បេក្ខជនប្រធានាធិបតីឥណ្ឌូណេស៊ីសន្យាពិនិត្យគម្រោងហេដ្ឋារចនាសម្ព័ន្ធចិនឡើងវិញ បើឈ្នះឆ្នោត

អន្តរជាតិ

បេក្ខជនប្រធានាធិបតីឥណ្ឌូណេស៊ីសន្យាពិនិត្យគម្រោងហេដ្ឋារចនាសម្ព័ន្ធចិនឡើងវិញ បើឈ្នះឆ្នោត

23, Oct 2018 , 11:12 am

រូបភាព

ដោយ: សៅ ផលនិស្ស័យ (Sao Phal Niseiy)

បេក្ខជនប្រធានាធិបតីឥណ្ឌូណេស៊ី និងអតីតឧត្តមសេនីយ៍ Prabowo Subianto សន្យាត្រួតពិនិត្យគម្រោងហេដ្ឋារចនាសម្ព័ន្ធក្រោម«គម្រោងខ្សែក្រវាត់មួយវិថីមួយ»ឡើងវិញ បើសិនជាលោកឈ្នះឆ្នោតឆ្នាំក្រោយ។ គម្រោងដែលត្រូវត្រួតពិនិត្យមុនគេគឺ គម្រោងសង់ផ្លូវរថភ្លើងលឿនពីហ្សាការតាទៅកាន់ក្រុងបានឌុងដែលមានតម្លៃ ៤,៥ពាន់លានដុល្លារ។

ខណៈការបោះឆ្នោតប្រធានាធិបតីកាន់តែជិតមកដល់ អ្នកនយោបាយឥណ្ឌូណេស៊ីចាប់ផ្តើមនិយាយឃោសនាពីគោលនយោបាយរបស់ខ្លួនដើម្បីទាញយកសំឡេងគាំទ្រ។ អ្វីដែលគួរឲ្យកត់សម្គាល់ការសន្យាត្រួតពិនិត្យឡើងវិញគម្រោងសាងសង់ហេដ្ឋារចនាសម្ព័ន្ធរបស់ចិនក្លាយជារឿងពេញនិយមមួយសម្រាប់អ្នកប្រកួតប្រជែងជាមួយប្រធានាធិបតីបច្ចុប្បន្នលោក ចូកូ វីដូដូ។

យោងតាមសារព័ត៌មាន South China Morning Post អ្នកដឹកនាំឃោសនា និងជាប្អូនប្រុសបេក្ខជនប្រធានាធិបតី និងជាអតីតឧត្តមសេនីយ៍យោធា Prabowo Subianto លោក Hashim Djojohadikusumo បានអះអាងថា បើសិនបងប្រុសលោកជាប់ឆ្នោត វានឹងមានការត្រួតពិនិត្យមើលឡើងវិញរាល់គម្រោងក្រោមខណ្ឌ «គំនិតផ្តួចផ្តើមចិនខ្សែក្រវាត់មួយវិថីមួយ»។

ពេលថ្លែងទៅកាន់អ្នកសារព័ត៌មាន លោក Djojohadikusumo ដែលជាអ្នកជំនួញដ៏ស្តុកស្តម្ភនោះបាននិយាយដូច្នេះ៖ «ចិននិងឥណ្ឌូណេស៊ីមានទំនាក់ទំនងល្អ ប៉ុន្តែខ្ញុំគិតថា វាមានគម្រោងមួយចំនួនដែលយើងចង់ពិនិត្យមើល។ ខ្ញុំជឿជាក់ថា គម្រោងហេដ្ឋារចនាសម្ព័ន្ធណាចាំបាច់ ហើយគម្រោងខ្លះទៀតគឺមិនចាំបាច់ឡើយ»។

សូមទាញការចាប់អារម្មណ៍បន្តិចថា លោក Djojohadikusumo និងលោក Prabowo ជាកូនរបស់អតីតរដ្ឋមន្ត្រីឥណ្ឌូណេស៊ីលោក Sumitro Djojohadikusumo ចន្លោះពីឆ្នាំ ១៩៥០ ដល់ឆ្នាំ ១៩៧០ ហើយលោកត្រូវបានគេចាត់ទុកជាស្ថាបត្យករនៃសេដ្ឋកិច្ចសម័យទំនើបរបស់ឥណ្ឌូណេស៊ីផងដែរ។

លោក Djojohadikusumo ជាអ្នកផ្តល់វិភាគទានចម្បងដើម្បីគាំទ្របងប្រុសរបស់លោកដើម្បីប្រកួតប្រជែងយកកៅអីប្រធានាធិបតីនៃរដ្ឋម៉ូស្លីមធំជាងគេ និងប្រទេសដែលមានសេដ្ឋកិច្ចធំផុតគេនៅអាស៊ាន។ កាលពីឆ្នាំ ២០១៤ លោកក៏បានផ្តល់វិភាគទានច្រើនដែរដើម្បីគាំទ្រលោក Prabowo ប៉ុន្តែកាលនោះលោក Prabowo បានចាញ់ការប្រកួតប្រជែងជាមួយប្រធានាធិបតីបច្ចុប្បន្នលោក ចូកូ វីដូដូ។

ត្រឡប់មកវិញ ប្រធានក្រុមឃោសនាខាងលើបញ្ជាក់ថា ក្នុងពេលបងប្រុសលោកជាប់ឆ្នោត គម្រោងផ្គត់ផ្គង់ដោយហិរញ្ញវត្ថុចិនដែលត្រូវត្រួតពិនិត្យឡើងវិញមុនដំបូងគេនោះគឺ ផ្លូវរថភ្លើងល្បឿនលឿនដែលកំពុងត្រូវបានគេសាងសង់ភ្ជាប់ពីរដ្ឋធានីហ្សាការតាទៅកាន់ក្រុងបានឌុងដែលមានចម្ងាយ ១៥០គីឡូម៉ែត្រ។ ផ្លូវនេះត្រូវចំណាយថវិកាសរុបអស់ប្រមាណ៤,៥ពាន់លានដុល្លារដែលជាកម្ចីពីធនាគារអភិវឌ្ឍន៍របស់ចិន។

កាលពីខែមេសាកន្លងទៅ ចិន និងឥណ្ឌូណេស៊ីបានចុះកិច្ចព្រមព្រៀងចំនួន ៥ ដែលមានទំហំទឹកប្រាក់លើ ២៣ ពាន់លានដុល្លារ ក្នុងនោះមានគម្រោងសាងសង់វារីអគ្គិសនីចំនួនពីរនៅកាលីម៉ាន់តាន់ខាងជើង រោងចក្រថាមពលអគ្គិសនីមួយកន្លែង និងរោងចក្ររំលាយដែកថែបមួយកន្លែងផង។

គម្រោងសាងសង់ហេដ្ឋារចនាសម្ព័ន្ធពាសពេញឥណ្ឌូណេស៊ីស្ថិតក្រោមអាណត្តិរបស់លោក ចូកូ វីដូដូ មានទំហំសរុបប្រហែល ៣៥៥ពាន់លានដុល្លារ។ ក្រុមអ្នករិះគន់អះអាងថា គម្រោងទាំងនេះមានតម្លៃខ្ពស់កប់ពពកដែលសហគ្រាសរដ្ឋ និងថវិកាជាតិមិនអាចរ៉ាប់រងបាន។ គេលើកហេតុផលថា បច្ចុប្បន្នសេដ្ឋកិច្ចឥណ្ឌូណេស៊ីកំពុងដាំក្បាលចុះរាប់ចាប់ពីមានវិបត្តិសេដ្ឋកិច្ចតំបន់ឆ្នាំ ១៩៩៨៕