ជាតិ
សេដ្ឋកិច្ច
រូបពីហ្វេសប៊ុកសម្ដេច ហ៊ុន សែន
×![]()
ភ្នំពេញ៖ រដ្ឋាភិបាលគ្រោងខ្ចីប្រាក់ ១៤០០លានSDR ឬប្រមាណ ១៩០០លានដុល្លារអាមេរិក ដើម្បីបំពេញតម្រូវការថវិកាសម្រាប់អភិវឌ្ឍន៍គម្រោងសាធារណៈនានា។ នេះជាទំហំកំណត់អតិបរមា ដែលរដ្ឋាភិបាលមិនអាចខ្ចីលើសពីនេះ។ នេះបើតាមសេចក្ដីព្រាងច្បាប់ថវិកាឆ្នាំ២០១៩។
រដ្ឋាភិបាលលើកឡើងថា ហេតុតែកម្រិតប្រាក់កម្ចី ១៤០០លានSDR ព្រោះសំអាងទៅលើកត្តាមួយចំនួន ដែលរួមមាន៖ តម្រូវការអភិវឌ្ឍកើនឡើង, ខ្ចីសម្រាប់គម្រោងក្នុងវិស័យអាទិភាព, ប្រាក់កម្ចីទាំងនោះមានកម្រិតសម្បទានខ្ពស់ និងស្ថានភាពបំណុលរបស់កម្ពុជាបច្ចុប្បន្ន និងរយៈពេលមធ្យមនៅតែមានចីរភាព និងហានិភ័យកម្រិតទាប។
ក្របខណ្ឌកម្ចីជិត ២ពាន់លានដុល្លារអាមេរិកនេះ នឹងអនុញ្ញាតឲ្យរដ្ឋាភិបាលចុះហត្ថលេខាខ្ចីប្រាក់ពីគេលើគម្រោងថ្មីចំនួន ២៥គម្រោង។
កម្ចីសម្រាប់ឆ្នាំ២០១៩ ខាងមុខនេះ នឹងចូលទៅបំពេញស្តុកបំណុលរបស់កម្ពុជាបន្ថែមទៀ។ បច្ចុប្បន្ន គិតត្រឹមខែកញ្ញាឆ្នាំ២០១៨ កម្ពុជាជំពាក់គេ ៦,៨ ពាន់លានដុល្លារអាមេរិក។ ក្នុងនោះចិនជាម្ចាស់បំណុលធំជាងគេរបស់កម្ពុជា ដែលកាន់ចំណែកដល់ទៅ ៤៨ភាគរយនៃបំណុលសរុប បន្ទាប់ពីនោះគឺបំណុលពហុភាគីដែលមានចំណែក ២៩ភាគរយ។
ចំពោះច្បាប់ថវិកាឆ្នាំ២០១៨ ពិដានកម្ចីមានចំនួន ១០០០លានSDR ឬ ១៤០០លានដុល្លារអាមេរិក។
គួរបញ្ជាក់ ឆ្នាំ២០១៩ខាងមុខនេះ រដ្ឋាភិបាលគ្រោងចំណាយថវិការដ្ឋប្រមាណ ៦,៧ពាន់លានដុល្លារ និងគ្រោងរកចំណូលថវិកាក្នុងប្រទេសចំនួន ៥,២ពាន់លានដុល្លារ បើសិនណារដ្ឋសភាអនុម័តលើសេចក្ដីព្រាងច្បាប់ថវិកានោះ៕
Tag:
បំណុល
© រក្សាសិទ្ធិដោយ thmeythmey.com
