ក្រុមហ៊ុនយក្ស Microsoft, Amazon, Google សហការគ្នាប្រើបច្ចេកវិទ្យាជួយប្រទេសក្រីក្រដោះស្រាយគ្រោះទុរភិក្ស

អន្តរជាតិ

ក្រុមហ៊ុនយក្ស Microsoft, Amazon, Google សហការគ្នាប្រើបច្ចេកវិទ្យាជួយប្រទេសក្រីក្រដោះស្រាយគ្រោះទុរភិក្ស

24, Sep 2018 , 9:59 pm

រូបភាព

រូបភាព AFP

ដោយ: ថ្មីៗ

ក្រុមហ៊ុនបច្ចេកវិទ្យាយក្សចំនួនបីមានដូចជា Microsoft, Amazon និង Google បានព្រមព្រៀងសហការគ្នាជាមួយបណ្តាអង្គការអន្តរជាតិដើម្បីស្វែងរកដំណោះស្រាយជួយប្រទេសកំពុងអភិវឌ្ឍដោះស្រាយបញ្ហាគ្រោះទុរភិក្ស។ ក្រុមហ៊ុនទាំងនេះផ្តោតលើការវិភាគទិន្នន័យ និងប្រើបញ្ញាសិប្បនិម្មិត (AI) ដែលជាគំនិតផ្តួចផ្តើមថ្មីពឹងផ្អែកលើបច្ចេកវិទ្យាជាចម្បង។

គំនិតផ្តួចផ្តើមថ្មីរួមគ្នារបស់បណ្តាក្រុមហ៊ុនបច្ចេកវិទ្យាធំៗបីនេះដោយសហការជាមួយស្ថាប័នអន្តរជាតិដូចជាអង្គការសហប្រជាជាតិនិងធនាគារពិភពលោកនេះមានឈ្មោះថា យន្តការសកម្មភាពឆ្លើយតបនឹងគ្រោះទុរភិក្ស (FAM)។ វាត្រូវបានគេបង្កើតឡើងដើម្បីឆ្លើយតបនឹងកំណើនគ្រោះទុរភិក្សដែលបន្តឆក់យកជីវិតមនុស្សអស់ជាច្រើននាក់នៅទូទាំងពិភពលោកជាពិសេសប្រទេសក្រីក្រ។

យោងតាមការចុះផ្សាយរបស់ទីភ្នាក់ងារព័ត៌មាន AFP ក្នុងសេចក្តីថ្លែងការណ៍រួមចុះផ្សាយនៅថ្ងៃអាទិត្យទី ២៣ ខែកញ្ញា តំណាងធនាគារពិភពលោក និងអង្គការសហប្រជាជាតិបានប្រកាសថា គំនិតផ្តួចផ្តើមថ្មីពឹងផ្អែកលើបច្ចេកវិទ្យានេះ គឺ ប្រើប្រាស់ទិន្នន័យដើម្បីប្រមែរប្រមូលហិរញ្ញវត្ថុ និងទស្សនទាយជាមុនពីគ្រោះថ្នាក់ដើម្បីឈានទៅដាក់ចេញសកម្មភាពទប់ស្កាត់គ្រោះមហន្តរាយ។

ប្រធានធនាគារពិភពលោកលោក Jim Yong Kim បានថ្លែងក្នុងសេចក្តីថ្លែងការណ៍រួមដូច្នេះ៖«តាមរបាយការណ៍ជាក់ស្តែងមនុស្សរាប់លាននាក់ក្នុងនោះមានកុមារភាគច្រើនបានរងគ្រោះដោយសារកង្វះអាហារូបត្ថម្ភធ្ងន់ធ្ងរ និងគ្រោះទុរភិក្សក្នុងសតវត្សទី ២២ ដែលវាជាសោកនាកម្មពិភពលោក។ យើងកំពុងបង្កើតសម្ព័ន្ធអន្តរជាតិដែលមិនធ្លាប់មានដើម្បីដោះស្រាយបញ្ហានេះ»។

យន្តការ FAM នឹងដើរតួនាទីសំខាន់ក្នុងការផ្តល់សញ្ញាប្រកាសអាសន្នពាក់ព័ន្ធគ្រោះមហន្តរាយក្នុងផ្នែកស្បៀងអាហារដែលអាចនាំឲ្យមានគ្រោះទុរភិក្សជាដើម ហើយមិនត្រឹមតែប៉ុណ្ណោះយន្តការនេះក៏ជំរុញឲ្យមានការរៀបចំកញ្ចប់មូលនិធិដែលអនុញ្ញាតឲ្យមានការអន្តរាគមន៍បានឆាប់រហ័សដែរ។

ប្រធានក្រុមហ៊ុន Microsoft លោក Brad Smith ជឿជាក់ថា ការទស្សន៍ទាយជាមុនដោយប្រើប្រាស់ទិន្នន័យ និងបញ្ញាសិប្បនិម្មិតដើម្បីឲ្យដឹងមុនថា គ្រោះទុរភិក្សនឹងកើតឡើងនៅទីណានោះ អាចឲ្យស្ថាប័នជំនាញអន្តរាគមន៍បានយ៉ាងមានប្រសិទ្ធភាព និងសង្គ្រោះជីវិតមនុស្សបានច្រើនថែមទៀត។

កាលពីឆ្នាំមុន មនុស្សមិនតិចជាង ២០លាននាក់ឡើយដែលបានរងគ្រោះដោយសារគ្រោះមហន្តរាយធម្មជាតិធ្ងន់ធ្ងរជាពិសេសគ្រោះទុរភិក្ស។ ពួកគេរស់នៅក្នុងប្រទេសនីហ្សេរីយ៉ា, សូម៉ាលី, ស៊ូដង់ខាងត្បូងនិងយេម៉ែន។

ចំណែកប្រជាជន ១២៤ លាននាក់ផ្សេងទៀតក៏កំពុងស្ថិតក្នុងស្ថានភាពគ្រោះថ្នាក់ដោយសារបញ្ហាអសន្តិសុខស្បៀងផង។ វាចាំបាច់ត្រូវមានការដាក់ចេញវិធានការបន្ទាន់ និងរៀបចំការឆ្លើយតបមនុស្សធម៌ផងដើម្បីធានាថា គ្រោះមហន្តរាយមនុស្សជាតិមិនអាចកើតឡើងនៅពេលខាងមុខនោះ៕