អន្តរជាតិ
ចិន ប្រាប់អាមេរិកកុំយកសិទ្ធិមនុស្សធ្វើឧបករណ៍ជ្រៀតជ្រែកកិច្ចការផ្ទៃក្នុងប្រទេសផ្សេង អ្នកនាំពាក្យក្រសួងការបរទេសចិន Lu Kang នាសន្និសីទសារព័ត៌មានថ្ងៃទី១២ ខែតុលា។ (រូបភាពវ៉េបសាយក្រសួងការបរទេសចិន)
× ក្រុងប៉េកាំងនៅថ្ងៃទី១២ ខែតុលា បានប្រតិកម្មតបការលើកឡើងរបស់កន្លងមករបស់មេដឹកនាំអាមេរិក ដែលថា ចិនបានដើរថយក្រោយលើការការពារសិទ្ធិមនុស្ស។ អ្នកនាំពាក្យក្រសួងការបរទេសចិន Lu Kang និយាយថា រដ្ឋាភិបាលចិនចាត់ទុកសិទ្ធិមនុស្សជារឿងសំខាន់ និងបានជំរុញការការពារសិទ្ធិសាកលនេះផង ខណៈប្រជាជនចិនរីករាយសិទ្ធិរបស់ខ្លួនយ៉ាងទូលំទូលាយដែលមានចែងក្នុងច្បាប់។ អាមេរិកទៅវិញទេដែលត្រូវមើលឡើងវិញស្ថានភាពសិទ្ធិមនុស្សរបស់ខ្លួននោះ។
ស្ថានភាពសិទ្ធិមនុស្សនៅចិន មិនដូចលើកឡើងរបស់មេដឹកនាំអាមេរិក។ នេះជាចម្លើយរបស់ក្រុងប៉េកាំងតបទៅកាន់ការរិះគន់របស់មេដឹកនាំអាមេរិកនាពេលកន្លងមកជុំវិញការធ្លាក់ចុះការគោរពសិទ្ធិមនុស្សនៅប្រទេសមហាអំណាចទីពីររបស់ពិភពលោក។ លោក Lu Kang អ្នកនាំពាក្យក្រសួងការបរទេសចិនបានរៀបរាប់ពីសមិទ្ធផលរបស់រដ្ឋាភិបាលក្រុងប៉េកាំងក្នុងការគោរព និងលើកកម្ពស់សិទ្ធិមនុស្សរបស់ខ្លួន។
«ចិនបានរំដោះប្រជាជនច្រើនជាង៧០០លាននាក់ឲ្យផុតពីភាពក្រីក្រ និងផ្ដល់ការងារឲ្យប្រជាជនចំនួន៧៧០លាននាក់ទៀត។ អ្នកប្រើប្រាស់អ៊ីនធឺណិតចិនជិត៨០០លាននាក់បានអនុវត្តសិទ្ធិរបស់ខ្លួនតាមរយៈប្រព័ន្ធអនឡាញរបស់រដ្ឋាភិបាល។ ចិនមានអ្នកគោរពសាសនាជិត២០០លាននាក់ មានបព្វជិតជិត៤សែននាក់ និងមានកន្លែងប្រតិបត្តិសាសនាចំនួន១៤ម៉ឺនទីតាំង។» នេះជាលើកឡើងរបស់លោក Lu នាសន្និសីទសារព័ត៌មាននៅថ្ងៃទី១២ ខែតុលា។
តបទៅអាមេរិកវិញ អ្នកនាំពាក្យខាងលើក៏រិះគន់ស្ថានភាពសិទ្ធិមនុស្សរបស់ក្រុងវ៉ាស៊ីនតោន ដោយអះអាងថា អាមេរិករុំរឹតដោយបញ្ហាសិទ្ធិមនុស្សជាបន្តបន្ទាប់ ហើយអាមេរិកថែមទាំងដកខ្លួនចេញពីស្ថាប័នសិទ្ធិមនុស្សរបស់អង្គការសហប្រជាជាតិទៅទៀត។ ទន្ទឹមនឹងការបញ្ជាក់ថា អាមេរិកគ្មានសិទ្ធិចង្អុលមុខប្រទេសផ្សេងនោះ លោក Lu បានផ្ដល់ដំបូន្មានទៅអាមរិកដែរថា គិតគូរពីការបំពានសិទ្ធិមនុស្សក្នុងស្រុកខ្លួនឯងទៅជាជាងយកសិទ្ធិមនុស្សធ្វើជាឧបករណ៍កកូរកកាយកិច្ចការផ្ទៃក្នុងប្រទេសដទៃ។
សម្រាប់មន្ត្រីក្រសួការបរទេសចិនដដែលនេះ គ្មានប្រទេសណាដែលអាចអះអាងថា ខ្លួនល្អលើសគេលើគោរពសិទ្ធិមនុស្សឡើយ ដ្បិតជាកិច្ចការដែលតែងមានការវិវត្តជានិច្ច។ ហេតុដូចនេះទើបចិនរក្សាការប្ដេជ្ញាចិត្តរបស់ខ្លួនក្នុងការដើរតាមផ្លូវអភិវឌ្ឍសិទ្ធិមនុស្សដែលសមស្របតាមលក្ខខណ្ឌរបស់ចិន ក៏ដូចជាជំរុញការគោរពសិទ្ធិមូលដ្ឋានទាំងឡាយដូចជាសេរីភាព សិទ្ធិស៊ីវិល និងវប្បធម៌ និងសិទ្ធិនយោបាយជាដើម។
ជុំវិញសិទ្ធិមនុស្សនេះ លោក Lu ក៏ឆ្លៀតលើកឡើងពីដែនកំណត់របស់វា ដោយគូសបញ្ជាក់ថា គ្មានប្រទេសណាមួយដែលសិទ្ធិមនុស្សគ្មានព្រំដែន និងដាច់ខាតឡើយ។ លោករំឭកថា ប្រជាជនទាំងអស់ត្រូវគិតគូរច្បាប់រដ្ឋធម្មនុញ្ញ និងច្បាប់ពាក់ព័ន្ធពេលអនុវត្តសិទ្ធិរបស់ខ្លួន ហើយក៏គ្មាននរណាអាចប្រព្រឹត្តអំពើឧក្រិដ្ឋណាមួយក្រោយរបាំងសិទ្ធិមនុស្សដែរ៕
Tag:
ចិន
អាមេរិក
សិទ្ធិមនុស្ស
© រក្សាសិទ្ធិដោយ thmeythmey.com