ក្រុមហ៊ុន Apple ជ្រើសរើសថៃសម្រាប់ទីតាំងអាជីវកម្មទីពីររបស់ខ្លួនប្រចាំតំបន់អាស៊ាន

អន្តរជាតិ

ក្រុមហ៊ុន Apple ជ្រើសរើសថៃសម្រាប់ទីតាំងអាជីវកម្មទីពីររបស់ខ្លួនប្រចាំតំបន់អាស៊ាន

26, Oct 2018 , 7:39 pm

រូបភាព

ដោយ:

ក្រុមហ៊ុន អេបផល (Apple) កំពុងបន្តបង្កើនកិច្ចខិតខំប្រឹងប្រែងរបស់ខ្លួនក្នុងតំបន់អាស៊ីអាគ្នេយ៍ ដែលជាទីផ្សារមានសន្ទុះខ្លាំងក្លា ជាមួយប្រជាជនដល់ទៅជាង៦៤០លាននាក់។ គេមើលឃើញបែបនេះគឺ បន្ទាប់ក្រុមហ៊ុនដែលទទួលបានចំណូលជាង២២៩ពាន់លានដុល្លារកាលពីឆ្នាំ២០១៧នេះ បានជ្រើសរើសប្រទេសថៃសម្រាប់ទីតាំងអាជីវកម្មទីពីររបស់ខ្លួនក្នុងតំបន់។

ក្រុមហ៊ុន អេបផល កាលពីថ្ងៃទី២៤ ខែតុលា បានបង្ហាញថា ខ្លួននឹងបើកដំណើរការហាងអេបផលទីពីរប្រចាំតំបន់អាស៊ាន នៅថ្ងៃទី១០ ខែវិច្ឆិកាខាងមុខ។ បើតាមសារបង្ហោះនៅលើវេបសាយផ្លូវការរបស់ក្រុមហ៊ុនអេបផល ហាងអាជីវកម្មរបស់ក្រុមហ៊ុនបច្ចេកវិទ្យាយក្សនេះ នឹងមានទីតាំងនៅក្នុងផ្សារទំនើបធំបំផុតប្រចាំទីក្រុងបាងកកឈ្មោះថា Iconsiam ដែលកំពុងស្ថិតក្រោមការសាងសង់ និងគ្រោងបើកដំណើរការនាខែក្រោយនេះ។

តាមពិតទៅ នៅពេលទីតាំងអាជីវកម្មរបស់អេបផលថ្មីនេះបើកជាផ្លូវការនោះ ហាងថ្មីនេះនឹងក្លាយជាហាងអាជីវកម្មផ្លូវការទីពីររបស់ក្រុមហ៊ុនអេបផល ក្នុងតំបន់អាស៊ីអាគ្នេយ៍ បន្ទាប់ពីហាងទីមួយបានបើកដំណើរកាលពីឆ្នាំ២០១៧ក្នុងប្រទេសសិង្ហបុរី។

វត្តមានជាផ្លូវការរបស់ក្រុមហ៊ុនអេបផលក្នុងតំបន់អាស៊ី គឺមានកម្រិតនៅឡើយទៅលើទីផ្សារធំៗមួយចំនួន រួមមានដូចជា ចិន ហុងកុង និងជប៉ុនជាដើម។ ប៉ុន្តែនាប៉ុន្មានឆ្នាំចុងក្រោយនេះ ក្រុមហ៊ុនអេបផលបានសម្រេចបើកដំណើរហាងអាជីវកម្មផ្លូវការរបស់ខ្លួនក្នុងប្រទេសចំនួនបី ក្នុងនោះរួមមាន កូរ៉េខាងត្បូង កោះតៃវ៉ាន់ និងសិង្ហបុរី។

យោងតាមវេបសាយបច្ចេកវិទ្យាដ៏ធំ TechCrunch បន្ទាប់ពីប្រទេសថៃ ក្រុមហ៊ុនបច្ចេកវិទ្យាយក្សអេបផល កំពុងពិចារណាលើប្រទេសចំនួនពីរទៀត សម្រាប់ទីតាំងអាជីវកម្មរបស់ខ្លួនក្នុងតំបន់អាស៊ីអាគ្នេយ៍ ហើយប្រទេសទាំងនោះគឺ ឥណ្ឌូណេស៊ី និងវៀតណាម។

បច្ចុប្បន្ននេះ ប្រទេសស្ទើរតែទាំងអស់ក្នុងតំបន់អាស៊ីអាគ្នេយ៍ បានទិញអាជ្ញាបណ្ណហាងអាជីវកម្មអេបផលពីភាគីទីបី, បើកដំណើរការហាងអាជីវកម្មមិនផ្លូវការ, ប្រើប្រាស់សេវកម្មពាណិជ្ជកម្មតាមប្រព័ន្ធអេឡិចត្រូនិក Lazada (ជាកម្មសិទ្ធរបស់ក្រុមហ៊ុនអេលីបាបា) និងជាហាងអនឡាញរបស់ក្រុមហ៊ុនអេបផលផ្ទាល់តែម្តង។ ក្រៅពីតំបន់អាស៊ីអាគ្នេយ៍ ក្រុមហ៊ុនអេបផលបានព្យាយាមនាំយកហាងអាជីវកម្មរបស់ខ្លួនទៅកាន់ប្រទេសឥណ្ឌា ប៉ុន្តែបទបញ្ញាតិ្តស្តីពីការបើកដំណើរការហាងអាជីវកម្មរបស់ក្រុងដេលីបានរារាំងគម្រោងរបស់អេបផល៕