អន្តរជាតិ
ការបញ្ចេញឧស្ម័នកាបូនិចកើនឡើងខ្លាំង ឯការប្រែប្រួលអាកាសធាតុកាន់តែធ្ងន់ធ្ងរ
នាយកប្រតិបត្តិទីភ្នាក់ងារបរិស្ថានអន្តរជាតិ Fatih Birol (រូបភាព AFP)
×![]()
ដោយ: តន ចាន់រិទ្ធារ៉ា
ការបញ្ចេញឧស្ម័នកាបូនិច (CO2) ពីវិស័យថាមពល នឹងកើនឡើងថែមទៀតក្នុងឆ្នាំ២០១៨ នេះ ខណៈនៅឆ្នាំ២០១៧ ការបញ្ចេញឧស្ម័នពុលមួយនេះបានឈានដល់កម្រិតកំណត់ត្រា។ ប្រធានទីភ្នាក់ងារបរិស្ថានអន្តរជាតិ និយាយថា វាធ្វើឲ្យមានភាពស្រពេចស្រពិលដល់ក្នុងកាអនុវត្តកិច្ចព្រមព្រៀងក្រុងប៉ារីស សំដៅកាត់បន្ថយការកើនឡើងកម្ដៅពិភពលោក។ បាតុភូតនេះកំពុងតែបង្កផលប៉ះពាល់សម្រាប់ពិភពលោកដូចជាទឹកជំនន់ គ្រោះរាំងស្ងួត និងគ្រោះធម្មជាតិកាន់តែមហន្តរាយ។
វិស័យថាមពលមានចំណែកចំនួន៨០ភាគរយនៃការបញ្ចេញឧស្ម័នកាបូនិច (CO2) របស់ពិភពលោក ហើយសល់ពីនោះគឺដោយសារការកាប់ព្រៃ និងកសិកម្ម។ នេះមានន័យថា វិស័យមួយនេះដើរសំខាន់ក្នុងការប្រឹងប្រែងទប់ស្កាត់ការកើនឡើងកម្ដៅសាកល។ យ៉ាងណាមិញ ការបញ្ចេញឧស្ម័នមួយនេះពីសំណាក់វិស័យថាមពល ចេះតែបន្តកើនឡើងរហូតដល់ឆ្នាំ២០១៧ ដែលឈានដល់កម្រិតខ្ពស់បំផុតកាលពីឆ្នាំមុន។
នាជំនួបរវាងមន្ត្រីការទូតនៅស្ថានទូតប៉ូឡូញប្រចាំក្រុងប៉ារីសនៅថ្ងៃទី១៧ ខែតុលា ប្រធានប្រតិបត្តិទីភ្នាក់ងារបរិស្ថានអន្តរជាតិ (IEA) លោក Fatih Birol និយាយថា៖ «ខ្ញុំសុំទោស។ ខ្ញុំមានព័ត៌មានអាក្រក់សម្រាប់អ្នកទាំងអស់គ្នា។ ការបញ្ចេញឧស្ម័នផ្ទាំងកញ្ចក់នឹងកើនឡើងម្ដងទៀតនៅឆ្នាំ២០១៨ ។ យើងមានកិច្ចប្រជុំ COP ពេលដែលការបញ្ចេញឧស្ម័នពុលកើនដល់ចំណុចកំណត់ត្រាជាថ្មី»។ នេះបើតាមការផ្សាយរបស់ទីភ្នាក់ងារព័ត៌មាន AFP ។
បន្ទាប់ពីនៅថេរបីឆ្នាំ ការបញ្ចេញកាបូននៅទូទាំងពិភពលោកបានកើនចំនួន១.៤ភាគរយនៅឆ្នាំ២០១៧។ នៅខែធ្នូ ឆ្នាំ២០១៨ ប្រទេសនានានឹងជួបជុំគ្នានៅទីក្រុង Katowice ប្រទេសប៉ូឡូញ នាសន្និសីទលើកទី២៤ នៃភាគីរបស់អនុសញ្ញាក្របខណ្ឌអង្គការសហប្រជាជាតិស្ដីពីប្រែប្រួលអាកាស (COP24) ។ ជំនួបនេះនឹងផ្ដោតសំខាន់លើការបញ្ចប់សៀវភៅណែសម្រាប់អនុត្តកិច្ចព្រមព្រៀងក្រុងប៉ារីស ដែលនឹងចូលធរមាននៅឆ្នាំ២០២០ និងស្នើរក្សាកំណើនកម្ដៅត្រឹម១.៥អង្សាបើអាចធ្វើបាន។
សម្រាប់លោក Birol ឱកាសក្នុងការសម្រេចឲ្យបានគោលដៅខាងលើ បានថយចុះជារៀងរាល់ឆ្នាំ និងរាល់ខែ។ ត្រឹមការកើនឡើងកម្ដៅត្រឹមមួយអង្សានៅពេលសព្វថ្ងៃ ផែនដីទាំងមូលបានរងបញ្ហាមិនចេះចប់ទៅហើយដូចជាការឡើងកម្ដៅខ្លាំង គ្រោះរាំងស្ងួតរយៈពេលវែង ទឹកជំនន់ធំៗ និងព្យុះដែលកើតចេញពីកំណើនកម្ពស់ទឹកសមុទ្រ។
បើគន់គូរបញ្ចូលទាំងការស្ម័គ្រចិត្តរបស់ប្រទេសក្នុងការកាត់បន្ថយការបញ្ចញឧស្ម័នដោយថាមពលផូស៊ីលនោះ ពិភពលោកនឹងមានកំណើនកម្ដៅពី៣ទៅ៤ អង្សានៅចុងសតវត្សរ៍ខាងមុខ។ អតីតរដ្ឋមន្ត្រីការបរទេសបារាំង Laurent Fabius ដែលដឹកនាំការចរចារហូតសម្រេចបានកិច្ចព្រមព្រៀងប៉ារីសចាត់ទុកបម្រែបម្រួលអាកាសធាតុ ជាបញ្ហាពេលខ្លី តែបើក្រឡេកមើលមហន្តរាយវិញ វានឹងកើតឡើងនៅរយៈពេល៥០ឆ្នាំខាងមុខ៕
Tag:
IEA
ប្រែប្រួលអាកាសធាតុ
© រក្សាសិទ្ធិដោយ thmeythmey.com
