មហាធៀ សន្យាជួយរដ្ឋាភិបាលថៃដោះស្រាយជម្លោះហិង្សានៅខេត្តភាគខាងត្បូង

អន្តរជាតិ

មហាធៀ សន្យាជួយរដ្ឋាភិបាលថៃដោះស្រាយជម្លោះហិង្សានៅខេត្តភាគខាងត្បូង

26, Oct 2018 , 9:19 pm

រូបភាព

ដោយ: សៅ ផលនិស្ស័យ (Sao Phal Niseiy)

នាយករដ្ឋមន្ត្រីម៉ាឡេស៊ីទើបបញ្ចប់ទស្សនកិច្ចផ្លូវការរយៈពីរថ្ងៃនៅប្រទេសថៃចាប់ពីថ្ងៃពុធទី ២៤ខែតុលា។ ទស្សនកិច្ចរបស់មេដឹកនាំម៉ាឡេស៊ីនៅថៃពេលនេះបានជួយប្រស់ក្តីសង្ឃឹមក្នុងការស្វែងរកសន្តិភាពនៅតំបន់ភាគខាងត្បូងដែលញ៉ាំញ៉ីដោយហិង្សាប្រដាប់អាវុធអស់រាប់ឆ្នាំមកនេះ។

ថ្ងៃ ២៥ ខែតុលា ប្រមុខរដ្ឋាភិបាលម៉ាឡេស៊ីលោក មហាធៀ មហាម៉ាត់ បានសន្យាជួយគាំទ្ររដ្ឋាភិបាលថៃដឹកនាំដោយលោក ប្រាយុទ្ធ ចន្ទអូចា ក្នុងការចាប់ផ្តើមឡើងវិញនូវការស្វែងរកសន្តិភាពនៅតំបន់ភាគខាងត្បូងដែលមានចលនាទាមទារផ្តាច់ខ្លួននោះ។

នៅក្នុងពេលផ្តល់បឋកថាសាធារណៈនៅសាកលវិទ្យាល័យជូឡាឡុងកន លោក មហាធៀ បាននិយាយដូច្នេះ៖«ថៃមានបញ្ហានៅភាគខាងត្បូងប្រទេស។ យើងមានអារម្មណ៍ថា វាជាកាតព្វកិច្ចរបស់យើងក្នុងការជួយថៃដើម្បីដោះស្រាយជម្លោះនៅភាគខាងត្បូង។ ប្រទេសនេះមានជម្លោះ វាជារឿងចាំបាច់ដែលត្រូវដោះស្រាយបញ្ហានេះដោយសន្តិវិធី។ នៅម៉ាឡេស៊ីយើងជឿជាក់លើការចរចាគ្នាមិនមែនសង្គ្រាម»។

យោងតាមទីភ្នាក់ងារព័ត៌មានម៉ាឡេស៊ី Bernama បឋកថាសាធារណៈនេះធ្វើឡើងក្រោយលោក មហាធៀ ចំណាយពេលវេលាពិភាក្សាគ្នាជាមួយសមភាគីថៃលោក ប្រាយុទ្ធ ចន្ទអូចា ពីទំនាក់ទំនងទ្វេភាគីផង និងបញ្ហានៃចលនាផ្តាច់ខ្លួនរបស់ប្រជាជនឥស្លាមនៅខេត្តភាគខាងត្បូងប្រទេសថៃផង។

ក្រោយជំនួបនេះ លោក ប្រាយុទ្ធ បានប្រាប់អ្នកសារព័ត៌មានថា ថៃនិងម៉ាឡេស៊ីឯកភាពលើការសហការគ្នាដើម្បីដោះស្រាយបញ្ហាប្រឈមផ្នែកសន្តិសុខនេះ។ បើតាមលោក ប្រាយុទ្ធ លោកមហាធៀ បានសន្យាជួយតាមលទ្ធភាពដែលខ្លួនអាចធ្វើបាន ហើយក៏ទទួលស្គាល់ថា ថៃអាចដោះស្រាយបញ្ហាភាគខាងត្បូងបានងាយជាងមុន បើម៉ាឡេស៊ីជួយគាំទ្រ ថ្វីបើបញ្ហានេះជារឿងផ្ទៃក្នុងរបស់ថៃក៏ដោយ។

បើតាមការឯកភាពគ្នានេះ ម៉ាឡេស៊ីនឹងជួយធ្វើជាសន្ធានការីដើម្បីសម្របសម្រួលកិច្ចពិភាក្សាស្វែងរកសន្តិភាពរវាងរដ្ឋាភិបាលថៃ និងក្រុមប្រដាប់អាវុធភាគខាងត្បូងដែលតែងឆ្លងដែនទៅវិញទៅមកពីម៉ាឡេស៊ីទៅកាន់ប្រទេសថៃនោះ។

ជម្លោះនៅខេត្តភាគខាងត្បូងប្រទេសថៃដែលសម្បូរដោយប្រជាជនភាគច្រើនកាន់សាសនាឥស្លាមនោះបានកើតឡើងចាប់ពីឆ្នាំ ២០០៤ ហើយវាមានទាំងការវាយប្រហារ និងអំពើហិង្សាប្រដាប់អាវុធផង។មកដល់បច្ចុប្បន្នមនុស្សយ៉ាងហោចណាស់៦៨០០នាក់បានស្លាប់ក្នុងនោះមានជនស៊ីវិលច្រើននាក់ដែរ៕