ជាតិ
សមាគមអតីតនិស្សិតជប៉ុននៅកម្ពុជាទទួលពានរង្វាន់ពីរដ្ឋាភិបាលជប៉ុនលើការរឹតចំណងមិត្តកម្ពុជា-ជប៉ុន
×![]()
សៀមរាប៖ សមាគមអតីតនិស្សិតជប៉ុននៅកម្ពុជា បានទទួលពានរង្វាន់ពីរាជរដ្ឋាភិបាលជប៉ុន សម្រាប់ការខិតខំប្រឹងប្រែងរបស់សមាគមក្នុងការរិតចំណងមិត្តភាពរវាងប្រទេសខ្លួនជាមួយប្រទេសជប៉ុន។ ពានរង្វាន់នេះធ្វើឡើងក្នុងឱកាសដែលសមាគមនេះទទួលរៀបចំសន្និសីទក្រុមប្រឹក្សាអតីតនិស្សិតអាស៊ានមកពីប្រទេសជប៉ុន(Asean Council of Japan Alumni = ASCOJA) លើកទី២៤ នៅខេត្តសៀមរាប។ 
ប្រធានសមាគមអតីតនិស្សិតជប៉ុននៅកម្ពុជា លោក វុទ្ធី មុនីរ័ត្ន បានឱ្យដឹងថា លោករីករាយជាខ្លាំង និងមិននឹកស្មានថា បានទទួលពានរង្វាន់នេះទេពីមុន។ លោកថា ពានរង្វាន់នេះទទួលបានដោយសារការខិតខំប្រឹងប្រែងរបស់សមាជិកសមាគមទាំងអស់ តាមរយៈការងារជាច្រើនរបស់សមាគម។ តាមការបញ្ជាក់របស់លោក វុទ្ធី មុនីរ័ត្ន កន្លងមកសមាគមលោកបានធ្វើការផ្សព្វផ្សាយពីការសិក្សានៅក្នុងប្រទេសជប៉ុន ទាក់ទងនឹងអរិយធម៌ ការរស់នៅ និងភាពអស្ចារ្យរបស់ប្រទេសនេះដល់សិស្សនិស្សិតខ្មែរ ដែលមានបំណងចង់ទៅបន្តការសិក្សានៅទីនោះជាដើម។ល។
គួរបញ្ជាក់ថា ពានរង្វាន់នេះត្រូវបានប្រគល់ជូនសមាគមអតីតនិស្សិតជប៉ុននៅកម្ពុជា នៅក្នុងពិធីជប់លៀងក្នុងឱកាសសន្និសីទលើកទី២៤ នៃ ASCOJA ដែលរៀបចំឡើងដោយស្ថានទូតជប៉ុនប្រចាំកម្ពុជា នៅល្ងាចថ្ងៃទី២០ តុលា នៅសណ្ឋាគារ សុខាសៀមរាប។ សមាគមអតីតនិស្សិតជប៉ុននៅកម្ពុជា បានបង្កើតឡើងនៅឆ្នាំ ២០០២។ តាំងពីឆ្នាំ ១៩៩៣មក មាននិស្សិតខ្មែរជាង ១២០០នាក់ហើយ ដែលបានទៅសិក្សានៅប្រទេសជប៉ុន៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
