ជាតិ
នយោបាយជាតិ
ប្រមុខរដ្ឋស្តីទី លើកលែងទោសឲ្យផលិតករភាពយន្តជនជាតិអូស្ត្រាលី ដែលត្រូវជាប់គុក៦ឆ្នាំ
× ភ្នំពេញ៖ សម្តេច សាយ ឈុំ ប្រធានព្រឹទ្ធសភា ដែលទទួលរាជានុសិទ្ធិជាប្រមុខរដ្ឋស្តីទី បានចុះហត្ថលេខាជំនួសព្រះមហាក្សត្រ លើព្រះរាជក្រឹត្យ នៅថ្ងៃទី២១ ខែកញ្ញា ឆ្នាំ២០១៨នេះ ដើម្បីលើកលែងទោសឲ្យលោក Jame Ricketson ផលិតករភាពយន្តជនជាតិអូស្ត្រាលី ដែលត្រូវបានកាត់ទោសជាប់ពន្ធនាគាររយៈពេល៦ឆ្នាំនៅកម្ពុជា ដោយសារតែបង្ហោះដ្រូន (Drone) ថតរូបភាពនិងវីដេអូពីលើអាកាស។ សម្តេចនាយករដ្ឋមន្ត្រី ហ៊ុន សែន ជាអ្នកស្នើឲ្យលើកលែងទោស។
បន្ទាប់ពីប្រមុខរដ្ឋស្តីទី ចេញព្រះរាជក្រឹត្យលើកលែងទោសរួច ព្រះរាជអាជ្ញាអមសាលាដំបូងរាជធានីភ្នំពេញ ក៏បានចេញដីកាមួយភ្លាម ដើម្បីបង្គាប់ទៅមន្រ្តីពន្ធនាគារព្រៃស ឲ្យដោះលែងលោក Jame។
សូមរម្លឹកថា ក្រោយបង្ហោះដ្រូនលើអាកាសក្នុងរាជធានីភ្នំពេញ កាលពីអំឡុងខែមិថុនា ឆ្នាំ២០១៨ លោក Jame ដែលមានវ័យ៦៥ឆ្នាំ ក៏ត្រូវបានឃាត់ខ្លួន ក្រោមបទចោទ «ប្រមូលផ្តុំព័ត៌មានជាអាទិ៍ ដែលអាចធ្វើឲ្យអន្តរាយការការពារជាតិ អំពើទទួល ឬប្រមូលផ្តុំដើម្បីផ្តល់ព័ត៌មានវិទ្យា ឬសលាកបត្រដែលអាចធ្វើឲ្យអន្តរាយការការពារជាតិ»។ រហូតដល់ថ្ងៃទី៣១ ខែសីហា ឆ្នាំ២០១៨ សាលាដំបូងរាជធានីភ្នំពេញ បានប្រកាសសាលក្រម ដោយកំណត់ឲ្យបុរសជនជាតិអូស្ត្រាលីរូបនេះ ជាប់ពន្ធនាគារ៦ឆ្នាំនៅកម្ពុជា៕
Tag:
ហ៊ុន សែន
Jame
មហាក្សត្រ
សាយ ឈុំ
© រក្សាសិទ្ធិដោយ thmeythmey.com