លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ព្រមានចាត់វិធានការក្រុមខិលខូច ដែលយកឈ្មោះព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិទៅប្រើខុសគោលការណ៍។ ជាមួយនេះ លោក ស្នើក្រុមខិលខូចទាំងនោះ ឲ្យបញ្ឈប់សកម្មភាពនេះជាបន្ទាន់ផងដែរ។ ការព្រមាននិងស្នើនេះ ធ្វើឡើងក្នុងសន្និសីទសារព័ត៌មាន កាលពីថ្ងៃទី២៦ ខែតុលា។
អគ្គលេខានៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ព្រមានចាត់វិធានការផ្លូវច្បាប់ចំពោះអង្គការ NGO និងក្រុមខិលខូច ដែលយកឈ្មោះព្រឹត្តិការណ៍រត់ប្រណាំងពាក់កណ្តាលអន្តរជាតិ ទៅប្រើដើម្បីបម្រើផលប្រយោជន៍ផ្ទាល់ខ្លួន ដែលនាំឲ្យប៉ះពាល់ព្រឹត្តិការណ៍ និងមុខមាត់ប្រទេសជាតិ។ ការព្រមានធ្ងន់ៗនេះ បន្ទាប់ពីមានក្រុមខិលខូចមួយចំនួនយកឈ្មោះព្រឹត្តិការណ៍ខាងលើប្រើដោយគ្មានសុំច្បាប់អនុញ្ញាត និងរៀបចំរកអត្ថប្រយោជន៍ផ្ទាល់ខ្លួននាពេលកន្លងមក។
មានក្រុមត្រីងៀតឆ្លៀតពងមួយចំនួន បានយកឈ្មោះព្រឹត្តិការណ៍ពាក់កណ្តាលម៉ារ៉ាតុនអន្តរជាតិអង្គរ ទៅប្រើដោយមិនសុំច្បាប់អនុញ្ញាតត្រឹមត្រូវពីគណៈកម្មការរៀបចំ ហើយរៀបចំរកផលប្រយោជន៍ខ្លួនឯង។ ក្រុមខ្លះបានចុះឈ្មោះអ្នកមកពីក្រៅប្រទេស ដោយយកតម្លៃលើសគណៈកម្មការរៀបចំបានកំណត់ និងក្រុមខ្លះទៀតយកឈ្មោះព្រឹត្តិការណ៍ទៅរៀបចំកម្មវិធីសប្បុរសធម៌ខ្លួនឯង ហើយរកផលប្រយោជន៍សម្រាប់ខ្លួនឯង»។ ការលើកឡើងបែបនេះរបស់លោក វ៉ាត់ ចំរើន នាសន្និសីទសារព័ត៌មានស្តីពីទិវារត់ប្រណាំងពាក់កណ្តាលម៉ារ៉ាតុនអន្តរជាតិអង្គរ កាលពីថ្ងៃទី២៦ ខែតុលា ឆ្នាំ២០១៨ នៅទីស្នាក់ការ NOCC។
រដ្ឋលេខាធិការក្រសួងទេសចរណ៍រូបនេះអះអាងថា ក្រុមខិលខូចនិងអង្គការ NGO ទាំងនោះ គណៈកម្មការរៀបចំព្រឹត្តិការណ៍នេះបានដឹងពីអត្តសញ្ញាណអស់ហើយ ហើយលោកនឹងកោះហៅមកជួបប្រជុំ និងធ្វើកិច្ចសន្យា ក្រោយចប់ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិនៅខេត្តសៀមរាប នាដើមខែធ្នូ ខាងមុខនេះ។ ជាមួយគ្នានេះ លោក ស្នើឲ្យក្រុមជនខិលខូចទាំងនោះបញ្ឈប់សកម្មភាពរបស់ខ្លួន បើមិនចង់ប្រឈមនឹងមុខច្បាប់។
ពាក់ព័ន្ធនឹងគោលបំណងនៃព្រឹត្តិការណ៍នេះ គឺធ្វើឡើងដើម្បីស្វែងរកមូលនិធិជួយដល់ជនពិការដោយសារគ្រាប់មីន មន្ទីរពេទ្យគន្ធបុប្ផា និងអង្គការសប្បុរសធម៌នានានៅកម្ពុជា។ លើសពីនេះ ដើម្បីការពារបរិស្ថាននៅបរិវេណរមណីយដ្ឋានប្រវត្តិសាស្ត្រអង្គរ និងទាក់ទាញភ្ញៀវទេសចរជាតិនិងអន្តរជាតិឲ្យមកទស្សនាតំបន់ទេសចរណ៍នានានៅខេត្តសៀមរាប។ ព្រឹត្តិការណ៍នេះ ក៏បានរួមចំណែកជួយរកចំណូលជូនរដ្ឋ និងប្រជាពលរដ្ឋក្នុងខេត្តសៀមរាបផងដែរ។
គិតត្រឹមថ្ងៃទី២៦ តុលា មានអត្តពលិកជាតិ និងអន្តរជាតិជាង៧ពាន់នាក់មកពី៧៥ប្រទេសបានចុះឈ្មោះចូលរួមរត់ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិ ដែលរៀបចំនៅបរិវេណប្រាសាទអង្គរវត្តក្នុងខេត្តសៀមរាប នាថ្ងៃទី២ ខែធ្នូ ខាងមុខ។ ក្នុងចំណោមអត្តពលិកបរទេសភាគច្រើនមកពីអង់គ្លេស សហរដ្ឋអាមេរិក និងបារាំង ដោយសាររដូវនោះជារដូវវិស្សមកាល។
គណៈកម្មការរៀបចំព្រឹត្តិការណ៍នេះ រំពឹងថា ឆ្នាំនេះនឹងអាចទាក់ទាញអត្តពលិកជាង១ម៉ឺននាក់ឲ្យចូលរួម ខណៈឆ្នាំមុនបានទាក់ទាញអត្តពលិកចំនួន១០,៥០០នាក់។ លោក វ៉ាត់ ចំរើន សង្ឃឹមថា ក្នុងរយៈពេលពីរទៅបីឆ្នាំខាងមុខ ព្រឹត្តិការណ៍នេះនឹងអាចទាក់ទាញអត្តពលិកជាតិនិងអន្តរជាតិពី២ទៅ៣ម៉ឺននាក់ឲ្យចូលរួម៕