ភ្នំពេញ៖ ការប្រកួតប្រជែងភាពយន្តខ្នាតខ្លីឆ្នាំ២០១៨ ដែលរៀបចំឡើងដោយមូលនិធិ ក្រុមប្រឹក្សាជាតិអាជ្ញាកណ្ដាល ក្នុងវិស័យការងារកម្ពុជា បានរកឃើញភាពយន្តដែលល្អជាងគេ៣រឿង ដើម្បីទទួលពានរង្វាន់។
ភាពយន្តដែលផ្ដោតសំខាន់លើវិវាទការងារ រវាងនិយោជក និងនិយោជិត ក្នុងវិស័យការងារនៅកម្ពុជា និងភាគីដោះស្រាយ ត្រូវបានវាយតម្លៃដោយគណៈកម្មការជំនាញ និងតាមរយៈការចុចចូលចិត្ត(like) និងចែករំលែក(share) នៅក្នុងបណ្ដាញសង្គមហ្វេសប៊ុក។
ភាពយន្តខ្លីចំនួន៣រឿងដែលទទួលបានពានរង្វាន់នោះរួមមាន ជ័យលាភីលេខ១ បានទៅលើរឿង “បន្ទប់ជួល”។ រឿងនេះនិយាយពីកម្មករោងចក្រ ដែលធ្វើការមិនទទួលបានប្រាក់កម្រៃចំនួន៣ខែ។ ក្រោយពីកម្មករទាំង៣នាក់បានទៅរកដំណោះស្រាយពីក្រសួងការងារ និងក្រុមប្រឹក្សាអាជ្ញាកណ្ដាល ពួកគេក៏បានចូលធ្វើការ និងទទួលបានប្រាក់ខែវិញ។
ភាពយន្តខ្លីជ័យលាភីលេខ២ បានទៅលើរឿង “សំឡេងវិទ្យុ”។ ភាពយន្តនេះបង្ហាញពី កម្មការនីរោងចក្រកាត់ដេរបីនាក់ មានផ្នត់គំនិតថាបើគ្មានប្រាក់ គ្មានស្ថានប័នណាជួលកម្មករឡើយ។ ថ្ងៃមួយពួកគេត្រូវបានថៅកែបញ្ឈប់ ដោយចោទថាក្រុមពួកគេឧស្សាហ៍ឈឺ ធ្វើការមិនទាន់កូតារបស់ក្រុមហ៊ុន ដែលផ្ទុយពីការពិត។ ស្របពេលគ្មានការងារ ជីវភាពគ្រួសារក៏មានបញ្ហា ថ្ងៃមួយពួកគេបានស្ដាប់វិទ្យុចំកម្មវិធី “ថៅកែល្អ កម្មករល្អ”។ ក្រោយពីបានព័ត៌មាន ពួកគេក៏បានដាក់ពាក្យប្ដឹងទៅក្រុមប្រឹក្សាអាជ្ញាកណ្ដាល ហើយពួកគេក៏ត្រូវបានថៅកែព្រមឱ្យចូលធ្វើការវិញ។
ចំណែកភាពយន្តទទួលបានជ័យលាភីលេខ៣គឺរឿង “ ខឹងខុស ខឹងខាត" ។ ភាពយន្តនេះនិយាយពី កម្មកររោងចក្រម្នាក់មានជំងឺ តែថៅកែរោងចក្រមិនអនុញ្ញាតច្បាប់ឱ្យ ថែមទាំងបញ្ចប់កិច្ចសន្យារបស់កម្មកររូបនោះមុនកាលបរិច្ឆេទទៀត។ ក្រោយជួបរឿងបែបនេះកម្មករច្រើននាក់ បានជ្រើសរើសមិនធ្វើកូដកម្ម តែបែរជាទៅរកក្រសួងការងារឱ្យជួយដោះស្រាយ និងបន្តទៅក្រុមប្រឹក្សាអាជ្ញាកណ្ដាល។
ក្រៅពីភាពយន្តទាំងបីរឿងខាងលើ នៅមានភាពយន្តខ្លីពីររឿងផ្សេងទៀត ដែលទទួលបានរង្វាន់លើកទឹកចិត្ត គឺរឿង “អ្នកណាជួយខ្ញុំ” និងរឿង “ការចូលរួមចំណែករបស់ក្រុមប្រឹក្សាអាជ្ញាកណ្តាលកម្ពុជា។
សម្រាប់រង្វាន់ដែលភាពយន្តជ័យលាភីទទួលបាន លេខ១ទទួលបានទឹកប្រាក់ ៤,០០០,០០០ រៀល និងពានរង្វាន់លេខ១។ ជ័យលាភីលេខ២ ទទួលបានទឹកប្រាក់ចំនួន ២,៨០០,០០០រៀល និងពានរង្វាន់លេខ២។ ជ័យលាភីលេខ៣ ទទួលបានទឹកប្រាក់ ២,០០០,០០០រៀល និងពានរង្វាន់លេខ៣។ ចំនែកភាពយន្តដែលទទួលរង្វាន់់លើកទឹកចចិត្ត ទទួលបានទឹកប្រាក់ចំនួន ៦០០,០០០ ព្រមទាំងលិខិតសរសើរ។
ការប្រកួតប្រជែងភាពយន្តខ្នាតខ្លីឆ្នាំ២០១៨នេះ គឺជារដូវកាលទី២ហើយ។ កម្មវិធីប្រកួតប្រជែងភាពយន្តខ្លីនេះ ត្រូវបានរៀបចំឡើងដើម្បីពង្រឹងការយល់ដឹងបន្ថែម អំពីយន្តការក្នុងការដោះស្រាយវិវាទការងារដោយសន្តិភាព និងដើម្បីធ្វើឱ្យមានការរីកចម្រើនវិស័យសេដ្ឋកិច្ចក្នុងប្រទេសកម្ពុជា។
សូមបញ្ជក់ថា ក្រុមប្រឹក្សាអាជ្ញាកណ្ដាល គឺជាស្ថាប័នឯករាជមួយដែលដោះស្រាយរាល់វិវាទការងាររវាងនិយោជក និងនិយោជិត ដោយមិនគិតថ្លៃសេវា៕