ជាតិ
សេដ្ឋកិច្ច
×![]()
ដោយ: ភួង វ៉ាន់ថា
ភ្នំពេញ៖ឥណ្ឌូណេស៊ី នឹងរៀបចំតាំងពិព័រណ៍៣ថ្ងៃ នៅកម្ពុជា ក្រោមប្រធានបទ «ផ្សារភ្ជាប់ទំនាក់ទំនងរវាងប្រជាជន និងធុរកិច្ច»។ក្រុមហ៊ុនចំនួន ៤៥ និងសាកលវិទ្យាល័យល្បីៗ១៤ មកពីប្រទេសឥណ្ឌូណេស៊ី នឹងចូលរួមក្នុងពិព័រណ៍ពាណិជ្ជកម្មទេសចរណ៍ឥណ្ឌូណេស៊ី ដែលរៀបចំនៅមជ្ឈមណ្ឌលកោះពេជ្រ ចាប់ពីថ្ងៃទី២៨ ដល់៣០ ខែកញ្ញា ឆ្នាំ២០១៨ ខាងមុខ។
នៅក្នុងពិព័រណ៍ដែលមានរយៈពេល៣ថ្ងៃនេះ ក្រុមហ៊ុនទាំង៤៥ នឹងដាក់តាំងបង្ហាញផលិតផល រួមជាមួយសេវាកម្មផ្សេងៗមានដូចជា សិប្បកម្ម សម្លៀកបំពាក់បាទិក ម្ហូបអាហារ ភេសជ្ជៈ ការអប់រំ ទេសចរណ៍ និងទំនិញផ្សេងៗ។ ការតាំងពិព័រណ៍នេះក៏មានការប្រគំតន្ត្រី ដល់ប្រជាជនកម្ពុជាទស្សនាផងដែរ។ ក្រៅពីនេះក៏មានតំណាងមកពីសាកលវិទ្យាល័យចំនួន១៤ ធ្វើបទបង្ហាញពីកម្មវិធីសិក្សា ព័ត៌មានអាហារូបករណ៍ និងពិគ្រោះយោបល់ដល់សិស្ស-និស្សិត ដែលមានបំណងទៅសិក្សានៅប្រទេសឥណ្ឌូណេស៊ីផងដែរ។
អ្នកស្រី Avi Dewani Sari Harahap លេខាទី១នៃការិយាល័យពាណិជ្ជកម្មឥណ្ឌូណេស៊ីប្រចាំនៅកម្ពុជាបានលើកឡើងថា ពិព័រណ៍ពាណិជ្ជកម្មនេះ មិនត្រឹមតែជួយពង្រឹងទំនាក់ទំនងរវាងប្រទេសទាំងពីរ ឲ្យកាន់តែល្អប្រសើរប៉ុណ្ណោះទេ វាក៏ជាឱកាសជំនួបរវាងសហគ្រិនកម្ពុជា និងឥណ្ឌូណេស៊ី ក្នុងការធ្វើកិច្ចសហប្រតិបត្តិការទៀតផង។ អ្នកស្រីថ្លែងបែបនេះ នៅក្នុងសន្និសីទសារព័ត៌មាននៅថ្ងៃទី១៩ ខែកញ្ញា នៅស្ថានទូតឥណ្ឌូណេស៊ី។
បើតាមលោកស្រី Avi Dewani Sari Harahap ក្រុមហ៊ុនឥណ្ឌូណេស៊ីដែលកំពុងវិនិយោគនៅកម្ពុជា មានទំហំទឹកប្រាក់ចំនួន៥០០លានដុល្លារ ខណៈកម្ពុជាវិនិយោគនៅប្រទេសឥណ្ឌូណេស៊ីមានទំហំទឹកប្រាក់ចំនួន២៨លានដុល្លារ។ ភាពខុសគ្នានេះ ត្រូវបានលេខាទី១ ខាងលើបញ្ជាក់ថា រដ្ឋាភិបាលទាំង២កំពុងខិតខំជំរុញឲ្យមានការកើនឡើង។
លេខាទី១នៃការិយាល័យពាណិជ្ជកម្មឥណ្ឌូណេស៊ីប្រចាំនៅកម្ពុជា បានបញ្ជាក់ដូច្នេះថា៖« ភាពខុសគ្នាឆ្ងាយ ដូច្នេះបានជារាជរដ្ឋាភិបាលទាំងពីរកំពុងជួយជំរុញឲ្យមានភាពស្មើគ្នា ឬខុសគ្នាបន្តិចបន្ទួច នេះវានៅឆ្ងាយពេក អ៊ីចឹងនៅក្នុងការតាំងពិព័រណ៍នឹងជំរុញឲ្យមានកំណើនទំនាក់ទំនងល្អ ជាពិសេសបង្ហាញពាណិជ្ជករកម្ពុជាអាចបង្ហាញ ឬណែនាំដល់ពាណិជ្ជករឥណ្ឌូណេស៊ីពីផលិតផលកម្ពុជា យើងមានផលិតផលអ្វី ដែលអាចនាំចូលទៅប្រទេសឥណ្ឌូណេស៊ីបាន។
ប្រទេសឥណ្ឌូណេស៊ីបានរៀបចំពិព័រណ៍ពាណិជ្ជកម្ម និងទេសចរណ៍ចំនួន១២លើកហើយ នៅក្នុងប្រទេសកម្ពុជា ពោលគឺការតាំងពិព័រណ៍នេះ បានធ្វើឡើងចាប់ពីតាំងពីឆ្នាំ២០០៦មកម្ល៉េះ៕
Tag:
កម្ពុជា
ឥណ្ឌូណេស៊ី
© រក្សាសិទ្ធិដោយ thmeythmey.com
