ជាតិ
ត្រីប្រាកណ្តុរ រងផលប៉ះពាល់តិចតួចពីទំនប់វារិអគ្គិសនី ជាងប្រភេទត្រីដទៃ
ត្រីប្រាកណ្តុរ ។ រូបភាព៖ https://ffish.asia/ Bounthob Praxaysombath
×![]()
គម្រោងអច្ឆរិយភាពនៃទន្លេមេគង្គ (Wonders of the Mekong) សូមណែនាំត្រីអត់ស្រកាមួយប្រភេទ ដែលបានរស់នៅក្នុងទន្លេសាប បឹងទន្លេសាប ទន្លេមេគង្គ ព្រមទាំងដៃរបស់ទន្លេមេគង្គផងដែរ ដូចជានៅទន្លេសេកុង ទន្លេសេសាន និងទន្លេស្រែពកជាដើម។
ត្រីប្រាកណ្តុរ ជាប្រភេទត្រីទឹកសាប មានឈ្មោះវិទ្យាសាស្ត្រ (Helicophagus leptorhynchus) និងឈ្មោះជាភាសាអង់គ្លេស Rat-faced pangasiid មានរស់នៅពាសពេញទន្លេចៅប្រាយ៉ា និងក្នុងអាងទន្លេមេគង្គ ភាគកណ្តាល និងភាគខាងក្រោម នៃតំបន់អាស៊ីអាគ្នេយ៍ ក្នុងប្រទេសកម្ពុជា ឡាវ ថៃ និងវៀតណាម។
ត្រីប្រាកណ្តុរ គឺជាប្រភេទត្រីដែលមិនធ្វើចរាចរផ្លាស់ទីចូលទៅក្នុងតំបន់ទំនាបលិចទឹក។ ផ្ទុយទៅវិញ នៅពេលដែលកម្ពស់ទឹកចាប់ផ្តើមឡើងក្នុងរដូវទឹកជំនន់ ត្រីប្រភេទនេះ ក៏ធ្វើចរាចរផ្លាស់ទីឆ្ពោះទៅខ្សែទឹកខាងលើនៃតំបន់អាងទឹកជ្រៅ និងធ្វើចរាចរចុះមកខ្សែទឹកខាងក្រោមវិញ នាចុងរដូវទឹកជំនន់ ពោលគឺនៅពេលទឹកទន្លេរងថ្លា។ វាស៊ីពពួកគ្រុំ លៀស ខ្យង ខ្ចៅជាអាហារ។ ដោយសារត្រីប្រាកណ្តុរ ជាប្រភេទត្រីដែលធ្វើចរាចរក្នុងចម្ងាយជិត និងមធ្យម ដូច្នេះវាមិនសូវងាយរងគ្រោះដោយសារទំនប់វារិអគ្គិសនី ដូចប្រភេទត្រីដទៃទៀតឡើយ។ ក៏ប៉ុន្តែ គេគួរមានការសិក្សាស្រាវជ្រាវបន្ថែមទៀត ទៅលើរបបទឹកហូរប្រចាំឆ្នាំនៅក្នុងអាងទឹកជ្រៅ និងជម្រកសំខាន់ៗជាច្រើនទៀត ដែលវារស់នៅ។
ដោយពុំមានព័ត៌មាន និងទិន្នន័យគ្រប់គ្រាន់ វាត្រូវបានគេកត់ត្រាចូលក្នុងបញ្ជីក្រហម IUCN Red List (Data Deficient )។ ការសាងសង់ទំនប់វារិអគ្គិសនីនៅតាមដងទន្លេមេ និងដៃទន្លេធំៗ អាចបំផ្លាញ និងផ្លាស់ប្តូរទីជម្រករបស់មច្ឆាប្រភេទនេះបាន ជាពិសេស ប្រសិនបើមានការសាងសង់ទំនប់វារិអគ្គិសនីច្រើនបន្តគ្នារដឹក។ ទោះយ៉ាងណា ត្រីប្រាកណ្តុរ ត្រូវបានគេចាត់ទុកថា វាងាយរងគ្រោះដោយការបំពុលបរិស្ថាន៕
© រក្សាសិទ្ធិដោយ thmeythmey.com
