ជាតិ
សុខភាព
ភ្ជុំបិណ្ឌ៖ក្រសួងសុខាភិបាលប្រាប់ពលរដ្ឋឲ្យប្រយ័ត្នចំពោះការពិសាស្រា និងចំណីអាហារ
× ភ្នំពេញ៖ ក្រសួងសុខាភិបាល បានប្រាប់ឲ្យប្រជាពលររដ្ឋ ប្រុងប្រយ័ត្នចំពោះការបរិភោគចំណីអាហារ និងការពិសាស្រា នាអំឡុងពេលបុណ្យភ្ជុំនេះ។ ការណែនាំនេះ គឺដោយសារក្រសួងបារម្ភរឿងពុលចំណីអាហារ ដោយសារកន្លងមក មានអ្នកស្លាប់ ដោយសារតែការពុលចំណីអាហារ និងពុលស្រា ឬស្រាថ្នាំកន្លងមកនេះ ព្រោះតែទុកដាក់ចំណីអាហារមិនត្រឹមត្រូវ និងផ្ទុកសារធាតុមេតាណុលខ្ពស់ ដែលបណ្តាលឲ្យ ក្អួត ចង្អោរ រាកមូល ថប់ដង្ហើម សន្លប់ វិលមុខ និងបាត់បង់អាយុជីវិតជាដើម។
សេចក្តីជូនព័ត៌មាន ចេញផ្សាយនៅថ្ងៃទី២៥ កញ្ញា លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បញ្ជាក់ថា ការពុលចំណីអាហារភាគច្រើន បណ្តាលមកពីការរៀបចំអាហារមិនមានអនាម័យល្អ ទាំងនៅក្នុងចំណីអាហារ និងការរៀបចំទុកដាក់។ ចំណែកការពុលស្រា បណ្តាលមកពី ការផលិត ឬបិតមិនត្រឹមត្រូវតាមបច្ចេកទេស និងមានផ្ទុកសារធាតុមេតាណុលកម្រិតខ្ពស់ ដែលនាំឲ្យប៉ះពាល់ដល់អាយុជីវិត។
ដើម្បីការពារសុខភាព និងជៀសផុតពីការពុលចំណី ឬជំងឺឆ្លងផ្សេងៗ រដ្ឋមន្ត្រីក្រសួងសុខាភិបាលរូបនេះ បានណែនាំវិធានការពារមួយចំនួនដល់សាធារណជន ដូចជាត្រូវលាងដៃជាមួយសាប៊ូ, លាងសំអាតបន្លែផ្លែឈើឲ្យបានស្អាត,ចង្អិនអាហារឲ្យបានឆ្អិនល្អ ជាពិសេស សាច់ជ្រូក,ស៊ុត និងគ្រឿងសមុទ្រជាដើម, ទុកដាក់អាហារឆៅ និងឆ្អិនឲ្យនៅដោយឡែកពីគ្នា និងកុំបរិភោគចំណីអាហារណាដែលហួសកាលបរិច្ឆេទ។
ក្នុងសេចក្តីជូនព័ត៌មានដដែល លោក ម៉ម ប៊ុនហេង បានលើកឡើងដូច្នេះថា៖«សូមពលរដ្ឋ ជាពិសេសមនុស្សពេញវ័យ បញ្ឈប់ពិសារស្រា«ស» ឬស្រាថ្នាំ ដែលទិញពីប្រភពមិនច្បាស់លាស់ និងគ្មានការផលិតត្រឹមត្រូវ និងសូមពិសារគ្រឿងស្រវឹងក្នុងកម្រិតតិចតួច និងហាមពិសារស្រាក្នុងពេលបើកបរ ឬបញ្ជាគ្រឿងម៉ាស៊ីន ហើយរួមគ្នាការពារ និងជៀសវាងការគ្រោះថ្នាក់ដ៏សាមញ្ញាមួយចំនួន ដោយសារពុលចំណីអាហារ និងស្រាជាយថាហេតុ»។
យោងតាមរបាយការណ៍របស់ក្រសួងសុខាភិបាល នៅឆ្នាំ២០១៧កន្លងទៅ មានករណីពុលស្រា ១៣ករណី ស្លាប់២ នាក់នៅខេត្តមណ្ឌលគីរី។ ឯឆ្នាំ២០១៦ មានចំនួន ៩២ករណី ក្នុងនោះស្លាប់១៥នាក់។ ដោយឡែក ក្នុងឆ្នាំ២០១៥ មានករណីពុលស្រាចំនួន ២៨៤ករណី សម្លាប់មនុស្សអស់ ៣៣នាក់ ក្នុងខេត្តចំនួន៣ គឺ ត្បូងឃ្មុំ, ក្រចេះ និងមណ្ឌលគីរី៕
Tag:
ក្រសួងសុខាភិបាល
ស្រា
ចំណីអាហារ
ម៉ម ប៊ុនហេង
© រក្សាសិទ្ធិដោយ thmeythmey.com