Mourinho ប្រាប់មូលហេតុដែលបន្តកិច្ចសន្យាឲ្យ Shaw ជាមួយនឹងការបន្ថែមប្រាក់ឈ្នួល

កីឡាអន្តរជាតិ

អន្តរជាតិ

Mourinho ប្រាប់មូលហេតុដែលបន្តកិច្ចសន្យាឲ្យ Shaw ជាមួយនឹងការបន្ថែមប្រាក់ឈ្នួល

19, Oct 2018 , 7:19 pm

រូបភាព

ដោយ: ទេព ពិទូរ្យ

លោក Jose Mourinho ថា Luke Shaw ពិតជាសមនឹងទទួលបានកិច្ចសន្យាថ្មីរបស់ក្លិប Manchester United បន្ទាប់ពីខ្សែការពារឆ្វេងរូបនេះបានចុះហត្ថលេខាបន្ថែមរយៈពេល ៥ ឆ្នាំទៀតនៅថ្ងៃទី១៨ ខែតុលា ដោយកើនប្រាក់ឈ្នួល ១៥ម៉ឺនផោន (១៩៥០០០ដុល្លារអាមេរិក) ក្នុងមួយសប្តាហ៍។

កីឡាករវ័យ២៣ឆ្នាំ សញ្ជាតិអង់គ្លេសរូបនេះបានខិតជិតនឹងការចាកចេញពី Old Trafford ទៅហើយកាលពីរដូវកាលមុនដ្បិតបានបង្ហាញខ្លួនតិចតួចប៉ុណ្ណោះនៅក្រោមការដឹកនាំរបស់លោក Mourinho។

ប៉ុន្តែនៅរដូវកាលថ្មីនេះ Shaw បានក្លាយជាកីឡាករដ៏ឆ្នើមម្នាក់សម្រាប់ក្រុមរហស្សនាមបិសាចក្រហមជាមួយនឹងទម្រង់លេងដ៏ល្អ ហើយរូបគេត្រូវបានផ្តល់ឲ្យនូវកិច្ចសន្យា ៥ ឆ្នាំ និងលក្ខខណ្ឌបន្តមួយឆ្នាំទៀត។

ជុំវិញការផ្តល់កិច្ចសន្យាថ្មីសម្រាប់កីឡាករដែលទើបជាពីរបួសបាក់ជើង និងឡើងទម្រង់លេងក្នុងរយៈពេលដ៏ខ្លីនេះ អ្នកចាត់ការទូទៅសញ្ជាតិព័រទុយហ្គាល់ បានរៀបរាប់ហេតុផលប្រាប់គេហទំព័រផ្លូវការរបស់ក្លិប Man Utd ថា៖« Shaw ពិតជាសមនឹងទទួលបានកិច្ចសន្យានេះណាស់។ គាត់យល់ពីដំណើរការអភិវឌ្ឍខ្លួនរបស់គាត់ គាត់បានធ្វើការយ៉ាងលំបាកនៅគ្រប់កម្រិតទាំងអស់ហើយគាត់តែងតែជឿជាក់លើខ្លួនឯង ដែលនេះជាគុណសម្បត្តិដ៏អស្ចារ្យដែលរូបគេមាន»។

អត្ថបទទាក់ទង

Luke Shaw រៀបរាប់ថាស្ទើតែបាត់បង់ជើងទៅហើយ កាលបាក់ជើង២កំណាត់

«Shaw នៅក្មេងហើយកំពុងរីកចម្រើនគ្រប់ពេលហើយគាត់ត្រូវតែមានមោទនភាពចំពោះខ្លួនឯង។ ខ្ញុំពិតជារីករាយណាស់ដែលយើងរក្សាកីឡាករវ័យក្មេងដ៏មានទេពកោសល្យរបស់អង់គ្លេសម្នាក់ដែលនឹងភ្លឺស្វាងនៅថ្ងៃអនាគ»។ Mourinho បន្ថែមដូច្នេះ។

កន្លងមក អ្នកចាត់ការរហស្សនាម Special One វ័យ៥៥ឆ្នាំរូបនេះធ្លាប់បានប៉ះទង្គិចគ្នាជាមួយ Shaw ម្តងដែរកាលពី ៧ខែមុន នៅពេលដែល Mourinho បានប្តូរខ្សែការពាររូបនេះនៅពាក់កណ្តាលតង់អំឡុងការប្រកួតដែល Man United យកជ័យជម្នះ ២-០ លើក្រុម Brighton។

កាលនោះ Shaw បានចោទសួរទៅកាន់ Mourinho ភ្លាមៗថា «ហេតុអ្វីបានជាអ្នកតែងតែធ្វើបាបខ្ញុំ?»។

ប៉ុន្តែយ៉ាងណាក៏ដោយ Mourinho មិនបានតបតនឹងសំណួរបែបរិះគន់របស់អតីតខ្សែការពារ Southampton នេះឡើយ៕