អន្តរជាតិ
កិច្ចចរចាសន្តិភាពមីយ៉ាន់ម៉ា៖ លោកស្រី ស៊ូជី អំពាវនាវឲ្យគ្រប់ភាគីពាក់ព័ន្ធបើកចិត្តឲ្យទូលាយ
× ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បានអំពាវនាវដល់ភាគីពាក់ព័ន្ធនៃការចរចាសន្តិភាពមីយ៉ាន់ម៉ា បើកចិត្តឲ្យទូលាយ និងធ្វើសម្បទានឲ្យគ្នាទៅវិញទៅមកដើម្បីបញ្ចប់ជម្លោះប្រដាប់អាវុធរាប់សិបទសវត្សរ៍ហើយនោះ។ សម្រាប់លោកស្រី ការធ្វើបែបនេះ មិនមែនដើម្បីផលប្រយោជន៍ណាឡើយ តែដើម្បីបង្ហាញពីការទទួលខុសត្រូវចំពោះមុខប្រជាជន។
នាថ្ងៃដំបូង នៃជំនួបចរចាសន្តិភាពជាតិរយៈពេលប្រាំថ្ងៃ នៅថ្ងៃ១៥ តុលាកន្លងទៅ លោកស្រី ទីប្រឹក្សារដ្ឋ អ៊ុងសាន ស៊ូជី បានថ្លែង វាជារឿងសំខាន់ណាស់ ដែលភាគីពាក់ព័ន្ធទាំងអស់ត្រូវចូលរួម ហើយភាគីនីមួយៗ ក៏គួរតែបើកចិត្តឲ្យទូលាយដើម្បីឲ្យដំណើរការចរចាអាចបន្តទៅមុខ និងឈានដល់ការបញ្ចប់ជម្លោះប្រដាប់អាវុធនៅក្នុងប្រទេស។ នេះបើយោងតាមការចុះផ្សាយរបស់សារព័ត៌មាន Myanmar Times។
នាជំនួបដដែលនោះ លោកស្រី ស៊ូជី នៅចំពោះមុខមន្ត្រីជាន់ខ្ពស់រដ្ឋាភិបាល យោធា និងតំណាងក្រុមជនជាតិភាគតិច ដែលជាក្រុមប្រដាប់ផងដែរនោះ បានសង្កត់ធ្ងន់ថា មេដឹកនាំទាំងអស់ដែលហ៊ានសម្រេចចិត្ត កំពុងតែចូលរួមក្នុងកិច្ចប្រជុំ ហើយ ក៏ត្រូវចាំផងដែរថា ប្រសិនការធ្វើសម្រេចចិត្តនេះ ធ្វើឡើងទៅដោយគ្មានទំនុកចិត្តនោះទេ ភាគីទាំងអស់ នឹងត្រូវទទួលខុសត្រូវចំពោះមុខប្រជាជនហើយ។
តាមប្រភពព័ត៌មានដដែលនោះ នាថ្ងៃដំបូងនៃជំនួប ភាគីពាក់ព័ន្ធសម្រេចបានកិច្ចព្រមព្រៀងជាច្រើន ខណៈបញ្ហារសើបជាច្រើនរួមទាំងបញ្ហាធ្វើវិសោធនកម្មរដ្ឋធម្មនុញ្ញ ក៏កំពុងតែស្ថិតនៅក្នុងរបៀបវារៈប្រជុំផងដែរ។ ក៏ប៉ុន្តែលោកស្រី ស៊ូជី ដែលជាប្រមុខនៃបក្សកាន់អំណាចផងនោះ ក៏បានទទូចឲ្យមេដឹកនាំទាំងអស់ ផ្តល់អនុសាសន៍ដែលយកទៅអនុវត្តហើយភាគីទាំងអាចទទួលបាន។
គួរជម្រាបផងដែរ ក្រោយពីទទួលបានឯករាជ្យនៅឆ្នាំ ១៩៤៨មក មីយ៉ាន់ម៉ា មកទល់ពេលនេះ នៅមិនទាន់អាចធានាសន្តិភាពទូទាំងប្រទេសបានឡើយ។ រដ្ឋអាស៊ីអាគ្នេយ៍ ដែលត្រូវបានយោធាក្តោបក្តាប់អំណាចពីមុនច្រើនទសវត្សរ៍ហើយនោះ តែងតែមានការប៉ះទង្គិចគ្នារវាងកម្លាំងរដ្ឋាភិបាល និងឧទ្ទាមជនជាតិភាគតិចប្រដាប់អាវុធជាបន្តបន្ទាប់។
ទោះបីជាកិច្ចចរចាសន្តិភាពរហូតដល់មានការចុះកិច្ចព្រមព្រៀងបទឈប់បាញ់ថ្នាក់ជាតិ ត្រូវបានបើកទូលាយក៏ដោយ ក្រុមឧទ្ទាមជនជាតិភាគតិចមួយចំនួនទៀត នៅមិនទាន់ព្រមចុះចូលនៅឡើយនោះទេ។ ពួកគេ មានលក្ខខណ្ឌច្រើន ជាមួយនឹងរដ្ឋាភិបាលមីយ៉ាន់ម៉ា ពាក់ព័ន្ធនឹងស្វ័យភាពគ្រប់គ្រងតំបន់៕
Tag:
មីយ៉ាន់ម៉ា
អាស៊ាន
© រក្សាសិទ្ធិដោយ thmeythmey.com