អន្តរជាតិ
លោក មូន ចេអ៊ីន៖ កូរ៉េខាងជើងប្ដេជ្ញារំសាយនុយក្លេអ៊ែរទាំងអស់ រាប់ទាំងនុយក្លេអ៊ែរក្នុងឃ្លាំងផង មេដឹកនាំកូរ៉េទាំងពីរនាជំនួបកន្លងមក (រូបភាព AFP)
× ប្រធានាធិបតីកូរ៉េខាងត្បូង មូន ចេអ៊ីន នៅថ្ងៃទី១២ ខែតុលា និយាយថា កូរ៉េខាងជើងដឹងពីភាពចាំបាច់ក្នុងការរំសាយអាវុធនុយក្លេអ៊ែរដែលមានក្នុងឃ្លាំងរបស់ខ្លួនដើម្បីសម្រេចឲ្យការរំសាយនុយក្លេអ៊ែរទាំងស្រុង។ បើតាមលោក មូន មេដឹកនាំកូរ៉េខាងជើង គីម ជុងអ៊ុន មានឆន្ទៈបោះបង់នុយក្លេអ៊ែរដែលកូរ៉េខាងជើងមាន ជាថ្នូរនឹងការអភិវឌ្ឍសេដ្ឋកិច្ច។ ប៉ុន្តែការរំសាយនុយក្លេអ៊ែរធ្វើឡើងពេលណា និងតាមរបៀបណា គឺស្ថិតក្នុងការចរចារវាងកូរ៉េខាងជើង និងអាមេរិក។
ពាក្យសន្យារំសាយនុយក្លេអ៊ែររបស់កូរ៉េខាងជើង គឺរាប់បញ្ចូលគ្រប់យ៉ាង។ នេះជាការបញ្ជាក់របស់ប្រធានាធិបតីកូរ៉េខាងត្បូង មូន ចេអ៊ីន ក្នុងកិច្ចសម្ភាសជាមួយប្រព័ន្ធផ្សព្វផ្សាយអង់គ្លេស BBC នៅថ្ងៃទី១២ ខែតុលា មុនចាកចេញទៅកាន់ទ្វីបអឺរ៉ុប។ យ៉ាងណាមិញ អ្វីៗស្ថិតក្នុងដៃរបស់អាមេរិក និងកូរ៉េខាងជើងផ្ទាល់ ទោះជាការចរចារវាងភាគីទាំងពីរនាពេលកន្លងមកបានជាប់គាំងដោយសារជំហរមិនទាន់ត្រូវគ្នាក៏ដោយ។
«ការរំសាយនុយក្លេអ៊ែរទាំងស្រុងដែលលោក គីម ជុងអ៊ុន ចង់បាន មិនត្រឹមចាប់ផ្ដើមត្រឹមការបញ្ឈប់ការសាកល្បងនុយក្លេអ៊ែរ ឬមីស៊ីល និងការកម្ទេចទីតាំងផលិតនុយក្លេអ៊ែរ ឬអភិវឌ្ឍមីស៊ីលនោះឡើយ។ វាគឺរាប់បញ្ចូលទាំងអស់ រាប់ទាំងការបោះបង់អាវុធនុយក្លេអ៊ែរ និងគ្រឿងបរិក្ខារនុយក្លេអ៊ែរនានាផង។» នេះជាចម្លើយរបស់លោក មូន ទៅនឹងសំណួររបស់អ្នកសារព័ត៌មាន BBC ។
ជុំវិញការរំសាយនុយក្លេអ៊ែរនេះ ប្រធានាធិបតីកូរ៉េខាងត្បូងក៏បង្ហាញជំហររបស់កូរ៉េខាងជើងដែលចង់រំសាយនុយក្លេអ៊ែររបស់ខ្លួនទាំងស្រុង ដើម្បីទទួលបានការអភិវឌ្ឍសេដ្ឋកិច្ច។ ក្នុងកិច្ចសម្ភាសដដែល លោក មូន បន្តថា កូរ៉េខាងជើងសន្យាថា គ្មានមូលហេតុអ្វីដែលខ្លួនត្រូវមាននុយក្លេអ៊ែរ ស្របពេលជួបបញ្ហាលំបាកដូចជាទណ្ឌកម្មឡើយ បើសុវត្ថិភាពរបស់របបដឹកនាំក្រុងព្យុងយ៉ាងត្រូវបានធានាពិតប្រាកដមែននោះ។
យ៉ាងណាមិញ លោក មូន ដែលបានជួបលោក គីម បីដងរួចមកហើយនោះ មិនបាននិយាយពីកាលបរិច្ឆេទ និងវិធីសាស្ត្ររំសាយនុយក្លេអ៊ែរជាមួយមេដឹកនាំកូរ៉េខាងជើងឡើយ ដោយទុកឲ្យលោក គីម និងប្រធានាធិបតីអាមេរិក ដូណាល់ ត្រាំ ជជែកគ្នាវិញ។ ឯមូលហេតុ គឺដោយសារកូរ៉េខាងជើងទាមទារឲ្យអាមេរិកចាត់វិធានការតបនឹងចំណាត់ការដែលខ្លួនអនុវត្តកន្លងមកដូចជាការកម្ទេចទីតាំងសាកល្បងនុយក្លេអ៊ែរ និងការបញ្ជូនធាតុទាហានអាមេរិកទៅស្រុកវិញជាដើម។
មេដឹកនាំកូរ៉េខាងត្បូងរូបនេះចង់បានការបញ្ចប់ជាផ្លូវការសង្គ្រាមកូរ៉េជាការឆ្លើយតបនឹងសកម្មភាពរបស់កូរ៉េខាងជើង។ ប៉ុន្តែអាមេរិកនៅស្ទាក់ស្ទើរខ្លាំងចំពោះបញ្ហានេះ។ ម្យ៉ាងអាមេរិកចង់ឲ្យកូរ៉េខាងជើងធ្វើសមកម្មភាពបន្ថែមទៀតសិន មុននឹងខ្លួនផ្ដល់ការលើកទឹកចិត្តដូចជាការផ្អាកទណ្ឌកម្ម។ ម្យ៉ាងការបញ្ចប់សង្គ្រាមកូរ៉េនឹងធ្វើឲ្យទាហានអាមេរិកជិតបីម៉ឺននាក់នៅកូរ៉េខាងត្បូង ស្ថិតក្នុងភាពមិនច្បាស់លាស់ ឬក៏ត្រូវដកត្រឡប់ទៅវិញផង៕
Tag:
កូរ៉េខាងត្បូង
មូន ចេអ៊ីន
គីម ជុងអ៊ុន
នុយក្លេអ៊ែរ
© រក្សាសិទ្ធិដោយ thmeythmey.com