ជាតិ
បទយកការណ៍ / បទសម្ភាសន៍
×![]()
ភ្នំពេញ៖ ដោយមើលឃើញពីឱកាស ដែលមិនសូវមានអ្នកធ្វើអាជីវកម្មទៅលើ «តែ» ច្រើននៅឡើយ លោក ឃី សុភ័ណ បានសម្រេចបង្កើតហាងតែមួយ ដែលអាចឲ្យភ្ញៀវមកពិសាតែ ជាមួយនឹងវិធីសាស្ត្រឆុងតែ ទៅតាមរបៀបត្រឹមត្រូវ។ ទោះទើបចាប់ផ្ដើមរយៈពេលខ្លីក៏ពិតមែន តែបុរសវ័យជាង៣០ឆ្នាំរូបនេះ រំពឹងថា រយៈពេល២ឆ្នាំក្រោយការបើកហាងតែរបស់លោក ពលរដ្ឋខ្មែរ នឹងបែរពីការនិយមកាហ្វេច្រើន មកចាប់អារម្មណ៍តែវិញ។ លោកជឿជាក់បែបនេះ ព្រោះថាតែ មានគុណប្រយោជន៍ច្រើនជាងកាហ្វេ និងមិនធ្វើឲ្យប៉ះពាល់សុខភាពដូចកាហ្វេឡើយ។
សូមអញ្ជើញស្តាប់បទយកការណ៍ដែលរៀបចំដោយ កញ្ញា ថាន រស្មី ដូចតទៅ៖
បើនិយាយពី«តែ»នៅពេលបច្ចុប្បន្ន ប្រហែលមិនសូវមានអ្នកចាប់អារម្មណ៍ ឬដឹងថាមានហាងតែ ដែលអាចជួបជុំពិភាក្សា ឬសម្រាក និងភ្លក់រសជាតិ«តែ»ដូចកាហ្វេប្រ៊េនៗនៅពេលបច្ចុប្បន្នឡើយ។ ពិតណាស់ ទោះមិនសូវឃើញមានការចាប់អារម្មណ៍លើ«តែ» ច្រើន ក៏លោក ឃី សុភ័ណ សុខចិត្តបោះបង់មុខតំណែងជានាយកផ្នែកភាសាថៃ នៃសាកលវិទ្យាល័យមួយក្នុងរាជធានីភ្នំពេញ មកបើកហាង«តែ» ដែលកម្របានឃើញក្នុងប្រទេសកម្ពុជា។
ដោយក្ដីស្រលាញ់ និងបានរៀនយល់ដឹងអំពីគុណប្រយោជន៍«តែ» ទើបបុរសវ័យជាង៣០ឆ្នាំរូបនេះ សម្រេចបើកហាងតែដែលមានឈ្មោះថា «ជំរំតែ» នៅក្នុងផ្ទះល្វែងមួយល្វែងមួយ។ ហាងតែនេះ មានភាពស្ងប់ស្ងាត់ ខុសពីហាងកាហ្វេ ដែលមានសភាពអ៊ូអរច្រើន។
បើតាមលោក លោក ឃី សុភ័ណ តែមានគុណប្រយោជន៍ជាច្រើនសម្រាប់សុខភាព ដោយកាត់បន្ថយជំងឺទឹកនោមផ្អែម ជំងឺធាត់ កាត់បន្ថយស្ត្រេស មាត់ធ្មេញ និងជាពិសេសល្អសម្រាប់ស្ត្រី។ លោក ឃី សុភ័ណបញ្ជាក់៖ «តែធ្វើឲ្យអារម្មណ៍យើងល្អជាងកាហ្វេ និងធ្វើឲ្យខួរក្បាលយើងស្រឡះ។ សម្រាប់កាហ្វេវិញមួយថ្ងៃមិនឲ្យញ៉ាំលើសពី១០០មីលីលីត្រទេ មានន័យថា មិនឲ្យលើសពី២ពែង ព្រោះជាតិកាហ្វេអ៊ិនរបស់កាហ្វេមានច្រើន។ ចំណែកឯ តែមិនសូវមានជាតិកាហ្វេអ៊ិនទេ ហើយតែខ្លះក៏មិនមានជាតិកាហ្វេអ៊ីនតែម្ដង»។
ក្រោយពីបានប្រាប់ខ្លះៗពីគុណប្រយោជន៍របស់តែ ម្ចាស់ហាងតែរូបនេះ ក៏បានណែនាំពីដំណើរការប្រមូលផលតែផងដែរ។ តែត្រូវបានប្រមូលផលយ៉ាងយកចិត្តទុកដាក់បំផុត ហើយតែដែលមានគុណ ភាពល្អ ជាតែដែលបេះចេញពីបណ្ដូល និងសន្លឹកទី២ ទី៣ ទី៤ ស្ថិតនៅជាប់បណ្ដូលតែ តែប៉ុណ្ណោះ។ យ៉ាងណាមិញ ការប្រមូលផលតែដោយដៃផ្ទាល់ មានតម្លៃ និងមានគុណភាព ជាងការយកសម្ភារមកកាត់ ហើយតម្លៃក៏ខុសគ្នាខ្លាំងផងដែរ។ លោក ឃី សុភ័ណបញ្ជាក់៖«តែបៃតងគេយកត្រួយសុទ្ធ ចឹងកាលណាយើងកាត់វាមិនល្អពេលផលិតជាតែទៅវាមិនស្អាត ព្រោះតែបៃតងគេចង់ទុកវាឲ្យនៅស្អាតពេលដែលឆុងទៅដូចបេះពីដើមស្រស់។ ហើយវាក៏ធ្វើឲ្យប៉ះពាល់ដល់គុភាពរស់ជាតិផងដែរ។ នៅប្រទេសជប៉ុនតែដែលកាត់ដោយម៉ាស៊ីនមួយកញ្ចប់តម្លៃត្រឹមតែ៣ដុល្លារអីតែប៉ុណ្ណោះ តែបើតែដែលបេះដោយដៃផ្ចិតផ្ចង់មួយកញ្ចប់តែដូចគ្នាតម្លៃអាចពី១០០ដុល្លារ ទៅ៣០០ដុល្លារឯណោះ។
ដោយមើលឃើញពីគុណប្រយោជន៍ និងមានបទពិសោធន៍ច្រើនពី«តែ»ដូច្នេះហើយ ទើប លោក ឃី សុភ័ណ សម្រេចចិត្តបើកហាងតែនេះឡើង។ នៅក្នុងហាងតែដែលមានសភាពស្ងប់ស្ងាត់ និយាយបណ្ដើរចាក់ទឹកតែចូលកូនពែងតូចៗ ដើម្បីទទួលភ្ញៀវបណ្ដើរ បុរសសម្បុរស្រអែមរូបនេះ ជឿជាក់ថា យ៉ាងយូរត្រឹមរយៈពេល១ឆ្នាំកន្លះ លោកនឹងធ្វើឲ្យហាងតែរបស់ខ្លួន ត្រូវបានទទួលស្គាល់ពីសំណាក់អ្នកនិយមពិសាតែ។ លោក ឃី សុភ័ណបញ្ជាក់៖«តែជាចំណូលចិត្តរបស់ខ្ញុំ ទើបខ្ញុំចង់ធ្វើអាជីវកម្មលើតែនេះម្ដងទៅ។ ខ្ញុំគិតថាអាចទៅរួច ព្រោះការនិយម គឺអាស្រ័យលើការពន្យល់អំពីគុណភាពរបស់វា។ យ៉ាងយូរខ្ញុំប្រើរយៈពេល១ឆ្នាំកន្លះ ខ្ញុំនឹងអាចធ្វើឲ្យតែ មានការចាប់អារម្មណ៍បានច្រើន។ ដូច្នេះខ្ញុំប្រើវិធីសាស្ត្រព្រៃព័ន្ធក្រុង ដោយប្រើបណ្ដាញសង្គម និងការផ្សព្វផ្សាយបន្តពីអតិថិជន»។
ដោយចាប់ផ្ដើមបន្តិចម្ដងៗ បច្ចុប្បន្នហាងតែរបស់លោក ឃី សុភ័ណ បានមានទាំងសេវាឆុងតែនៅកន្លែងសម្រាប់អតិថិជន និងមានលក់តែជាច្រើនប្រភេទ ដូចជាតែអ៊ូឡុង៤រដូវ តែភូអ៊ និងតែបៃតងជាដើម។ ទោះទើបចាប់ផ្ដើមអាជីវកម្មក្ដី តែលោកនៅតែបន្តជឿជាក់ថាគុណប្រយោជន៍របស់តែ នឹងអាចនាំឲ្យអាជីវកម្មតែនេះ ទទួលបានជោគជ័យ។ ហើយលោក ឃី សុភ័ណជឿជាក់ថា នៅរយៈពេល១ឆ្នាំខាងមុខ ហាងជំរំតែ នឹងអាចពង្រីកសាខាថ្មីមួយទៀតបាន។
ជាការពិតណាស់ តែក្រៅពីមានគុណប្រយោជន៍ជាច្រើនសម្រាប់សុខភាព កាកតែក៏មានផលប្រយោជន៍សម្រាប់សម្រស់ដែរ។ ដោយគេអាចច្នៃតែធ្វើជាម៉ាសបិទមុខ ដើម្បីកាត់បន្ថយភាពជ្រីវជ្រួញ និងស្នាមអុជខ្មៅ។ ជាពិសេសសម្រាប់អ្នកមានបញ្ហាស្លក់ក្រោមភ្នែក ដោយការយកកាកតែ មកបិទថ្នមៗពិតជាអាចជួយកាត់បន្ថយអាការនេះបាន៕
Tag:
អាជីវកម្មថ្មី
តែ
កាហ្វេ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
