ជាតិ
អ្នកស្រាវជ្រាវ នឹងបកស្រាយចម្ងល់ទាក់ទងនឹងសិលាចារឹកភាសាចាមនៅប្រាសាទអង្គរវត្ត
× នៅប្រាសាទអង្គរវត្ត មានសិលាចារឹកជាច្រើន ដែលត្រូវបានគេចារចម្រុះជាតិសាសន៍។ តាមអ្នកសិក្សាស្រាវជ្រាវ វត្តមានសិលាចារឹកនៅប្រាសាទអង្គរ មានដូចជាភាសាជប៉ុន ភូមា ចិន អារ៉ាប់ ហើយក៏មានវត្តមានភាសាចាមផងដែរ។ កន្លងមក មានមនុស្សតិចណាស់ ដែលបានឃើញសិលាចារឹកភាសាចាម ឬថាបានឃើញហើយ តែមិនស្គាល់ថាជាភាសាអ្វីច្បាស់ក៏មាន។ ដើម្បីបង្ហាញ ក៏ដូចជាស្រាយចម្ងល់ទាក់ទងនឹងវត្តមានសិលាចារឹកភាសាចាមនេះ អ្នកស្រាវជ្រាវភាសាចាម នឹងធ្វើបទបង្ហាញមួយនៅចុងខែ កញ្ញាខាងមុខនេះ។
បទបង្ហាញស្ដីពី «វត្តមានសិលាចារឹកចាមនៅអង្គរវត្ត» នឹងរៀបចំធ្វើនៅពុទ្ធសាសនបណ្ឌិត្យ នៅថ្ងៃទី២៨ ខែកញ្ញា ចាប់ពីម៉ោង ៩ព្រឹក ដល់ម៉ោង ១១ ថ្ងៃត្រង់។ តាមរយៈសេចក្តីជូនដំណឹងរបស់ពុទ្ធសាសនបណ្ឌិត្យ វាគ្មិននៃបទបង្ហាញ ឬបាឋកថានេះ គឺលោក ឡឹប កើ អ្នកស្រាវជ្រាវភាសាចាមដ៏ល្បីនៅកម្ពុជា។
លោក ឡឹប កើ បានប្រាប់សារព័ត៌មានថ្មីៗថា ផ្អែកតាមសិលាចារឹកភាសាចាមដែលលោកបានស្រាវជ្រាវនៅប្រាសាទអង្គរវត្ត គឺវាត្រូវបានគេចារនៅឆ្នាំ ១៨៨១ នៃគ.ស។ ប៉ុន្តែអ្វីដែលសាធារណជនមិនទាន់ដឹងច្បាស់នោះ ថាតើក្រុមណាដែលជាអ្នកមកចារ មកពីណា និងចារក្នុងបំណងអ្វីនៅពេលនោះជាដើម។ លោកបន្ថែមថា «តាមពិតមានអ្នកស្រាវជ្រាវជាច្រើនបានធ្វើការងារលើសិលាចារឹកអក្សរចាមនេះ ភាគច្រើនជាជនជាតិបារាំង ព្រោះពួកគេមានលទ្ធភាពយល់ភាសាចាម។ តាមរយៈបទបង្ហាញនៅពុទ្ធសាសនបណ្ឌិត្យនេះ ខ្ញុំ ឡឹប កើ នឹងសាកល្បងបកស្រាយនូវចម្ងល់ខាងលើជាសង្ខេបៗតាមសេចក្ដីដែលបានរកឃើញកន្លងមក»៕
© រក្សាសិទ្ធិដោយ thmeythmey.com