-ស្មេរសាកល្បង ចងចែងចារ ថ្លាថ្លែងស្តី
ជាកាព្យខ្លី ស្តីតាមចាំ សាំកុំថា
រាប់រឿងសត្វ អត្តច្បាស់ ចាស់ចែងចារ
ទាំងរុក្ខា ថាអ្នកចាំ ផ្តាំចែកទៀត។
-ផ្តើមពីត្នោត ដោតដាំដុះ ច្រុះច្រូងច្រាង
ឈើតំណាង តាងនាមខ្មែរ ថែឈ្មោះជាតិ
ផ្ការំដួល ឆួលក្រអូប ស្រូបអស់ញាតិ
ផ្កាតាងជាតិ ឃ្លាតទៅឆ្ងាយ ស្តាយបុប្ផា។
-ចេកពងមាន់ គ្រាន់ក្រៃណា តាតាក់តែង
ចេកជាតិឯង ស្តែងអត្ត ឆ្លាក់ខេមរា
គោព្រៃម្រឹគ ទឹកមានត្រី ល្បីមច្ឆា
ប្រាប់តាមតា ថានោះអី ត្រីគាល់រាំង។
-អណ្តើកហ្លួង ជួងគេគោះ គ្រោះក្រៃក្រាស់
សល់តិចណាស់ ខ្វះជម្រក ជ្រកពារពាំង
សត្វត្រយ៉ង ផ្សងជីវិត ជិតឆ្ងាយគាំង
ស្ទុះដូចស្ទាំង ទាំងភិតភ័យ ព្រៃប្រួលប្រែ៕