មេទ័ព៥រូប លាលែងពីតំណែងជានាយរងសេនាធិការចម្រុះ តែនៅសល់តំណែងមួយទៀត

ជាតិ

នយោបាយជាតិ

មេទ័ព៥រូប លាលែងពីតំណែងជានាយរងសេនាធិការចម្រុះ តែនៅសល់តំណែងមួយទៀត

21, Sep 2018 , 9:52 am

រូបភាព

ពីឆ្វេងទៅស្តាំ៖ លោក ម៉ៅ សុផាន់, លោក ស្រី ឌឹក, លោក ចាប ភក្តី, លោក ព្រហ្ម ផេង, លោក កែវ ធី

ដោយ: ថ្មីៗ

ភ្នំពេញ៖ មេទ័ពជាន់ខ្ពស់ប្រាំរូប ដែលម្នាក់ៗ កាន់តំណែងដល់ទៅពីរ បានដាក់លិខិតសុំលាលែងពីតំណែងមួយ។ នេះបើតាមនាយឧត្តមសេនីយ៍ ឈុំ សុជាត អ្នកនាំពាក្យក្រសួងការពារជាតិ។

បើតាមនាយឧត្តមសេនីយ៍ ឈុំ សុជាត តំណែងទាំងពីររបស់មេទ័ពទាំងនោះ គឺតំណែងជានាយរងសេនាធិការចម្រុះនៃកងយោធពលខេមរភូមិន្ទ និងតំណែងជាមេអង្គភាព។ មេទ័ព ដែលកាន់អង្គភាពសំខាន់ៗទាំងប្រាំនោះ រួមមាន ឧត្តមសេនីយ៍ឯក កែវ ធី មេបញ្ជាការកងពលធំអន្តរាគមន៍លេខ២, ឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣, ឧត្តមសេនីយ៍ឯក ព្រហ្ម ផេង មេបញ្ជាការកងពលតូចអន្តរាគមន៍លេខ១, ឧត្តមសេនីយ៍ឯក ចាប ភក្តី មេបញ្ជាការកងពលតូចទ័ពឆ័ត្រយោងពិសេសលេខ៩១១, និង ឧត្តមសេនីយ៍ឯក ម៉ៅ សុផាន់ មេបញ្ជាការកងពលតូចលេខ៧០។

នាយឧត្តមសេនីយ៍ ឈុំ សុជាត បន្តថា ឧត្តមសេនីយ៍ឯកទាំងប្រាំ បានលាលែងតែតំណែងជានាយរងសេនាធិការចម្រុះប៉ុណ្ណោះ ឯតំណែងជាមេអង្គភាព គឺនៅដដែល។ តាមរយៈការផ្តល់បទសម្ភាសដល់សារព័ត៌មានថ្មីៗ អ្នកនាំពាក្យរូបនេះ បានបញ្ជាក់យ៉ាងដូច្នេះថា «វា ជាកំណែទម្រង់លើវិស័យកងទ័ព ដែលយើង ចង់ឲ្យម្នាក់ កាន់តំណែងតែមួយ។ ធ្វើបែបនេះ ទើបវា ជឿនលឿន និងទាន់សម័យ ហើយការងារនិងការបញ្ជាកងទ័ព មានប្រសិទ្ធិភាពខ្ពស់»។

កាលពីពេលថ្មីៗនេះ ប្រមុខរដ្ឋាភិបាល បានចេញអនុក្រឹត្យមួយ ដោយកំណត់ឲ្យអង្គភាពរបស់ឧត្តមសេនីយ៍ឯកទាំងប្រាំ ស្ថិតនៅក្រោមការគ្រប់គ្រងរបស់ឧត្តមសេនីយ៍ឯក ហ៊ុន ម៉ាណែត ដែលជាមេបញ្ជាការកងទ័ពជើងគោកវិញ។ កាលពីមុន អង្គភាពទាំងប្រាំនេះ ស្ថិតនៅក្រោមបញ្ជារបស់អគ្គមេបញ្ជាការនៃកងយោធពលខេមរភូមិន្ទ។

នាយឧត្តមសេនីយ ឈុំ សុជាត មានប្រសាសន៍បែបនេះថា «ពីមុនស្ថិតនៅក្រោមអគ្គមេបញ្ជាការ អ៊ីចឹងធ្វើឲ្យការបញ្ជាទ័ពក្នុងអង្គភាពទាំងប្រាំហ្នឹង ត្រូវឆ្លងកាត់ច្រើនដំណាក់កាល។ តែឥឡូវ យើងដាក់ឲ្យស្ថិតនៅក្រោមមេបញ្ជាការកងទ័ពជើងគោកផ្ទាល់តែម្តង ដើម្បីឲ្យការបញ្ជាទ័ព គឺខ្លី ហើយរហ័ស»។

គ្រាន់តែចូលកាន់តំណែងក្នុងអាណត្តិទី៦នេះភ្លាម រដ្ឋាភិបាលកម្ពុជា ក៏ចាប់ផ្តើមកែប្រែរចនាសម្ព័ន្ធ និងផ្លាស់ប្តូរមេទ័ពសំខាន់ៗមួយចំនួន ក្នុងកងយោធពលខេមរភូមិន្ទ។ ដោយក្នុងនោះ មានដូចជា លោក វង្ស ពិសេន កាន់តំណែងជាអគ្គមេបញ្ជាការ ជំនួសលោក ប៉ុល សារឿន លោក ឥត សារ៉ាត់ កាន់តំណែងជានាយសេនាធិការចម្រុះ ជំនួសលោក គន់ គីម និងលោក ហ៊ុន ម៉ាណែត កាន់តំណែងជាមេបញ្ជាការកងទ័ពជើងគោក ជំនួសលោក មាស សុភា។

ចំណែក លោក ប៉ុល សារឿន លោក គន់ គីម និងលោក មាស សុភា ត្រូវបានដំឡើងទៅជាទេសរដ្ឋមន្ត្រី ទទួលបន្ទុកបេសសកម្មពិសេស៕