ឆ្នាំ ២០០៣ ជាពេលចុងក្រោយបង្អស់ដែលលោក មហាធៀ មហាម៉ាត់ ថ្លែងសុន្ទរកថាទៅកាន់មហាសន្និបាតអង្គការសហប្រជាជាតិ (UNGA) ក្នុងនាមជានាយករដ្ឋមន្ត្រីម៉ាឡេស៊ីទីបួន មុនពេលលោកចូលនិវត្តន៍ពីឆាកនយោបាយ។ ១៥ឆ្នាំក្រោយ មេដឹកនាំវ័យ ៩៣ឆ្នាំរូបនេះបង្ហាញមុខជាថ្មីទៀតនៅមហាសន្និបាតក្នុងនាមនាយករដ្ឋមន្ត្រីទី ៧ម្តង។
នៅថ្ងៃសុក្រទី ២៨ ខែកញ្ញាខាងមុខនេះនាយករដ្ឋមន្ត្រីម៉ាឡេស៊ី មហាធៀ មហាម៉ាត នឹងផ្តល់សុន្ទរកថា តំណាងប្រជាជាតិម៉ាឡេស៊ី ទៅកាន់កិច្ចប្រជុំមហាសន្និបាតអង្គការសហប្រជាជាតិលើកទី ៧៣ ស្ថិតនៅទីក្រុងញូវយ៉ក ។
គិតទៅ វាមានរយៈពេល ១៥ឆ្នាំគត់ ចាប់ពីពេលដែលលោកបង្ហាញមុខក្នុងកិច្ចប្រជុំពេញអង្គការសហប្រជាជាតិនេះ។ ពេលនោះ វាមានរយៈពេលត្រឹមមួយខែប៉ុណ្ណោះមុនពេលដែលបុរសរដ្ឋម៉ាឡេស៊ីរូបនេះដើរចេញពីនយោបាយក្រោយក្តោបក្តាប់អំណាចអស់ពេល ២២ឆ្នាំ។
ក្នុងឆ្នាំអង្គប្រជុំឆ្នាំ ២០០៣នោះដែរ លោក មហាធៀ បានថ្លែងប្រឆាំងនឹងអនុត្តរភាពរបស់ប្រទេសមហាអំណាច និងប្រទេសអ្នកមានដែលតែងបង្ខិតបង្ខំប្រទេសទន់ខ្សោយឲ្យធ្វើតាមខ្លួន។ លោកក៏បានអំពាវនាវឲ្យមានការកែទម្រង់អង្គការសហប្រជាជាតិដែរ ព្រោះលោកជឿជាក់ថាអង្គការអន្តររដ្ឋាភិបាលនេះកំពុងដើរលើផ្លូវដែលខុសពីគោលដៅនៅពេលបង្កើតឡើងក្រោយចប់សង្គ្រាមលោកលើកទីពីរ។
ចំណែក នៅក្នុងមហាសន្និបាតឆ្នាំនេះ មូលបទនៃការជជែកដេញដោលគឺ «ការធ្វើឲ្យអង្គការសហប្រជាជាតិទាក់ទងនឹងប្រជាជន៖ ភាពជាអ្នកដឹកនាំសាកល និងការចែករំលែកការទទួលខុសត្រូវដើម្បីសន្តិភាព សមធម៌ និងសង្គមដែលមាននិរន្តរភាព»។
សារព័ត៌មានម៉ាឡេស៊ី The Star ចុះផ្សាយថា លោក មហាធៀ នឹងថ្លែងសុន្ទរកថាទៅកាន់មហាសន្និបាតនៅថ្ងៃសុក្រទី ២៨ ខែកញ្ញានេះក្នុងនាមជានាយករដ្ឋមន្ត្រីទីប្រាំពីរ។ ហើយបើតាមដ្ឋមន្ត្រីការបរទេសម៉ាឡេស៊ី Saifuddin Abdullah លោក មហាធៀ នឹងពាំនាំយកគោលនយោបាយការបរទេសនៃរដ្ឋាភិបាលម៉ាឡេស៊ីថ្មីទៅក្នុងវេទិកាអន្តរជាតិនេះ។
ក្រៅពីនេះ លោកក៏ប្រហែលជានឹងបន្តយកវេទិកានេះលើកឡើងពីបញ្ហាប្រឈមពិភពលោក ក៏ដូចជា រិះគន់មិនសំចៃមាត់លើឥរិយាបថរបស់រដ្ឋក្នុងកិច្ចការអន្តរជាតិដូចមុនៗដែរ។ ករណីនេះគឺជារឿងសាមញ្ញដ្បិតលោកធ្លាប់ធ្វើបែបនេះតាំងពីលោកធ្វើជានាយករដ្ឋមន្ត្រីពីឆ្នាំ ១៩៨១ ដល់ឆ្នាំ ២០០៣នោះ។
«រឿងដែលខ្ញុំអាចធានាបានចំពោះអ្នកបានតាមដានសុន្ទរកថាលោក មហាធៀ គឺថា លោកនឹងបន្តនិយាយពីបញ្ហាប្រឈមសាកលលោកជាពិសេសសាកលភាវូបនីយកម្ម។ យើងមិនចង់និយាយពីបញ្ហាដែលកើតឡើងពីអតីតកាលឡើយ ប៉ុន្តែខ្ញុំគិតថា អ្វីដែលសំខាន់បំផុតគឺ រដ្ឋាភិបាលម៉ាឡេស៊ីចង់បានទំនាក់ទំនងដែលមានតុល្យភាពក្នុងទំនាក់ទំនងជាមួយប្រទេសទាំងអស់រួមទាំងជាមួយមហាអំណាចផង»។ រដ្ឋមន្ត្រីការបរទេសម៉ាឡេស៊ីនិយាយដូច្នេះ។
ប្រមុខការទូតម៉ាឡេស៊ីរូបនេះបានបញ្ជាក់ផងដែរថា ក្នុងដំណើរទៅចូលរួមមហាសន្និបាតអង្គការសហប្រជាជាតិនេះ ក្រៅពីរូបលោកផ្ទាល់ លោក មហាធៀ នឹងត្រូវអមដំណើរដោយស្ត្រីទីមួយលោកស្រីវេជ្ជបណ្ឌិត ស៊ីទី ហាស្មា, រដ្ឋមន្ត្រីការពារជាតិ Mohamad Sabu, រដ្ឋមន្ត្រីសុខាភិបាល Dzulkefly និងមន្ត្រីជាន់ខ្ពស់មួយចំនួនទៀតដែរ។
លោកនឹងអញ្ជើញជួបពិភាក្សាទ្វេភាគីជាមួយមេដឹកនាំពិភពលោកផ្សេងទៀតជាច្រើននាក់នៅក្រៅកិច្ចប្រជុំអង្គការសហប្រជាជាតិ និងផ្តល់សុន្ទរកថាជាច្រើនផ្សេងទៀតទៅកាន់មជ្ឈមណ្ឌលស្រាវជ្រាវ US Council on Foreign Relations ជុំវិញទំនាក់ទំនងរវាងម៉ាឡេស៊ីជាមួយអាមេរិក និងប្រទេសផ្សេងទៀតក្នុងតំបន់។