ចិននិងរុស្ស៊ីព្រមានអាមេរិក ក្រោយរដ្ឋបាលលោក ត្រាំ ដាក់ទណ្ឌកម្មរឿងទិញលក់អាវុធ

អន្តរជាតិ

ចិននិងរុស្ស៊ីព្រមានអាមេរិក ក្រោយរដ្ឋបាលលោក ត្រាំ ដាក់ទណ្ឌកម្មរឿងទិញលក់អាវុធ

21, Sep 2018 , 9:39 pm

រូបភាព

យន្តហោះចម្បាំង Sukhoi-35 ដែលចិនទិញពីរុស្ស៊ី ជាមូលហេតុនៃទណ្ឌកម្មរបស់អាមេរិក (រូបភាព AFP)

ដោយ: តន ចាន់រិទ្ធារ៉ា

ក្នុងសេចក្ដីថ្លែងការណ៍ពីរផ្សេងគ្នានៅថ្ងៃទី២១ ខែកញ្ញា ក្រុងមូស្គូ និងក្រុងប៉េកាំង បានព្រមានក្រុងវ៉ាស៊ីនតោន បន្ទាប់ពីរដ្ឋបាលប្រធានាធិបតី ដូណាល់ ត្រាំ ដាក់ទណ្ឌកម្មជុំវិញការទិញលក់អាវុធរវាងប្រទេសទាំងពីរ។ ទណ្ឌកម្មរបស់អាមេរិកលើអង្គភាពកងទ័ពចិន និងជនជាតិរុស្ស៊ី ធ្វើឡើងក្រោម «ច្បាប់ប្រឆាំងសត្រូវអាមេរិកតាមរយៈទណ្ឌកម្ម» ដែលអនុញ្ញាតឲ្យរដ្ឋាភិបាលអាចដាក់ទណ្ឌកម្មប្រឆាំងប្រទេសណាដែលរកស៊ីជាមួយរុស្សី។

រដ្ឋបាលប្រធានាធិបតី ដូណាល់ ត្រាំ នៅថ្ងៃទី២០ ខែកញ្ញា បានដាក់ទណ្ឌកម្មលើយោធាចិនចំពោះការទិញយន្តហោះចម្បាំង និងប្រព័ន្ធការពារមីស៊ីលពីរុស្ស៊ី។ ជាមួយគ្នានេះ មនុស្សចំនួន៣៣នាក់ និងស្ថាប័នមួយចំនួនទៀតដែលជាប់ពាក់ព័ន្ធនឹងអង្គភាពយោធា និងចារកម្មរបស់រុស្ស៊ី ក៏ត្រូវដាក់ទណ្ឌកម្មដោយក្រសួងការបរទេសអាមេរិកដែរ។ ចំណាត់ការរបស់ក្រសួងការបរទេសអាមេរិក ធ្វើឡើងក្រោមច្បាប់ប្រឆាំងសត្រូវអាមេរិកតាមរយៈទណ្ឌកម្មឆ្នាំ២០១៧ ។

ច្បាប់ខាងលើ ដែលបង្កើតក្រោយការចោទរុស្ស៊ីថា លូកលាន់ការបោះឆ្នោតឆ្នាំ២០១៦ បើកសិទ្ធិឲ្យរដ្ឋបាលលោក ត្រាំ ដាក់ទណ្ឌកម្មលើប្រទេសទាំងឡាយណាដែលរកស៊ីជាមួយរុស្ស៊ី។ ក្នុងសេចក្ដីប្រកាសរបស់ខ្លួន ក្រសួងការបរទេសអាមេរិកបានចាត់វិធានការលើនាយកដ្ឋានអភិវឌ្ឍគ្រឿងបរិក្ខារ ដែលចំណុះក្រសួងការពារជាតិ និងនាយក Li Shangfu ដែលមានទំនាក់ទំនងដោះដូរជាមួយក្រុមហ៊ុនរុស្ស៊ីRosoboronexport ។ ចិនទិញអាវុធពីរុស្ស៊ីនៅឆ្នាំ២០១៧ និង២០១៨ ។

ក្រោយអាមេរិកប្រកាសទណ្ឌកម្ម ចិនក៏ប្រាប់ឲ្យដកចេញវិញភ្លាម។ ក្នុងសន្និសីទសារព័ត៌មាននៅថ្ងៃទី២១ ខែកញ្ញា លោក Geng Shuang អ្នកនាំពាក្យក្រសួងការបរទេសចិននិយាយថា ចិនមិនពេញចិត្តឡើយចំពោះទណ្ឌកម្មដែលមិនអាចទទួលយកបានរបស់អាមេរិក ហើយចិនក៏បានតវ៉ាជាផ្លូវការរួចហើយដែរ។ បើតាមអ្នកនាំពាក្យរូបនេះ បើអាមេរិកមិនដកទណ្ឌកម្មវិញឲ្យបានឆាប់ទេ អាមេរិកនឹងរងផលវិបាកមិនខាន។

ពីរដ្ឋធានីមូស្គូឯណោះ មន្ត្រីក្រសួងការបរទេសរុស្ស៊ីចាត់ទុកទណ្ឌកម្មលើខ្លួន និងចិន ជាការប្រលែងនឹងភ្លើង ដែលប្រកបដោយគ្រោះថ្នាក់ និងជាការគំរាមកំហែងស្ថិរភាពពិភពលោក។ បើយោងតាមសារព័ត៌មាន AFP អនុរដ្ឋមន្ត្រីការបរទេសរុស្ស៊ី Sergei Ryabkov លើកឡើងថា អាមេរិកត្រូវតែចាំពីស្ថិរភាពសាកលដែលប៉ះពាល់ដោយការធ្លាក់ចុះនៃទំនាក់ទំនងរុស្ស៊ី និងអាមេរិក ហើយអាមេរិកគួរឈប់ធ្វើសកម្មភាពបែបនេះទៀត។

ដោយសារទណ្ឌកម្មលើរុស្ស៊ីរាលដាលដល់ចិនបែបនេះ មន្ត្រីអាមេរិកពន្យល់ថា ទណ្ឌកម្មនេះសំដៅតែរុស្ស៊ីមួយប៉ុណ្ណោះ មិនមែនចិនឡើយ។ បើតាមទីភ្នាក់ងារព័ត៌មាន Reuters ក្នុងសន្និសីទតាមទូរសព្ទមួយ មន្ត្រីអាមេរិកម្នាក់និយាយថា គោលដៅចម្បងរបស់ទណ្ឌកម្មទាំងអម្បាលម៉ាន គឺប្រឆាំងតែរុស្ស៊ី ហើយគ្មានបំណងបង្កផលប៉ះពាល់ដល់សមត្ថភាពការពារជាតិប្រទេសណាដែរ៕