អន្តរជាតិ
លោក ត្រាំ ស្នើតែងតាំងឧត្តមសេនីយ៍ជើងអាកាសចូលនិវត្តន៍ឲ្យទទួលខុសត្រូវកិច្ចការអាស៊ី ឧត្តមសេនីយ៍ជើងអាកាសចូលនិវត្តន៍ David Stilwell (រូបភាពពីគេហទំព័រទ័ពអាកាសអាមេរិក)
× ប្រធានាធិបតីអាមេរិក ដូណាល់ ត្រាំ មានផែនការតែងតាំងឧត្តមសេនីយ៍ជើងអាកាស David Stilwell ឲ្យកាន់តំណែងកំពូលទទួលបន្ទុកកិច្ចការអាស៊ីនៅក្រសួងការបរទេស។ តំណែងនេះបាននៅទំនេរជាងមួយឆ្នាំមកហើយ បើទោះជាបញ្ហានៅអាស៊ីគឺជារឿងប្រឈមដ៏ធំមួយរបស់រដ្ឋបាលលោក ត្រាំ ក៏ដោយ។ បំណងរបស់លោក ត្រាំ ត្រូវបានស្វាគមន៍ ហើយរំពឹងថា អាចទទួលបានការយល់ព្រមពីព្រឹទ្ធសភាអាមេរិកផង។
ក្នុងសេចក្ដីប្រកាសរបស់សេតវិមានថ្ងៃទី១៧ ខែតុលា ប្រធានាធិបតីអាមរិក ដូណាល់ ត្រាំ បង្ហាញបំណងតែងតាំងលោក David Stilwell ដែលជាឧត្តមសេនីយ៍ផ្កាយមួយចូលនិវត្តន៍របស់ទ័ពអាកាស ឲ្យកាន់តំណែងជាឧបការីរដ្ឋមន្ត្រីការបរទេសសម្រាប់កិច្ចការអាស៊ីខាងកើត និងប៉ាស៊ីហ្វិក។ បេក្ខភាពរបស់លោក Stilwell នឹងត្រូវឆ្លងកាត់ដំណាក់កាលព្រឹទ្ធសភាសិន ប៉ុន្តែលោកមានសង្ឃឹមច្រើនដែលអាចឆ្លងផុតដំណាក់កាលនេះ។
ជាអតីតអ្នកបើកបរយន្តហោះចម្បាំងផងនោះ ឧត្តមសេនីយ៍ត្រី Stilwell អាចនិយាយភាសាចិន កូរ៉េ និងជប៉ុនបានយ៉ាងល្អ ដែលនេះទំនងជាចំណុចពិសេសមួយដែលលោក ត្រាំ មើលឃើញ និងប្រគល់តួនាទីដ៏សំខាន់នេះឲ្យ។ កៅអីឧបការីរដ្ឋមន្ត្រីការបរទេសនេះ មិនមានអ្នកអង្គុយជាងមួយឆ្នាំហើយ បន្ទាប់ពីលោក Daniel Russel លាលែងនៅខែមេសា ឆ្នាំ២០១៧ ខណៈកូរ៉េខាងជើងកំពុងអុកឡុកខ្លាំង ហើយទំនាក់ទំនងពាណិជ្ជកម្មជាមួយចិនក៏កាន់តែតានតឹងទៅទៀត។
សេតវិមានបញ្ជាក់ថា លោក Stilwel ដែលចូលនិវត្តន៍នៅឆ្នាំ២០១៥ ក្រោយបំពេញការងារ៣៥ឆ្នាំ។នៅឆ្នាំ១៩៨០ លោកចូលបម្រើការងារក្នុងទ័ពអកាសជាអ្នកជំនាញភាសាកូរ៉េ និងធ្វើការនៅកូរ៉េខាងត្បូង មុនទទួលសញ្ញបត្រផ្នែកសិក្សាអាស៊ី និងភាសាចិន ក្រោយមកធ្វើការនៅជប៉ុន និងចិនដែរ។ លោកជានាយកក្រុមការងារផ្ដោតលើយុទ្ធសាស្ត្រចិនរបស់ទីបញ្ជាការដ្ឋានឥណ្ឌូ-ប៉ាស៊ីហ្វិក ដែលមាននៅមូលដ្ឋាននៅកោះហាវ៉ៃ និងជាអ្នកស្រាវជ្រាវនៅវិទ្យាស្ថាន East West ។
អតីតឧបការី Russel បានស្វាគមន៍គម្រោងរបស់លោក ត្រាំ ។ បើតាមទីភ្នាក់ងារព័ត៌មាន Reuters លោក Russel និយាយថា លោកធ្លាប់ធ្វើការជាមួយ និងស្គាល់លោក Stilwell យ៉ាងច្បាស់ ហើយលោករីករាយដែលលោក ត្រាំ ជ្រើសរើសអ្នកជំនាញកិច្ចការអាស៊ីឲ្យកាន់តំណែងសំខាន់មួយនេះ។ លោកក៏សង្ឃឹមថា ព្រឹទ្ធសភាអាមេរិកនឹងយល់ព្រមដែរ។
អតីតរដ្ឋមន្ត្រីការបរទេសអាមេរិក រិច ធីល័រសិន ធ្លាប់ស្នើបេក្ខភាពលោកស្រី Susan Thornton ឲ្យកាន់តំណែងនេះ។ ប៉ុន្តែលោកស្រីត្រូវបានមន្ត្រីរដ្ឋបាលលោក ត្រាំ ដែលមានជំហរតឹងរ៉ឹងខ្លាំង មើលឃើញថា ជាមនុស្សមានជំហរទន់ភ្លន់ដាក់ចិន ហើយបេក្ខភាពរបស់លោកស្រីក៏មិនបានទៅដល់ព្រឹទ្ធសភាអាមេរិករហូតមក៕
Tag:
អាមេរិក
ដូណាល់ ត្រាំ
David Stilwell
© រក្សាសិទ្ធិដោយ thmeythmey.com