ជាតិ
នយោបាយជាតិ
ក្នុងថ្ងៃរម្លឹកខួបរដ្ឋធម្មនុញ្ញ មេដឹកនាំកម្ពុជា ប្តេជ្ញាថា មិនឲ្យបដិវត្តពណ៌ កើតឡើងជាដាច់ខាត
× ភ្នំពេញ៖ អ្នកណាក៏ដោយ កុំសង្ឃឹមថា អាចបះបោរ ឬផ្តួលរំលំរដ្ឋាភិបាលកម្ពុជាបានឲ្យសោះ។ នេះជាការប្តេជ្ញាយ៉ាងមោះមុតរបស់នាយករដ្ឋមន្ត្រីកម្ពុជា ដែលធ្វើឡើងចំថ្ងៃរម្លឹកខួបនៃការប្រកាសឲ្យប្រើប្រាស់រដ្ឋធម្មនុញ្ញ។
ថ្ងៃនេះ ជាទិវារម្លឹកខួប២៥ឆ្នាំ នៃការប្រកាសឲ្យប្រើប្រាស់រដ្ឋធម្មនុញ្ញកម្ពុជា។ វា ក៏ជាការរម្លឹកខួប២០ឆ្នាំ នៃការប៉ុនប៉ងធ្វើឃាតសម្តេចនាយករដ្ឋមន្ត្រី សម្តេច ហ៊ុន សែន ផងដែរ។
តាមរយៈសារ ដែលសរសេរលើទំព័រហ្វេសប៊ុក សម្តេច ហ៊ុន សែន បានរៀបរាប់ពីព្រឹត្តិការណ៍គួរឲ្យរន្ធត់នាពេលនោះថា នៅម៉ោង៨និង៥២នាទី ថ្ងៃទី២៤ ខែកញ្ញា ឆ្នាំ១៩៩៨ មានគ្រាប់រ៉ុកែតបេ៤០ មួយគ្រាប់ក្នុងចំណោម៤គ្រាប់ បានហោះសំដៅទៅរថយន្តរបស់សម្តេច។ ប៉ុន្តែ គ្រាប់រ៉ុកែត មិនបានត្រូវរថយន្តរបស់សម្តេចទេ តែបានហោះទៅត្រូវផ្ទះប្រជាជន ដែលបណ្តាលឲ្យប្រជាជនម្នាក់ស្លាប់ និងម្នាក់ទៀត រងរបួសធ្ងន់។
មេដឹកនាំកម្ពុជា បានបន្តថា គម្រោងធ្វើឃាតនាពេលនោះ ត្រូវបានធ្វើឡើង ស្របពេលដែលខ្លួន ធ្វើដំណើរទៅប្រជុំសភានីតិកាលទី២ នៅព្រះរាជដំណាក់ ក្នុងទីក្រុងសៀមរាប ក្រោមព្រះរាជអធិបតីភាពសម្តេចព្រះ នរោត្តម សីហនុ។ ប្រមុខរដ្ឋាភិបាល បានប្រាប់បែបនេះថា៖«ប្រសិនបើ ពេលនោះ គ្រាប់រ៉ុកែតទាំង៤គ្រាប់ ផ្ទុះព្រមគ្នាទាំងអស់ ឬព្រឹកនោះ មិនមានភ្លៀងធំស្ទើរបាក់មេឃ ដែលធ្វើឲ្យខ្សែភ្លើងបញ្ជាគ្រាប់ទាំងនេះ ឆ្លងទឹកនោះទេ ប្រហែលជាជីវិតខ្ញុំ ត្រូវចប់តាំងពីពេលនោះ មកហើយ»។
នាយករដ្ឋមន្ត្រីកម្ពុជា ជឿលើផ្លូវងងឹត ដូចជាទេវតា បារមីព្រះអង្គចេក និងព្រះអង្គចម ជាដើម ថាបានជួយជីវិតខ្លួនឲ្យរួចផុតពីការធ្វើឃាត។ ប្រមុខរដ្ឋាភិបាល សុខចិត្តបញ្ឈប់ការស្រាវជ្រាវរកអ្នកដែលរៀបគម្រោងធ្វើឃាត តែប្តេជ្ញាយ៉ាងខ្លាំងក្លាថា មិនអនុញ្ញាតឲ្យអ្នកណា មកបំផ្លាញប្រទេសជាដាច់ខាត។
សម្តេច ហ៊ុន សែន បានបញ្ជាក់បែបនេះថា៖«ខ្ញុំ បានអហោសិកម្មឲ្យអ្នកដែលចង់សម្លាប់ខ្ញុំ នៅខេត្តសៀមរាបរួចហើយ បើទោះជាខ្ញុំមានពន្លឺក្នុងការស្រាវជ្រាវក៏ដោយ។ តែ អ្នកត្រូវដឹងថាពេលណា ខ្ញុំនៅកាន់តំណែងជានាយករដ្ឋមន្ត្រី ខ្ញុំមិនឲ្យពួកអ្នកសម្លាប់ខ្ញុំបានទេ មិនឲ្យពួកអ្នក ធ្វើរដ្ឋប្រហារ ឬធ្វើបដិវត្តពណ៍បានទេ។ ទោះជាតម្លៃណាក៏ដោយ ខ្ញុំត្រូវការពារសន្តិភាព និងការពារជីវិតប្រជាជនកម្ពុជា ឲ្យខានតែបាន»។
តាមការពិតទៅ កន្លងមក មេដឹកនាំកម្ពុជា ដែលកាន់អំណាចរាប់ទសវត្សរ៍រូបនេះ ក៏ធ្លាប់និយាយដែរ អំពីការការពាររដ្ឋធម្មនុញ្ញ និងការទប់ស្កាត់មិនឲ្យមានបដិវត្តពណ៌ ជាពិសេសចាប់តាំងពីអតីតគណបក្សសង្គ្រោះជាតិ រងការចោទប្រកាន់ថា មានគម្រោងផ្តួលរំលំរដ្ឋាភិបាល។ ក្រោមហេតុផលថាខ្លាចមានបដិវត្តពណ៌កើតឡើង រដ្ឋាភិបាលកម្ពុជា ក៏ប្តឹងឲ្យតុលាការរំលាយគណបក្សប្រឆាំងចោល និងបានឃាត់ខ្លួនប្រធានគណបក្សនេះ កាលពីចុងឆ្នាំ២០១៧៕
Tag:
ហ៊ុន សែន
រដ្ឋធម្មនុញ្ញ
© រក្សាសិទ្ធិដោយ thmeythmey.com