អន្តរជាតិ
វិបត្តិរ៉ូហ៊ីងយ៉ា៖ អង់គ្លេសប្រាប់មេដឹកនាំមីយ៉ាន់ម៉ាឲ្យចាត់ការក្រុមយោធា បើមិនចង់ឡើងតុលាការ ICC
រដ្ឋមន្ត្រីការបរទេសអង់គ្លេស Jeremy Hunt នាជំនួបជាមួយទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី (រូបភាព AFP)
×![]()
ដោយ: តន ចាន់រិទ្ធារ៉ា
រដ្ឋមន្ត្រីការបរទេសអង់គ្លេស Jeremy Hunt នៅថ្ងៃទី២០ ខែកញ្ញា បានប្រាប់ឲ្យរដ្ឋាភិបាលស៊ីវិលមីយ៉ាន់ម៉ា ស្វែងរកយុត្តិធម៌ឲ្យជនមូស្លីមរ៉ូហ៊ីងយ៉ាដែលរងទុក្ខបុកម្នេញដោយសារប្រតិបត្តិការរបស់យោធាប្រទេសនេះ។ លោក Hunt ព្រមានថា បើរដ្ឋាភិបាលស៊ីវិលរបស់ទីប្រឹក្សារដ្ឋ អ៊ុងសាន ស៊ូជី នៅតែមិនមាត់មិនកទៀតនោះ សហគមន៍អន្តរជាតិក៏មិននៅស្ងៀមដែរ ហើយការឡើងតុលាការព្រហ្មទណ្ឌអន្តរជាតិ (ICC) ជាជម្រើសមួយដែរ។
រដ្ឋមន្ត្រីការបរទេសអង់គ្លេស Jeremy Hunt បានជួបជាមួយមេដឹកនាំមីយ៉ាន់ម៉ា អ៊ុងសាន ស៊ូជី ក្នុងដំណើរទស្សនកិច្ចនៅមីយ៉ាន់ម៉ា ក្នុងគោលដៅត្រួតពិនិត្យស្ថានភាពវិបត្តិមនុស្សធម៌លើជនភាគច្រើនរ៉ូហ៊ីងយ៉ា។ លោក Hunt បានប្រាប់ឲ្យមីយ៉ាន់ម៉ាធានាថា នឹងគ្មានកន្លែងលាក់ខ្លួនឡើយសម្រាប់អ្នកទទួលខុសត្រូវលើឧក្រិដ្ឋកម្មប្រឆាំងជនមូស្លីមរ៉ូហ៊ីងយ៉ា បើមីយ៉ាន់ម៉ាចង់ចៀសវាងការខូចមុខមាត់ប្រទេសជាតិ។
បើតាមទីភ្នាក់ងារព័ត៌មាន Reuters លោក Hunt បានសង្ក់តធ្ងន់ទៅកាន់លោកស្រី ស៊ូជី ពីសារសំខាន់ក្នុងការឲ្យកងទ័ពមីយ៉ាន់ម៉ាទទួលខុសត្រូវចំពោះអំពើរបស់ខ្លួនក្នុងប្រព័ន្ធយុត្តិធម៌ក្នុងស្រុករបស់មីយ៉ាន់ម៉ាផ្ទាល់។ ប្រមុខការទូតអង់គ្លេសរូបនេះបន្ថែមថា បើយន្តការក្នុងស្រុកមិនអាចវែកមុខការពិតទេ សហគមន៍នឹងមិនទុកវិបត្តិនេះឲ្យទៅណាឡើយ ហើយជម្រើសផ្សេងទៀត នឹងត្រូវពិចារណារាប់ទាំងការនាំយកសំណុំរឿងទៅតុលាការព្រហ្មទណ្ឌអន្តរជាតិ (ICC) ។
សូមរំឭកបន្តិចថា ក្រុមស៊ើបអង្កេតរបស់អង្គការសហប្រជាជាតិបានរកឃើញបទឧក្រិដ្ឋធ្ងន់ធ្ងរដែលប្រព្រឹត្តដោយទាហានមីយ៉ាន់ម៉ាក្នុងប្រតិបត្តិការនៅរដ្ឋ Rakhine ដែលបង្ខំឲ្យជនភាគតិចរ៉ូហ៊ីងយ៉ាជាង៧សែននាក់ភៀសខ្លួនទៅបង់ក្លាដែស។ អំពើព្រៃផ្សៃរបស់យោធាដូចជាការដុតផ្ទះ ការសម្លាប់មនុស្ស និងការបំពានផ្លូវភេទជាដើម បានកើតឡើងនៅអំឡុងយុទ្ធនាការរបស់យោធា ដែលក្រុមស៊ើបអង្កេតពិសេសចាត់ទុកជាចេតនាប្រល័យពូជសាសន៍។
ក្រុមស៊ើបអង្កេតដដែលបានបញ្ចេញឈ្មោះមេទ័ពកំពូលៗ៦នាក់របស់មីយ៉ាន់ម៉ារាប់ទាំងអគ្គមេបញ្ជាការកងទ័ព មីន អ៊ុនឡាំង ផង ដើម្បីយកទៅកាត់ទោសសម្រាប់ឧក្រិដ្ឋកម្មប្រឆាំងមនុស្សជាតិ និងប្រល័យពូជសាសន៍នៅ Rakhine ។ យ៉ាងណាមិញ រដ្ឋាភិបាលក្រុងណៃពិដោបានចេញមុខការពារក្រុមយោធា និងចាត់ទុកប្រតិបត្តិការនៅ Rakhine ដែលធ្វើឡើងក្រោយមានការវាយប្រហារខែសីហា ឆ្នាំ២០១៧ ជាប្រតិបត្តិការប្រឆាំងភេរវកម្មដែលស្របច្បាប់។
ជុំវិញករណីនេះ តុលាការព្រហ្មទណ្ឌអន្តរជាតិក៏បានបើកការស៊ើបអង្កេតបឋមរួចហើយ ដែលនេះនឹងបើកផ្លូវដល់ការស៊ើបអង្កេតពេញលេញផងដែរ។ មីយ៉ាន់ម៉ាឯណោះអះអាងថា តុលាការនេះគ្មានយុត្តាធិការលើខ្លួនដែលមិនមែនជាសមាជិក ICC ឡើយ។ ប៉ុន្តែចៅក្រមតុលាការធ្លាប់ប្រកាសដែរថា ខ្លួននៅតែអាចកាត់ក្ដីករណីឧក្រិដ្ឋកម្មប្រឆាំងក្រុមរ៉ូហ៊ីងយ៉ានេះបាន ព្រោះបង់ក្លាដែសដែលជាទីស្នាក់អាស្រ័យរបស់ជនភៀសខ្លួនរ៉ូហ៊ីងយ៉ាជាសមាជិករបស់តុលាការអន្តរជាតិមួយនេះ៕
Tag:
ICC
អង់គ្លេស
មីយ៉ាន់ម៉ា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
