អន្តរជាតិ
ប្រាយុទ្ធ ធ្វើយុទ្ធនាការតាមបណ្ដាញសង្គម ខណៈយោធាបន្តហាមបក្សនយោបាយឃោសនាតាមអនឡាញ
នាយករដ្ឋមន្រ្តីថៃ ប្រាយុទ្ធ ចន្ទអូចា (រូបភាព AFP)
×![]()
ដោយ: តន ចាន់រិទ្ធារ៉ា
មេដឹកនាំរបបយោធាថៃ ប្រាយុទ្ធ ចន្ទអូចា កំពុងប្រើប្រាស់បណ្ដាញសង្គមធំៗដើម្បីទាក់ទងដោយផ្ទាល់ជាមួយប្រជាជនថៃ មុនការបោះឆ្នោតឆ្នាំក្រោយ។ កន្លងមក លោក ប្រាយុទ្ធ តែងតែយកឱកាសកិច្ចប្រជុំគណៈរដ្ឋមន្ត្រីចល័តនៅតាមខេត្តនានាដើម្បីស្ដាប់ទុក្ខលំបាករបស់ប្រជាជន និងដោះស្រាយបញ្ហាផង។ សកម្មភាពរបស់មេដឹកនាំយោធា រងការរិះគន់ ព្រោះលោកហាក់កេងចំណេញនយោបាយ ខណៈអ្នកនយោបាយផ្សេងទៀតនៅជាប់បម្រាមឃោសនាតាមប្រព័ន្ធអនឡាញនៅឡើយ។
នៅចុងសប្ដាហ៍មុន នាយករដ្ឋមន្ត្រីថៃ ប្រាយុទ្ធ បានបើកដំណើរការទំព័រផ្លូវការរបស់ខ្លួននៅលើបណ្ដាញសង្គមល្បីឈ្មោះជាច្រើនដូចជា Facebook, Instagram និង Twitter ។ គោលបំណងនៃការប្រើប្រាស់បណ្ដាញសង្គមនេះ ត្រូវបានលោក ប្រាយុទ្ធ ប្រកាសថា ដើម្បីបង្កើតវេទិកាជាមធ្យោបាយដែលប្រជាជនអាចរិះគន់ ឬក៏លើកសរសើរ ហើយអ្វីៗដែលមានប្រយោជន៍ រដ្ឋាភិបាលរបស់លោកនឹងយកទៅអនុវត្តផងដែរ។
ผมต้องการเปิดเวทีตรงนี้ให้ทุกคนได้มีโอกาส ได้ติ ได้ชมผม อะไรที่เป็นประโยชน์ผมก็จะรับมาพิจารณาดำเนินการให้เหมาะสม pic.twitter.com/Qmx7IwMkHf
— ประยุทธ์ จันทร์โอชา Prayut Chan-o-cha (@prayutofficial) October 16, 2018
យុទ្ធនាការតាមបណ្ដាញសង្គមរបស់លោក ប្រាយុទ្ធ រងប្រតិកម្មខ្លាំង ពិសេសពីអ្នកនយោបាយ។ នេះក៏ព្រោះតែមេដឹកនាំរបបសឹករូបនេះដែលមិនទាន់សម្រេចចិត្តចូលនយោបាយឬយ៉ាងណា អាចប្រើប្រាស់ប្រព័ន្ធអនឡាញបានតាមចិត្ត ស្របពេលក្រុមយោធាបន្តហាមឃាត់គណបក្សនយោបាយទាំងឡាយពីការប្រើប្រាស់វេទិកាអនឡាញដើម្បីធ្វើសកម្មភាពនយោបាយ។ លោក ប្រាយុទ្ធ ហាក់ឆក់ឱកាសដើម្បីបង្កើនទំនាក់ទំនងជាមួយប្រជាជនមុនផែនការបោះឆ្នោតឆ្នាំ២០១៩ ។
ជុំវិញបញ្ហានេះដែរ ប្រធានគណៈកម្មការបោះឆ្នោតថៃ (EC) លោក Itthiporn Boonprakong លើកឡើងថា សកម្មភាពតាមបណ្ដាញសង្គមរបស់លោក ប្រាយុទ្ធ មិនមែនជាការទាក់ទាញសន្លឹកឆ្នោត ដែលផ្ទុយបម្រាមរបស់យោធាឡើយ ប៉ុន្តែគណៈកម្មការលោកនឹងពិនិត្យមើលឲ្យដិតដល់។ លោកបន្តថា EC នឹងប្រមូលព័ត៌មានទាក់ទងសកម្មភាពរបស់បក្សនយោបាយ និងការបោះឆ្នោត ហើយ EC នឹងចាត់វិធានការបើបក្សណាធ្វើខុសច្បាប់។ នេះបើតាមការផ្សាយរបស់កាសែត Bangkok Post ។
លោក ប្រាយុទ្ធ ឯណោះវិញ កំពុងបន្ស៊ាំខ្លួននឹងបច្ចេកវិទ្យាថ្មីនេះ ខណៈដែលការគាំទ្រលើទំព័រថ្មីថ្មោងនៃបណ្ដាញសង្គមកំពុងកើនឡើងខ្លាំង។ ក្រោយកិច្ចប្រជុំគណៈរដ្ឋមន្ត្រីនៅថ្ងៃទី១៦ ខែតុលា មេដឹកនាំរដ្ឋាភិបាលយោធារូបនេះបានប្រាប់អ្នកសារព័ត៌មានថា ពេលលោកចូលប្រើប្រាស់គណនី លោកទទួលបានទាំងការសរសើរ ទាំងពាក្យរិះគន់។ តាមគណនី Twitter របស់ខ្លួន លោក ប្រាយុទ្ធ អះអាងថា បើការរិះគន់លើរូបត្រឹមត្រូវ លោកនឹងកែខ្លួន។
ទោះជាយ៉ាងណា មេដឹកនាំរដ្ឋប្រហារឆ្នាំ២០១៤ រូបនេះ បានស្នើឲ្យអ្នកចូលមកសរសេរលើបណ្ដាញសង្គមរបស់លោកឲ្យរក្សាភាពគួរសម ជាពិសេសក្នុងចំណោមអ្នកប្រើប្រាស់វ័យក្មេងតែម្ដង ដែលលោកមើលឃើញថាជារឿងមិនសមរម្យ។ លោកក៏អំពាវនាវទៅកាន់ប្រជាជនឲ្យបន្តចុច Like លើគណនីរបស់លោក និងដាក់ជាសំណើទៅកាន់ ទោះជាលោកមិនបានតាមដានផ្ទាល់ក្ដី ក៏លោកឲ្យមន្ត្រីរាយការណ៍ទៅលោកដែរ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
