រថយន្ត
អន្តរជាតិ
×![]()
ដោយ: ធីតា
តាក់ស៊ីលើអាកាសនឹងត្រូវដាក់ដំណើរការសាកល្បងនៅក្នុងប្រទេសសិង្ហបុរី នាពាក់កណ្តាលឆ្នាំ២០១៩ ។ នេះបើតាមការប្រកាសរបស់ក្រុមហ៊ុនអាល្លឺម៉ង់ Volocopter នាកិច្ចប្រជុំស្តីពីស្វ័យតភាព និងចលភាពនៅក្រុងប៉ារីស ប្រទេសបារាំង កាលពីថ្ងៃទី១៨ ខែតុលា។
យានយន្តហោះនេះ ត្រូវបានគេដាក់ឈ្មោះថា Volocopter ដោយវាប្រើប្រាស់ថាមពលអគ្គិសនី និងអាចប្រតិបត្តិការស្របតាមបរិស្ថាននៅក្នុងក្រុងសិង្ហបុរី។ យាននេះ អាចផ្ទុកមនុស្សបាន២នាក់សម្រាប់ចម្ងាយតិចជាង៣០គីឡូម៉ែត្រ។
បើទោះបីជាមានរាងដូចជាឧទ្ធម្ភាគចក្រក៏ដោយ ប៉ុន្តែ Volocopter ត្រូវអនុវត្តតាមបច្ចេកវិទ្យា Drone (យន្តហោះដែលគ្មានមនុស្សជិះ)។ វាអាចហោះហើរដោយស្វ័យប្រវត្តិ តាមរយៈការបញ្ជាដោយ Joystick (ប្រដាប់បញ្ជា) ពីចម្ងាយ។
ក្រុមហ៊ុន Volocopter បានបញ្ជាក់ប្រាប់សារព័ត៌មាន Channel NewsAsia ថា ក្រុមហ៊ុននឹងសិក្សាលម្អិតលើលក្ខខណ្ឌហោះហើរដែលសមស្របបំផុត ជាពិសេសការគោរពតាមប្រព័ន្ធគ្រប់គ្រងនៃការប្រើប្រាស់ចរាចរណ៍ផ្លូវអាកាសក្នុងប្រទេសសិង្ហបុរី។
បន្ថែមពីលើនេះទៀត ក្រុមហ៊ុនអាល្លឺម៉ង់ និងអាជ្ញាធរពាក់ព័ន្ធរបស់សិង្ហបុរី នឹងសិក្សាលើទីតាំងចុះចតភ្លាមៗ នៅមានភ្លៀងខ្លាំង ឬខ្យល់ត្រូពិក ជាច្រើន។ ក្រសួងដឹកជញ្ជូនសិង្ហបុរី (MOT) និងអាជ្ញាធរអាកាសចរណ៍ស៊ីវិលសិង្ហបុរី (CAAS) បានអះអាងថា ការសាកល្បងនឹងធ្វើឡើងនៅលើទីតាំងដែលមានការត្រួតពិនិត្យច្បាស់លាស់ ពោលគឺមិនមែនតំបន់ដែលមានមនុស្សចរាចរណ៍ច្រើន ឬកន្លែងដែលសំបូរទៅដោយអចលនទ្រព្យនោះទេ។
ក្រៅពីអះអាងពីកិច្ចសហប្រតិបត្តិការខ្លួនលើដំណើរការសាកល្បងតាក់ស៊ីលើអាកាសនេះ អាជ្ញាធរសិង្ហបុរី បានលើកឡើងពីកិច្ចប្រឹងប្រែងរបស់ខ្លួនក្នុងការការពារបរិស្ថាន ពីព្រោះថា យានដែលប្រើបច្ចេកវិទ្យា Drone តែងតែមានសុវត្ថិភាពជាង ស្ងាត់ស្ងៀមជាង និងថោកជាងឧទ្ធម្ភាគចក្រធម្មតា។
Volocopter បានបញ្ជាក់ថា ពួកគេបានហោះហើរជាទៀងទាត់នៅអាល្លឺម៉ង់ បន្ទាប់ពីទទួលបានលិខិតអនុញ្ញាតបឋមចាប់តាំងពីឆ្នាំ២០១៦មក។ ក្រុមហ៊ុនកំពុងព្យាយាមសុំអាជ្ញាបណ្ណពាណិជ្ជកម្មពេញលេញជាមួយទីភ្នាក់ងារសុវត្ថិភាពអាកាសចរណ៍អឺរ៉ុប៕
© រក្សាសិទ្ធិដោយ thmeythmey.com
