ភ្នំពេញ៖ ការបំបាត់បក្សពួក ដោយជំនួសមកវិញនូវសាមគ្គីភាព និងការជំរុញឲ្យមានតម្លាភាពនៅក្នុងគណៈមេធាវីកម្ពុជា គឺជាចំណុចសំខាន់ៗ ដែលត្រូវអនុវត្ត។ នេះជាសាររបស់លោក សួន វិសាល ដែលបានលើកឡើង ក្រោយពីលោក ត្រូវបានមេធាវីនៅទូទាំងប្រទេស បោះឆ្នោតឲ្យធ្វើជាប្រធានសាជាថ្មី។
ក្រោយជាប់ឆ្នោតធ្វើជាប្រធានគណៈមេធាវីជាលើកទី២ តាមរយៈការបោះឆ្នោត នៅថ្ងៃទី១៦ ខែតុលា ឆ្នាំ២០១៨ លោក សួន វិសាល បានឡើងថ្លែងសារប្រហែលជា៤-៥នាទី ទៅកាន់មេធាវីប្រមាណ១៥០០នាក់ ជាសមាជិក-សមាជិកា។ ចាប់ផ្តើមដំបូងនៃការថ្លែងសារ លោក បានប្រកាសពីការប្តេជ្ញាចិត្ត ក្នុងការបម្រើគណៈមេធាវី ដើម្បីជាប្រយោជន៍សម្រាប់វិជ្ជាវីវៈមេធាវី និងសង្គមជាតិទាំងមូល។
បន្ទាប់មក លោក សួន វិសាល ក៏បង្ហាញពីគោលជំហរនិងឆន្ទៈរបស់លោកក្នុងនាមជាប្រធានគណៈមេធាវី។ ឆន្ទៈដ៏សំខាន់របស់លោក គឺបន្តទប់ស្កាត់ការបង្កើតបក្សពួកនៅក្នុងផ្ទៃក្នុងនៃគណៈមេធាវី។
នៅចំពោះមុខសមាជិក-សមាជិកា លោក សួន វិសាល បានលើកឡើងថា កន្លងមក គណៈមេធាវី ធ្លាប់មានការបែងចែកបក្សពួក។ ប៉ុន្តែ ពេលលោក ចូលកាន់តំណែងជាប្រធានលើកទី១ សម្រាប់អាណត្តិទី១១ កាលឆ្នាំ២០១៦ លោក បានរំលាយវប្បធម៌បក្សពួកនិយមនេះចោល ដែលធ្វើឲ្យការងារក្នុងគណៈមេធាវី រីកចម្រើន និងមានភាពល្អប្រសើរ។
ជំនួសឲ្យការបង្កើតបក្សពួក លោក សួន វិសាល បានព្យាយាមជំរុញឲ្យសមាជិក-សមាជិកទាំងអស់ ធ្វើការជាមួយគ្នាក្នុងក្រុមតែមួយ។ លើសពីនេះ លោក បានដាក់គោលនយោបាយដ៏សំខាន់មួយទៀត គឺការធ្វើឲ្យមានតម្លាភាព នៅក្នុងគណៈមេធាវី។
នៅក្នុងឱកាសនោះ លោក សួន វិសាល ឆ្លៀតណែនាំក្រុមប្រឹក្សាគណៈមេធាវីសម្រាប់អាណត្តិទី១២នេះ ឲ្យបំពេញការងារប្រកបដោយសេចក្តីថ្លៃថ្នូរនិងមានសាមគ្គីភាព។ ប្រធានគណៈមេធាវី សង្កត់ធ្ងន់បែបនេះថា៖«ខ្ញុំ សង្ឃឹមថាក្រុមប្រឹក្សាថ្មី នឹងគោរពតាមប្រពៃណី ដូចក្រុមប្រឹក្សាចាស់»។
ការបោះឆ្នោតនេះ មាន២ គឺការបោះឆ្នោតជ្រើសតាំងប្រធានគណៈមេធាវីសម្រាប់អាណត្តិទី១២ និងការបោះឆ្នោតជ្រើសតាំងក្រុមប្រឹក្សាគណៈមេធាវីអាណត្តិទី៩។ ក្រុមប្រឹក្សាគណៈមេធាវី មានសមាជិក-សមាជិក៣៣រូប។
មេធាវីម្នាក់ អាចធ្វើជាប្រធានគណៈមេធាវីបានតែ២អាណត្តិប៉ុណ្ណោះ ហើយក្នុង១អាណត្តិ មានរយៈពេល២ឆ្នាំ។ រីឯ អាណត្តិនៃក្រុមប្រឹក្សាគណៈមេធាវី មានរយៈពេល៣ឆ្នាំ។
លោក សំ សុគង់ គឺជាបេក្ខជន ដែលឈរឈ្មោះប្រជែងយកតំណែងជាប្រធានគណៈមេធាវី ជាមួយលោក សួន វិសាល។ ជាលទ្ធផល លោក សួន វិសាល ទទួលបានសំលេងគាំទ្រ៩៣០ ហើយលោក សំ សុគង់ ទទួលបានសំឡេងគាំទ្រ២៨៨។
បើតាមជីវប្រវត្តិខ្លី ដែលបង្ហោះលើគេហទំព័ររបស់គណៈមេធាវី លោក សួន វិសាល មានវ័យ៥៣ឆ្នាំ ហើយលោក បានបំពេញវិជ្ជាជីវៈជាមេធាវី តាំងពីឆ្នាំ១៩៩៨មក។ ចំណែក លោក សំ សុគង់ ដែលល្បីឈ្មោះដោយសារតែការពារក្តីឲ្យគណបក្សប្រឆាំង មានវ័យ៤១ឆ្នាំ និងបានស្បថចូលធ្វើជាមេធាវី ក្នុងឆ្នាំ២០០៣៕