ជាតិ
ក្រសួងវប្បធម៌ ព្រមានវិធានការលើតារា៤រូបទៀត ដែលធ្វើឲ្យប៉ះពាល់ដល់វប្បធម៌
× ភ្នំពេញ៖ បន្ទាប់ពីចេញវិធានការក្តៅ លើតារាសម្ដែងបែបស៊ិចស៊ី កញ្ញា សេង សូណា រួចមក នៅពេលនេះក្រសួងវប្បធម៌ និងវិចិត្រសិល្បៈ បានព្រមានចំពោះតារា៤រូបផ្សេងទៀត ជុំវិញការបង្ហោះរូបភាពខ្លួន នៅលើហ្វេសប៊ុក។ នេះបើតាមលិខិតក្រសួងវប្បធម៌ និងវិចិត្រសិល្បៈ ចុះថ្ងៃទី១៧ កញ្ញា។
តារាទាំង៤រូប ដែលក្រសួងវប្បធម៌ ព្រមាននេះ រួមមាន កញ្ញា ពេជ្រ អារីហ្សា, កញ្ញា រតនៈ ពិសី, អ្នកនាង សុខ ស្រីម៉ុច និងលោក អេនឌី ។ អ្នកទាំង៤នេះ ត្រូវបានគេឃើញនិយមបង្ហោះរូបភាពបែបស៊ិចស៊ីរបស់ខ្លួននៅលើបណ្ដាញសង្គម។
តាមរយៈលិខិតព្រមានជាផ្លូវការរបស់ក្រសួងវប្បធម៌ បានរៀបរាប់ពីករណីកំហុសឆ្គងដូចៗគ្នា របស់តារាទាំងនេះថា ពួកគេកំពុងធ្វើឲ្យប៉ះពាល់វប្បធម៌ ទំនៀមទម្លាប់ប្រពៃណីជាតិ បណ្ដាលឲ្យមានការថ្នាំងថ្នាក់យ៉ាងខ្លាំង ពីសំណាក់មហាជនខ្មែរ ក្នុងបណ្ដាញសង្គមហ្វេសប៊ុក។
ក្នុងលិខិតដោយឡែកពីគ្នា របស់លោក ថៃ នរៈសត្យា រដ្ឋលេខាធិការក្រសួងវប្បធម៌ បានព្រមានតារាទាំង៤ខាងលើ ដូច្នេះថា៖« ត្រូវបញ្ឈប់ទង្វើ ដែលនាំឲ្យប៉ះពាល់វប្បធម៌ ទំនៀមទំលាប់ ប្រពៃណីជាតិ។ ករណីនៅតែបន្តក្រុមប្រឹក្សាវិន័យ និងលើកសរសើរ នឹងមានវិធានការតាមក្រមសីលធម៌ នៃអ្នកសិល្បៈ ដោយផ្អាកសកម្មភាពទាក់ទងនឹង វិស័យសិល្បៈវប្បធម៌ ទៅតាមរយៈពេលណាមួយ សមស្របតាមកំហុសឆ្គងនៃអ្នកប្រព្រឹត្ត»។
កាលពីពេលថ្មីនេះ ក្រសួងវប្បធម៌ បានសម្រេចផ្អាកសកម្មភាពកញ្ញា សេង សូណា ពីវិស័យសិល្បៈ ដោយសារសិល្បការិនីរូបនេះ តែងតែប្រើប្រាស់សម្លៀកបំពាក់ និងឥរិយាបថដែលធ្វើឲ្យប៉ះពាល់ទំនៀមទម្លាប់ ប្រពៃណីខ្មែរ តាមរយៈការថតខ្សែភាពយន្ត និងបណ្តាញព័ត៌មាន។ក្រសួងបានប្រាប់ទៅសមាគមទូរទស្សន៍កម្ពុជានិងអាជីវករសិល្បៈទាំងអស់ឲ្យផ្អាកយកតារាស្រី សេង សូណា ទៅសម្ដែងរហូតដល់ថ្ងៃទី១៨ ខែសីហា ឆ្នាំ២០១៩ ៕
Tag:
ក្រសួងវប្បធម៌
តារាសម្ដែង
វប្បធម៌
© រក្សាសិទ្ធិដោយ thmeythmey.com