អន្តរជាតិ
វៀតណាម រៀបចំធ្វើបទបញ្ជាថ្មីទប់ស្កាត់មន្ត្រីជាន់ខ្ពស់ប្រព្រឹត្តអំពើពុករលួយ និងបង្ហាញគំរូដល់ថ្នាក់ក្រោម
× បក្សកុម្មុយនីស្តវៀតណាម បានប្រជុំពិភាក្សាធ្វើសេចក្តីព្រាងបទបញ្ជាផ្ទៃក្នុងដើម្បីគ្រប់គ្រងទាំងមន្ត្រីជាន់ខ្ពស់បក្ស និងមន្ត្រីរដ្ឋាភិបាល។ គោលដៅនៃការៀបចំបទបញ្ជានេះ ធ្វើឡើងក្នុងគោលដៅធានាឲ្យបាននូវសេចក្តីថ្លៃថ្នូរបស់មន្ត្រីជាន់ខ្ពស់ ដែលជាគំរូសម្រាប់ថ្នាក់ក្រោម ក៏ដូចជាពង្រឹងការទទួលខុសត្រូវមន្ត្រីកាន់តំណែងជាន់ខ្ពស់ផងដែរ។
គណៈកម្មាធិការមជ្ឈិមបក្សកុម្មុយនីស្តវៀតណាម ដើមខែតុលាកន្លងទៅ បានបើកកិច្ចប្រជុំសមាជិកបក្សជាន់ខ្ពស់ ដែលត្រូវប្រព្រឹត្តទៅរយៈពេលបួនថ្ងៃដើម្បីពិភាក្សាលើការធ្វើបទបញ្ជាផ្ទៃក្នុងមួយ ក្នុងគោលដៅកំហិតដល់មន្ត្រីជាន់ខ្ពស់ទាំងក្នុងបក្ស និងក្នុងរដ្ឋាភិបាល ឲ្យបង្ហាញពីការទទួលខុសត្រូវ និងគំរូល្អដល់មន្ត្រីថ្នាក់ក្រោម។ នេះបើយោងតាមការចុះផ្សាយរបស់សារព័ត៌មាន Vietnam News។
នាកិច្ចប្រជុំនោះ អគ្គលេខាធិការបក្ស លោក Nguyen Phu Trong បានទទូចឲ្យសមាជិកគណៈកម្មាធិការមជ្ឈិមបក្សចូលរួមបង្កើតក្រឹត្យក្រមផ្លូវការមួយដើម្បីកំណត់ឲ្យច្បាស់ពីស្តង់ដារក្រមសីលធម៌របស់សមាជិកបក្ស ពិសេសក្នុងចំណោមមន្ត្រីជាន់ខ្ពស់តែម្តង។ នេះបើយោងតាមប្រភពព័ត៌មានដដែលនោះ។
តាម Vietnam News សេចក្តីព្រាងបទបញ្ជាផ្ទៃក្នុងនេះ នឹងក្លាយជាឧបករណ៍គោលនយោបាយមួយក្នុងការប្រយុទ្ធប្រឆាំងនឹងអំពើពុករលួយ និងធ្វើឲ្យមន្ត្រីជាន់ខ្ពស់បង្កើនការទទួលខុសត្រូវរបស់ពួកគេ ហើយក្រឹត្យក្រមថ្មីនេះ ក៏អាចនឹងមានវិសាលភាពដល់សាច់ញាតិរបស់មន្ត្រីជាន់ខ្ពស់ ពោលគឺ ក្រុមគ្រួសារ មិនអាចទាញផលប្រយោជន៍ពីមុខតំណែងជាន់ខ្ពស់នោះដើម្បីបង្កើនរបររកស៊ីជាដើម។
ជាពិសេសនោះ បើសេចក្តីព្រាងនៃបទបញ្ជាផ្ទៃក្នុងរបស់បក្សកុម្មុយនីស្តវៀតណាមមួយនេះ ពិតជាត្រូវបានអនុម័តមែននោះ ការហាមឃាត់មន្ត្រីជាន់ខ្ពស់ក្នុងការទិញអចលទ្រព្យ និងទ្រព្យសម្បត្តិផ្សេងៗក្រៅប្រទេស ក៏ត្រូវដាក់ឲ្យអនុវត្តផងដែរ។ ពោលគឺ គ្រប់មន្ត្រីបក្សទាំងអស់ ត្រូវធានាឲ្យបានបទវិន័យផ្ទាល់ខ្លួនយ៉ាងច្បាស់លាស់ដើម្បីជា គំរូដល់មន្ត្រីថ្នាក់ក្រោម។
អ្វីដែលគួរឲ្យកត់សម្គាល់នោះ មុនពេលនៃការចាប់ផ្តើមការធ្វើសេចក្តីព្រាងនៃបទបញ្ជាផ្ទៃក្នុងនេះ វៀតណាម បានទទួលមេរៀន និងជាសារព្រមានមួយពាក់ព័ន្ធការដឹកនាំក្នុងបក្ស។ នោះគឺ នៅដើមឆ្នាំកន្លងទៅវៀតណាម បានរកឃើញ និងកាត់ទោសមន្ត្រីជាន់ខ្ពស់ជាង២០នាក់ ពាក់ព័ន្ធការប្រព្រឹត្តអំពើរលួយយ៉ាងធ្ងន់ធ្ងរ។ ពួកគេ សុទ្ធសឹងតែទទួលបានការទុកចិត្តពីបក្សកុម្មុយនីស្តវៀតណាមឲ្យទៅកាន់តំណែងសំខាន់ៗផ្នែកសេដ្ឋកិច្ច និងហិរញ្ញវត្ថុរបស់ប្រទេស៕
Tag:
វៀតណាម
ពុករលួយ
អាស៊ាន
© រក្សាសិទ្ធិដោយ thmeythmey.com