ជាតិ
ឧត្តមក្រុមប្រឹក្សាផ្ដល់យោបល់ ៖ លោក ពេជ្រ ស្រស់ និងលោក វឌ្ឍនាសារពង្ស ហាក់សកម្មខ្លាំង
×![]()
ដោយ: ធឿន បញ្ញាឬទិ្ធ
ភ្នំពេញ៖ ឧត្តមក្រុមប្រឹក្សាពិគ្រោះ និងផ្ដល់យោបល់ បានបង្កើតឡើងជាផ្លូវការរយៈពេលជិត២ខែមកហើយ។ បញ្ហាសង្គម និងដីធ្លីរបស់ប្រជាពលរដ្ឋ ត្រូវបានលើកយកទៅដាក់ពិភាក្សា ក្នុងជំនួបប្រចាំខែលើកទី១ កាលពីចុងខែកញ្ញា កន្លងមក។ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ពីររូប ដែលមកពីគណបក្សនយោបាយផ្សេងគ្នា ក្នុងចំណោម១៥បក្ស ត្រូវបានគេមើលឃើញថា កំពុងតែមានសកម្មភាពលេចធ្លោរ នៅក្នុងការដោះស្រាយបញ្ហាសង្គម។
គេមិនទាន់មើលឃើញពីសកម្មភាពរបស់សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ណា ដែលលេចធ្លោរជាងលោក ពេជ្រ ស្រស់ ប្រធានគណបក្សយុវជនកម្ពុជា និងលោក សុខសុវណ្ណ វឌ្ឍនាសារពង្ស ប្រធានគណបក្សខ្មែរក្រោកឡើយ។ សមាជិកឧត្តមក្រុមប្រឹក្សាពិគ្រោះ និងផ្ដល់យោបល់ ដែលមានឋានៈស្មើទេសរដ្ឋមន្ត្រីទាំងពីរនេះ ហាក់បញ្ចេញសកម្មភាពខ្លាំងក្នុងសិក្សាបញ្ហាពលរដ្ឋ និងមន្ទិលសង្ស័យមួយចំនួន ជុំវិញភាពអយុត្តិធម៌ក្នុងសង្គម។
ជាក់ស្ដែងទាំងលោក ពេជ្រ ស្រស់ និងលោក សុខសុវណ្ណ វឌ្ឍនាសារពង្ស បានចុះទៅទីតាំងតំបន់ចាក់ដីលុបឆ្នេរព្រែកត្រែង បញ្ហាចាក់ដីលុបពយកំពេញនៅខេត្តព្រះសីហនុជាដើម ដែលវាជាចំណែកមួយ នាំឲ្យមានការដោះស្រាយ និងបកស្រាយពីបញ្ហានានា ជុំវិញមន្ទិលសង្ស័យទាំងនេះ។
លោក ពេជ្រ ស្រស់ ប្រធានគណបក្សយុវជនកម្ពុជា បានប្រាប់សារព័ត៌មានថ្មីៗថា បញ្ហាដីធ្លី ដែលលោក បានលើកទៅពិភាក្សាក្នុងឧត្តមក្រុមប្រឹក្សាពិគ្រោះ និងផ្ដល់យោបល់នោះ គឺនៅខេត្តកណ្តាល ខេត្តសៀមរាប និងខេត្តព្រះសីហនុ រួមទាំងការរារាំងសកម្មភាពរបស់សមាជិកឧត្តមក្រុមប្រឹក្សាពិគ្រោះ និងផ្តល់យោបល់ពីសំណាក់អាជ្ញាធរ។
ប្រធានគណបក្សយុវជនកម្ពុជារូបនេះ បានបញ្ជាក់ដូច្នេះថា៖« យើងធ្វើការតាមនីតិវិធីច្បាប់ហើយ ។ចំពោះការទទួលយកនោះ យើងកំពុងជំរុញ ហើយផ្សព្វផ្សាយអំពីដំណើរការនៃឧត្តមក្រុមប្រឹក្សាពិគ្រោះ និងផ្តល់យោបល់នេះ ឲ្យខាងអាជ្ញាធរគ្រប់ជាន់ថ្នាក់បានជ្រាប»។
បើតាមលោក ពេជ្រ ស្រស់ លោកនឹងបន្តជំរុញការដោះស្រាយបញ្ហាដីធ្លីខាងលើ ហើយក៏ត្រៀមលើកយករឿងផ្លូវខូចនៅតំបន់ប្រាសាទអង្គរ ទៅពិភាក្សាពិគ្រោះ និងផ្ដល់យោបល់នៅក្នុងកិច្ចប្រជុំលើកទី២ផងដែរ។
ក្រៅពីបញ្ហានៅខេត្តព្រះសីហនុ លោក សុខសុវណ្ណ វឌ្ឍនាសារពង្ស ក៏បានចុះទៅសិក្សាលើតំបន់ ដែលជនជាតិវៀតណាមកំពុងរស់នៅ ក្នុងខេត្តកំពង់ឆ្នាំង និងបញ្ហាបរិស្ថានជាដើម។
កាលពីប្រជុំប្រចាំខែដំបូងនៃសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ បានរកឃើញករណីជម្លោះដីធ្លីនៅតំបន់មួយចំនួននៅខេត្តកណ្តាល សៀមរាប និងខេត្តព្រះសីហនុជាដើម។ បន្ទាប់ពីប្រមូលបានព័ត៌មាន និងទទួលសូំណូមពរពីប្រជាពលរដ្ឋដែលជាអ្នករងគ្រោះដីធ្លីរួចហើយនោះ ឧត្តមក្រុមប្រឹក្សាពិគ្រោះ និងផ្តល់យោបល់នឹងផ្ញើរបាយការណ៍នេះ ជូនបន្តទៅសម្តេចនាយករដ្ឋមន្ត្រី ហ៊ុន សែន។
ជាគោលការណ៍ឧត្តមក្រុមប្រឹក្សានេះ នឹងបើកកិច្ចប្រជុំក្នុងមួយខែម្តង ពោលគឺនៅសប្តាហ៍ទី៤ នៃខែនីមួយៗ ដើម្បីបូកសរុបការងារ និងផ្តល់យោបល់ទៅរាជរដ្ឋាភិបាល ជុំវិញបញ្ហានានាដែលស្ថាប័ននេះ រកឃើញ។ សមាជិកឧត្តមក្រុមប្រឹក្សាទាំងអស់ នឹងធ្វើជាប្រធានប្ដូរវេន រៀងរាល់មួយខែម្ដង។ ហើយក្នុងរយៈពេល៦ខែម្ដង ក្រុមឧត្តមប្រឹក្សាពិគ្រោះទាំងនោះ នឹងត្រូវជួបជាមួយសម្ដេចនាយករដ្ឋមន្ត្រី ហ៊ុន សែន។ប្រធានប្រតិភូនៃគណបក្សនីមួយៗ មានឋានៈស្មើទេសរដ្ឋមន្ត្រី ខណៈអនុប្រធានមានឋានៈស្មើរដ្ឋមន្ត្រី៕
Tag:
ពេជ្រ ស្រស់
ឧត្តមក្រុមប្រឹក្សា
នយោបាយ
© រក្សាសិទ្ធិដោយ thmeythmey.com
