំណុចកំពូលយុទ្ធសាស្ត្រ និងគ្រប់ជ្រុងជ្រោយ។ ប៉ុន្តែបច្ចុប្បន្នចិនគេប្រើពាក្យមួយថា កម្ពុជាជាមិត្តដែកថែប ដែលគ្មានថ្ងៃប្រេះស្រាំ និងរឹងមាំជារៀងរហូត»។ ការលើកឡើងរបស់លោក ថោង ខុន បែបនេះគឺឆ្លើយនឹងសំណួររបស់អ្នកសារព័ត៌មាន ដែលសួរពីទំនាក់ទំនងរវាងកម្ពុជា-ចិននាពេលបច្ចុប្បន្ន។
លោក ថោង ខុន ដែលជាប្រធានគណៈកម្មាធិការជាតិអូឡាំពិកផងនោះ ជឿជាក់ថា មិត្តភាពរវាងកម្ពុជា-ចិន នឹងរឹងមាំ គ្មានថ្ងៃប្រែប្រួលនាពេលអនាគត។ «ចិនជាខ្នងបង្អែកដ៏រឹងមាំសម្រាប់កម្ពុជាទាំងការវិនិយោគ សំណង់ សេដ្ឋកិច្ច ទេសចរណ៍ និងពាណិជ្ជកម្មផ្សេងៗ។ ហើយចិននឹងនៅជាមួយកម្ពុជា ដើម្បីជួយឲ្យប្រជាជនមានជីវភាពរីកចម្រើន និងកម្ពុជាមានការអភិវឌ្ឍ នេះជាគោលដៅដ៏មហិមានិងមោទកភាពបំផុតសម្រាប់យើង»។ នេះជាបញ្ជាក់របស់លោក ថោង ខុន។
បច្ចុប្បន្នទីលានបាល់ទាត់នៅពហុកីឡដ្ឋានជាតិមរតកតេជោ សាងសង់បាន២០ភាគរយហើយ ដោយគ្រោងបញ្ចប់ការសាងសង់ជាស្ថាពរនៅឆ្នាំ២០២១។ កីឡដ្ឋាននេះ សាងសង់ដោយក្រុមហ៊ុនចិន មានទំហំទឹកប្រាក់រហូតដល់ជាង១៥៧លានដុល្លារ ដែលជំនួយឥតសំណងរបស់រដ្ឋាភិបាលចិន។
ទីលានបាល់ទាត់នេះ ជាសមិទ្ធផលដំណាក់កាលទី២ ខណៈសមិទ្ធផលដំណាក់កាលទី១រួមមានអាងហែលទឹក អគារកីឡាក្នុងសាល និងក្រៅសាលមួយចំនួន ត្រូវបានសម្ពោធដាក់ឲ្យប្រើប្រាស់ក្នុងអំឡុងខែមេសា កន្លងទៅ ក្រោមវត្តមានសម្តេចនាយករដ្ឋមន្ត្រី ហ៊ុន សែន។ ពហុកីឡដ្ឋានមរតកតេជោ សាង់សង់ឡើង ដើម្បីត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣៕
Tag:
ពហុកីឡដ្ឋានមរតកតេជោ
ថោង ខុន
ចិន
© រក្សាសិទ្ធិដោយ thmeythmey.com
