ជាតិ
CATA រៀបចំដំណើរកម្សាន្តក្នុងព្រៃឧទ្យានអង្គរលើកដំបូងរៃអង្គាសថវិកាជួយមន្ទីរពេទ្យកុមារអង្គរ
× សៀមរាប៖ សមាគមទីភ្នាក់ងារទេសចរណ៍កម្ពុជា ហៅកាត់ថា CATA នឹងរៀបចំកម្មវិធីដំណើរកម្សាន្តក្នុងព្រៃឧទ្យានអង្គរ ដើម្បីរៃអង្គាសថវិកាជួយដល់មន្ទីរពេទ្យកុមារអង្គរ ខេត្តសៀមរាប។ ក្នុងកម្មវិធីនេះដែរ ក៏មានការដាំកូនឈើនៅគោលដៅមួយចំនួនក្នុងឧទ្យានអង្គរ ផ្ញើសារដល់យុវជនឱ្យចូលរួមថែរក្សាបរិស្ថានទាំងអស់គ្នា។
ប្រធានសមាគមទីភ្នាក់ងារទេសចរណ៍កម្ពុជា ប្រចាំខេត្តសៀមរាប លោក ផាវ ព្រឿន បានឱ្យដឹងថា នេះជាលើកទី១ហើយ ដែលខាងសមាគមរបស់លោកផ្តួចផ្តើមរៀបចំកម្មវិធីបែបនេះ។ គោលបំណងនៃដំណើរកម្សាន្តក្នុងព្រៃឧទ្យានអង្គរ ធ្វើឡើងដើម្បីរៃអង្គាសថវិកាជួយមន្ទីរពេទ្យកុមារ ទីពីរ ចង់ធ្វើការពង្រីកខ្សែទស្សនារបស់ភ្ញៀវទេសចរ មានន័យថា នៅខេត្តសៀមរាបក្រៅពីប្រាសាទ ក្នុងនោះភ្ញៀវទេសចរក៏អាចធ្វើដំណើរកម្សាន្តក្នុងព្រៃជុំវិញប្រាសាទបុរាណបានផងដែរ និងគោលបំណងទីបី គឺការចូលរួមដាំកូនឈើនៅទីតាំងចំនួន៧កន្លែង បំណងដើម្បីស្ដារគម្របព្រៃឈើក្នុងឧទ្យានអង្គរឡើងវិញ។ នេះបើតាមការបញ្ជាក់របស់លោក ផាវ ព្រឿន ដែលបានប្រាប់សារព័ត៌មានថ្មីៗ នៅថ្ងៃទី ២៤ តុលា។
កម្មវិធីរៃអង្គាសថវិកាសប្បុរធម៌នេះ នឹងធ្វើឡើងនៅថ្ងៃទី៤ វិច្ឆិកា ចាប់ពីវេលាម៉ោង ៦ព្រឹកដល់ម៉ោង ៤រសៀល។ អ្នកចូលរួម ត្រូវបង់វិភាគទានម្នាក់ចំនួន ១២ដុល្លារ ដោយពួកគេទទួលបានមកវិញនូវភេសជ្ជៈ និងអាហារថ្ងៃត្រង់ រួមនិងមធ្យោបាយដឹកជញ្ជូន។ល។ តាមគម្រោងរបស់សមាគម អាចនឹងមានអ្នកចូលរួមចន្លោះពី ២៥០ ទៅ៥០០នាក់។ អ្នកចូលរួមនឹងធ្វើដំណើរដោយថ្មើរជើង ចាប់ពីខ្លោងទ្វារទន្លេអុំ រហូតដល់ចំណុចចុងក្រោយនៅបរិវេណប្រាសាទតាព្រហ្ម លើចម្ងាយផ្លូវប្រមាណ ១២គីឡូម៉ែត្រ។ យ៉ាងណា តាមការបញ្ជាក់របស់ លោក ផាវ ព្រឿន កម្មវិធីនឹងមានរៀបចំកន្លែងសម្រាកហូបអាហារថ្ងៃត្រង់ នៅសួនបណ្ដុះកូនឈើរបស់អាជ្ញាធរជាតិអប្សរា មុនបន្តដំណើរទៅគោលដៅចុងក្រោយផងដែរ។
គួរបញ្ជាក់ថា កម្មវិធីដំណើរកម្សាន្តក្នុងព្រៃឧទ្យានអង្គររៀបចំដោយ សមាគមទីភ្នាក់ងារទេសចរណ៍កម្ពុជា ដោយសហការជាមួយអាជ្ញាធរជាតិអប្សរា។ ថវិកាដែលបានពីកម្មវិធីនេះ នឹងប្រគល់ជូនទាំងស្រុកទៅមន្ទីរពេទ្យកុមារអង្គរ៕
© រក្សាសិទ្ធិដោយ thmeythmey.com