ជាតិ
កវីតែងកំណាព្យ៣រូប ជាប់ជ័យលាភីតែងនិពន្ធ នៃទិវាគ្រូបង្រៀន
× ភ្នំពេញ៖ កវីតែងកំណាព្យចំនួន៣រូប បានជាប់ជ័យលាភី ក្នុងការប្រកួតប្រជែងស្មូតកំណាព្យ និងតែងនិពន្ធ អបអរសាទរទិវាគ្រូបង្រៀន៥តុលា២០១៨ ក្រោមប្រធានបទ “គុណភាពគ្រូបង្រៀនជាគុណភាពមូលធនមនុស្សសម្រាប់ការអភិវឌ្ឍដោយចិរភាព” ដែលរៀបចំដោយ ក្រសួងអប់រំយុវជននិងកីឡា។កវីទាំង៣រូបនោះ គឺមានលោក ស៊ុយ វ៉ាន់សាក់ ជ័យលាភីលេខ១ លោក ប៉ាល់ សុខុម ជ័យលាភីលេខ២ និងលោក សែម ពណ្ណរាយ ជ័យលាភីលេខ៣។
“គុណតម្លៃនៃគ្រូបង្រៀន” ជាចំណងជើងកំណាព្យរបស់កវី ស៊ុយ វ៉ាន់សាក់ ដែលទទួលបានជ័យលាភីលេខ១។ កំណាព្យនេះនិយាយពីគុណតម្លៃរបស់គ្រូបង្រៀន ដែលប្រឹងប្រែងបង្កើតឱ្យមានធនធានមនុស្សគ្រប់វិស័យនៅក្នុងប្រទេស និងបង្ហាញពីការដឹងគុណរបស់សិស្សទៅកាន់គ្រូផងដែរ។ ទោះជាគ្រូបានជួយបង្កើតធនធានមនុស្សច្រើនយ៉ាងណាក្ដី តែក្នុងកំណាព្យក៏មិនភ្លេចរំលេចឱ្យឃើញថា គ្រូក៏នៅតែត្រូវការការសិក្សារៀនសូត្ររហូត ដើម្បីបង្កើនសមត្ថភាពរាល់ថ្ងៃដែរ។ ថ្លែងប្រាប់សារព័ត៌មានថ្មីៗ លោក ស៊ុយ វ៉ាន់សាក់ បញ្ជាក់ដូច្នេះថា៖« ក្នុងកំណាព្យនេះខ្ញុំសរសេររៀបរាប់ពីធនធានមនុស្ស មានពេទ្យ មន្ត្រីរាជការ អ្នកធ្វើការធំតូច អ្នកប្រាជ្ញ បណ្ឌិត គ្រប់យ៉ាង គឺបានពីគ្រូ ហើយធនធានទាំងនេះគួរជួយសង្គមយ៉ាងណាខ្លះ។ ខ្ញុំក៏បង្ហាញឱ្យឃើញថា សិស្សគួរតែដឹងគុណគ្រូដែរ»។
ចំណែកកវី ប៉ាល់ សុខុម ទទួលបានជ័យលាភីលេខ២ ដែលសរសេរកំណាព្យ “គុណភាពគ្រូបង្រៀនបង្កើតធនធានអភិវឌ្ឍន៍” បានរៀបរាប់អត្ថន័យពីការតម្កើងគុណសម្បត្តិរបស់គ្រូបង្រៀន។ “សង្គមខ្ពង់ខ្ពស់ព្រោះមានគ្រូ ធ្វើជាគំរូស៊ូស្មោះស សិស្សក្លាយជាពលរដ្ឋបវរ រៀនសូត្របន្តកសាងជាតិ”។ នេះជាខ្លឹមសារខ្លះស្រង់ចេញពីកំណាព្យជ័យលាភីលេខ២នេះ។
កំណាព្យទាំងមូលរបស់លោក ប៉ាល់ សុខុម គឺបានរៀបរាប់បង្ហាញឱ្យឃើញពីប្រទេសជាតិមួយអាចរីកចម្រើនបាន ក៏អាស្រ័យពលរដ្ឋមានចំណេះដឹង ហើយចំណេះទាំងនោះក៏បានពីគ្រូដែរ។ « ក្នុងអត្ថន័យទាំងមូល បង្ហាញពីគុណសម្បត្តិរបស់គ្រូ ដែលមិនអាចខ្វះបានក្នុងសង្គម»។ នេះជាការបញ្ជាក់របស់លោក ប៉ាល់ សុខុម។
ចំណែកជ័យលាភី លេខ៣ របស់កវី សែម ពណ្ណរាយ មានចំណងជើងថា”លក្ខណៈសម្បត្តិគ្រូបង្រៀនក្នុងសតវត្សរ៍ទី២១”។ កំណាព្យនេះ បានពិពណ៌នាពីលក្ខណៈសម្បត្តិរបស់គ្រូបង្រៀន ដែលត្រូវមានទាំង គុណភាពបង្រៀន ចរិយាសម្បត្តិ បញ្ញា រួមទាំងការសិក្សាពេញមួយជីវិត។ លោក សែម ពណ្ណរាយ បញ្ជាក់ដូច្នេះថា៖« ក្នុងកំណាព្យខ្ញុំរៀបរាប់ពី គុណភាពគ្រូបង្រៀន ចរិត បញ្ញា រួមទាំងការសិក្សាបន្តពេញមួយជីវិតរបស់គ្រូបង្រៀន»។
កំណាព្យជ័យលាភីទាំង៣រូប សង្កត់ធ្ងន់លើអត្ថន័យប្រហាក់ប្រហែលគ្នា ដែលសុទ្ធតែបញ្ជាក់ពីគុណសម្បត្តិរបស់គ្រូបង្រៀន ដែលមិនអាចខ្វះបានក្នុងសង្គម។ ជ័យលាភីទាំង៣រូបទទួលបានពាន និងថវិកាមួយចំនួនទៀតផង៕
Tag:
កំណាព្យ
សមាគមអ្នកនិពន្ធខ្មែរ
អប់រំ
© រក្សាសិទ្ធិដោយ thmeythmey.com