អន្តរជាតិ
អ្នកណាខ្លះ មានសិទ្ធិដាក់ពាក្យប្តឹងទៅកាន់តុលាការយុត្តិធម៌អន្តរជាតិ (ICJ)?
×![]()
រយៈពេល៧ទសវត្សរ៍មកហើយ ដែលតុលាការយុត្តិធម៌អន្តរជាតិ ឬហៅកាត់ថា ICJ ត្រូវបានបង្កើតឡើងតាមរយៈធម្មនុញ្ញអង្គការសហប្រជាជាតិ និងលក្ខន្តិកៈបន្ថែមផ្សេងទៀត។ ជាអង្គភាពយុត្តិធម៌ស្នូលរបស់អង្គការសហប្រជាជាតិ តុលាការ ត្រូវមានសមាសភាពចៅក្រម ១៥ រូប ហើយមានតួនាទីពីរសំខាន់ រួមមានដោះស្រាយវិវាទផ្នែកច្បាប់ដែលប្តឹងដោយរដ្ឋភាគីភាគី និងផ្តល់អនុសាសន៍ដល់ពួកគេ។
ជាគោលការណ៍ មានតែរដ្ឋសមាជិកនោះទេ ដែលអាចដាក់ពាក្យបណ្តឹងបានទៅកាន់តុលាការយុត្តិធម៌អន្តរជាតិ ពោលគឺមានតែរដ្ឋសមាជិកអង្គការសហប្រជាជាតិទាំង ១៩៣ ប៉ុណ្ណោះ។ តុលាការគ្មានយុត្តាធិការក្នុងការជំនុំជម្រះលើបណ្តឹងរបស់បុគ្គល, អង្គការមិនមែនរដ្ឋាភិបាល, សហគ្រាស ឬស្ថាប័នឯកជនឡើយ។ តុលាការនេះរឹតតែមិនអាចផ្តល់ប្រឹក្សា ឬជួយអង្គភាពទាំងនេះក្នុងការដោះស្រាយបញ្ហាជាមួយនឹងអាជ្ញាធររបស់រដ្ឋណាមួយផងដែរ។
ក្រៅពីមិនទទួលបណ្តឹងបុគ្គល ឬភាគីមិនមែនជារដ្ឋសមាជិក តុលាការយុត្តិធម៌អន្តរជាតិ ក៏គ្មានយុត្តាធិការក្នុងការជំនុំជម្រះលើបទល្មើស ដែលជាការចោទប្រកាន់ទៅលើបុគ្គលណាមួយពាក់ព័ន្ធនឹងឧក្រិដ្ឋកម្មសង្គ្រាម ឬឧក្រិដ្ឋកម្មប្រឆាំងមនុស្សជាតិ ដ្បិតតុលាការនេះ ក៏មិនមែនជាប្រភេទតុលាការព្រហ្មទណ្ឌនោះឡើយ។
អ្វីដែលគួរឲ្យកត់សម្គាល់ផងដែរនោះ តុលាការ អាចជំនុំជម្រះតែលើវិវាទដែលស្នើដោយរដ្ឋណាមួយ ឬក៏រដ្ឋច្រើន។ នេះ ក៏មានន័យថា តុលាការ គ្មានសមត្ថកិច្ចដោះស្រាយទៅវិវាទដោយការយល់ឃើញរបស់ខ្លួនបានឡើយ។ ចរិកលក្ខណៈបែបនេះហើយ ដែលធ្វើឲ្យតុលាការយុត្តិធម៌អន្តរជាតិ មានភាពខុសគ្នាជាមួយនឹងបណ្តាតុលាការអន្តរជាតិមួយចំនួនរបស់អឺរ៉ុប និងអាមេរិក ដែលផ្តល់សិទ្ធិឲ្យបុគ្គលអាចដាក់ពាក់បណ្តឹងបាននោះ។
គួរឲ្យកត់សម្គាល់ផងដែរនោះ សេចក្តីសម្រេច ឬសាលក្រមរបស់តុលាការយុត្តិធម៌វិញ គឺជាប្រភេទសេចក្តីសម្រេច ដែលមានលក្ខណៈចាប់បង្ខំឲ្យអនុវត្ត ចុងក្រោយ ហើយបិទផ្លូវការប្តឹងជំទាស់។ ក៏ប៉ុន្តែ ភាគី អាចស្នើឲ្យតុលាការបកស្រាយទៅលើសេចក្តីសម្រេចនោះបាន និងស្នឲ្យពិនិត្យឡើងវិញក្នុងករណីដែលមានភាពមិនប្រក្រតីជាក់ស្តែង៕
Tag:
ICJ
អង្គការសហប្រជាជាតិ
© រក្សាសិទ្ធិដោយ thmeythmey.com
