អន្តរជាតិ
ទិវាប្រឆាំងទោសប្រហារជីវិត៖ សហភាពអឺរ៉ុបសរសើរឡាវ ដែលមានទោសប្រហារជីវិត តែមិនដែលប្រើ
×![]()
ដូចរៀងរាល់ឆ្នាំនាឱកាស នៃទិវាប្រឆាំងទោសប្រហារជីវិត សហភាពអឺរ៉ុប តែងចេញសេចក្តីថ្លែងការណ៍ស្តីពីការប្តេជ្ញាចិត្ត ធានាឲ្យបានការផ្តល់ប្រព័ន្ធយុត្តិធម៌ និងប្រឆាំងបំផុតចំពោះការអនុវត្តទោសប្រហារជីវិត។ ហើយក៏មិនខុសពីពេលមុនៗ សហភាពអឺរ៉ុប ក៏បានកើតសរសើរឡាវ ដែលមិនអនុវត្តទោសបែបនេះផងដែរ។ 
តាមរយៈសេចក្តីថ្លែងការណ៍ចុះថ្ងៃ៩ តុលារបស់ប្រតិភូសហភាពអឺរ៉ុបប្រចាំទីក្រុងវៀងចន្ទន៍ សហភាពអឺរ៉ុប បានបញ្ជាក់ជាថ្មីពីការប្តេជ្ញាចិត្តក្នុងការធ្វើការជាមួយគ្រប់ប្រទេស ដែលរាប់បញ្ចូលទាំងឡាវដើម្បីសម្រេចឲ្យបាននូវគោលដៅទៅមុខនៃការលុបបំបាត់ទោសប្រហារជីវិតជាសកល។ នេះបើយោងតាមការចុះផ្សាយរបស់សារព័ត៌មាន Laotian Times។
តាមរយៈសេចក្តីថ្លែងការណ៍ដដែលនោះ សហភាពអឺរ៉ុប បានលើកឡើងថា មកទល់ពេលនេះ មានរដ្ឋ១៤៣ហើយ ពោលគឺស្ទើរតែ៣ភាគ៤នៃប្រទេសទូទាំងពិភពលោក ដែលរាប់បញ្ចូលទាំងប្រទេសតំបន់អឺរ៉ុបទាំងអស់ បានបដិសេធមិនអនុវត្តទោសប្រហារជីវិត។ សហភាពអឺរ៉ុប ក៏បានអះអាងថា គ្មានហេតុផលណាមួយ ដែលប្រទេសមួយចំនួនចោទថាការប្រព្រឹត្តបទល្មើសធ្ងន់ធ្ងរ ត្រូវតែកាត់ទោសប្រហារជីវិតឡើយ។
តាមរយៈសេចក្តីថ្លែងការណ៍ សហភាពអឺរ៉ុប ក៏បានលើកសរសើរពីឡាវផងដែរ។ « ទោសប្រហារជីវិត ត្រូវបានបញ្ញត្តិក្នុងច្បាប់របស់ប្រទេស ហើយច្បាប់នេះ ក៏នៅជាធរមានដដែល។ ក៏ប៉ុន្តែ ជាង២៥ឆ្នាំមកនេះ ឡាវ មិនដែលមានការកាត់ប្រទេសជីវិតឡើយ»។ នេះ គឺជាការលើកឡើងរបស់សហភាពអឺរ៉ុប។
គួរកត់សម្គាល់ផងដែរ ក្នុងចំណោមប្រទេស ដែលនៅតែបន្តអនុវត្តទោសប្រហារជីវិត ក៏រាប់បញ្ចូលទាំងសមាជិកភាគច្រើននៃប្រទេសអាស៊ានដូចជាព្រុយណេ ឥណ្ឌូណេស៊ី ម៉ាឡេស៊ី សិង្ហបុរី ថៃ និងវៀតណាម ជាដើម៕
© រក្សាសិទ្ធិដោយ thmeythmey.com
