ជាតិ
សង្គមជាតិ
រដ្ឋាភិបាល ចាប់ផ្តើមស្រាវជ្រាវរកហ្វេសប៊ុកក្លែងក្លាយ ដើម្បីបិទចោល
× ក្រសួងមហាផ្ទៃ ចាប់ផ្តើមចាត់វិធានការជាក់ស្តែងលើគណនីនិងទំព័រហ្វេសប៊ុកក្លែងក្លាយ ដែលបង្កើតឡើងដោយជនខិលខូច ដើម្បីប្រព្រឹត្តអំពើទុច្ចរិត និងមានបំណងចង់បានផលប្រយោជន៍។ ក្រសួងមហាផ្ទៃ អះអាថា គណនីនិងទំព័រហ្វេសប៊ុកក្លែងក្លាយខ្លះ បានបន្លំដាក់ឈ្មោះរបស់ថ្នាក់ដឹកនាំនិងស្ថាប័នជាតិ។
នៅថ្ងៃទី២៧ ខែតុលា ឆ្នាំ២០១៨ ក្រសួងមហាផ្ទៃ បានបង្ហាញឈ្មោះទំព័រហ្វេសប៊ុកក្លែងក្លាយមួយចំនួន ដែលត្រូវបានបិទចោល រួមមាន ទំព័រហ្វេសប៊ុកឈ្មោះ សមាគមវៀតណាមនៅកម្ពុជា ទំព័រហ្វេសប៊ុកឈ្មោះ Hun Maneth (ឧត្តមសេនីយ៍ឯក ហ៊ុន ម៉ាណែត) និង ទំព័រហ្វេសប៊ុកឈ្មោះ Vong Bunintreavuth។
ក្រសួងមហាផ្ទៃ មិនបញ្ឈប់ត្រឹមនេះទេ ដោយបន្តស្រាវជ្រាវរកគណនីឬទំព័រហ្វេសប៊ុកក្លែងក្លាយផ្សេងៗទៀត។ ក្រសួងមហាផ្ទៃ សង្កត់ធ្ងន់ថា៖«នាយកដ្ឋានព័ត៌មានវិទ្យានៃក្រសួងមហាផ្ទៃ កំពុងតែបន្តការងារខាងលើ ក្នុងការបិទគណនីឬទំព័រហ្វេសប៊ុកក្លែងក្លាយជាច្រើនទៀត ដែលកំពុងធ្វើសកម្មភាពទុច្ចរិត និងបន្តបញ្ជាក់អត្តសញ្ញាណផ្លូវការឲ្យគណនីឬទំព័រហ្វេសប៊ុករបស់ក្រសួង និងស្ថាប័នរដ្ឋ ដើម្បីបញ្ជាក់ពីភាពច្បាស់លាស់ដល់សាធារណជនទូទៅ និងជៀសផុតពីអំពើឆបោកផ្សេងៗ»។
ក្រសួងមហាផ្ទៃ លើកឡើងថា ការចាត់វិធានការនេះ គឺដើម្បីរក្សាសុវត្តិភាព និងភាពត្រឹមត្រូវក្នុងការប្រើប្រាស់បណ្ដាញទំនាក់ទំនងសង្គមដ៏ពេញនិយមមួយនេះ។ ក្រសួងមហាផ្ទៃ បន្ថែមថា យន្តការក្នុងការបង្ការទប់ស្កាត់ និងការបង្ក្រាបយ៉ាងម៉ត់ចត់ចំពោះបទល្មើសបច្ចេកវិទ្យា គឺស្របតាមតួនាទីភារកិច្ច ដែលបានដាក់ចេញក្នុងរយៈកាលកន្លងមក៕
Tag:
ក្រសួងមហាផ្ទៃ
ហ្វេសប៊ុកក្លែងក្លាយ
© រក្សាសិទ្ធិដោយ thmeythmey.com