អន្តរជាតិ
មេដឹកនាំកាមេរ៉ូនវ័យ ៨៥ឆ្នាំលោក Paul Biya ឈ្នះឆ្នោតប្រធានាធិបតីសម្រាប់អាណត្តិទី ៧
× មេដឹកនាំកាន់តំណែងយូរជាងគេមួយប្រចាំទ្វីបអាហ្វ្រិកលោក Paul Biya ទទួលជ័យជម្នះជាថ្មីទៀតដោយបន្តកាន់តំណែងសម្រាប់អាណត្តិទីប្រាំពីរជាប្រធានាធិបតីកាមេរ៉ូន បន្ទាប់ពីក្រុមប្រឹក្សាធម្មនុញ្ញប្រកាសលទ្ធផលផ្លូវការនៅថ្ងៃចន្ទទី ២២ ខែតុលា។ គេនឹងឃើញមេដឹកនាំវ័យ ៨៥ឆ្នាំរូបនេះបន្តកាន់តំណែងរហូតដល់វ័យ ៩២ឆ្នាំ និងអាចបន្តកាន់តំណែងទៅមុខតាមស្ថានភាពជាក់ស្តែងផង។
បន្ទាប់ពីមានការបោះឆ្នោតប្រធានាធិបតីថ្ងៃ ៧ ខែតុលា ដែលពោរពេញដោយភាពមិនប្រក្រតី ការគំរាមកំហែងនិងទិញសន្លឹកឆ្នោត ក្រុមប្រឹក្សាធម្មនុញ្ញដែលមានអំណាចសម្រេចចុងក្រោយលើលទ្ធផលបោះឆ្នោតបានប្រកាសថា លោក Paul Biya ប្រធានាធិបតីជិតផុតអាណត្តិជាអ្នកឈ្នះ។
បើតាមទីភ្នាក់ងារព័ត៌មាន AFP វាជាជ័យជម្នះសម្រាប់អាណត្តិទីប្រាំពីរហើយសម្រាប់លោក Paul Biya ដែលមានវ័យ ៨៥ឆ្នាំរូបនេះ ហើយលោកនឹងបន្តកាន់អំណាចក្នុងរយៈពេល ៧ឆ្នាំទៀតរហូតដល់លោកឈានដល់វ័យ ៩២ឆ្នាំឯណោះ។
តាមពិតទៅ ចំនួនអ្នកទៅបោះឆ្នោតកាលពីថ្ងៃ ៧ ខែតុលាការមានកម្រិតទាបខ្លាំង ប៉ុន្តែយោងតាមលទ្ធផល មេដឹកនាំកាន់តំណែងយូរជាងគេលេខរៀងទីពីរប្រចាំអាហ្វ្រិក Paul Biya នេះបានទទួលសំឡេងគាំទ្រប្រមាណ ៧១,៣ ភាគរយ។ ចំណែគូប្រជែងនយោបាយលោក Paul Biya គឺលោក Maurice Kamto បានទទួលសំឡេងគាំទ្រត្រឹម ១៤,២ភាគរយប៉ុណ្ណោះ។
ក្រោយការបោះឆ្នោត ខាងបេក្ខជនបក្សប្រឆាំងបានដាក់ពាក្យប្តឹង និងទាមទារឲ្យមានការបោះឆ្នោតឡើងវិញដោយសារមានបញ្ហាប្រឈមច្រើនជាពិសេសហិង្សាប្រដាប់អាវុធ និងការគំរាមកំហែងជាដើម។ ប៉ុន្តែបណ្តឹងទាំងអស់ត្រូវបានក្រុមប្រឹក្សាធម្មនុញ្ញដែលតែងតាំងដោយប្រធានាធិបតី Biya ទាត់ចោល ហើយអះអាងថា ការបោះឆ្នោតប្រព្រឹត្តទៅដោយសេរី យុត្តិធម៌ និងត្រឹមត្រូវ។
តំបន់និយាយភាសាអង់គ្លេសចំនួនពីរ Yaoundé និង Douala ប្រឈមនឹងការវាយប្រហាររបស់ក្រុមផ្តាច់ខ្លួន និងហិង្សាប្រដាប់អាវុធ មានចំនួនអ្នកទៅបោះឆ្នោតតិចជាងគេ។ បើតាមរបាយការណ៍ផ្លូវការរបស់រដ្ឋាភិបាលកាមេរ៉ូន អ្នកទៅបោះឆ្នោតនៅតំបន់ទាំងពីរនោះមានចំនួន ១៦ភាគរយប៉ុណ្ណោះ។
សូមបញ្ជាក់ថា លោក Paul Biya បន្តកាន់អំណាចរយៈពេលជាង បួនទសវត្សរ៍មកហើយមកដល់បច្ចុប្បន្ន។ លោកកាន់តំណែងជានាយករដ្ឋមន្ត្រីអស់ ៧ឆ្នាំ (ពីឆ្នាម ១៩៧៥ដល់ឆ្នាំ ១៩៨២) និងបន្តកាន់តំណែងជាប្រធានាធិបតីនៃរដ្ឋសាហារ៉ាអាហ្វ្រិកនេះរយៈពេល ៣៦ឆ្នាំ (១៩៨២ ដល់បច្ចុប្បន្ន)។ ក្នុងឆ្នាំ ២០០៨ មេដឹកនាំរូបនេះបានបំពេញមហិច្ឆតារបស់ខ្លួនដោយចាប់ផ្តើមកែរដ្ឋធម្មនុញ្ញលុបចោលមាត្រាដែលកំណត់អាណត្តិប្រធានាធិបតី ហើយវាបានត្រួសត្រាយផ្លូវសម្រាប់លោកឲ្យកាន់អំណាចបានគ្មានកាលកំណត់៕
Tag:
កាមេរ៉ូន
Paul Biya
អាហ្វ្រិក
© រក្សាសិទ្ធិដោយ thmeythmey.com