«តន្ត្រី និងចំណាកស្រុក» ជាប្រធានបទក្នុងពិធីបុណ្យតន្ត្រីអន្តរជាតិលើកទី១៥ឆ្នាំនេះ

ជាតិ

«តន្ត្រី និងចំណាកស្រុក» ជាប្រធានបទក្នុងពិធីបុណ្យតន្ត្រីអន្តរជាតិលើកទី១៥ឆ្នាំនេះ

28, Oct 2018 , 6:59 pm

រូបភាព

លោក William Heidt ឯកអគ្គរដ្ឋទូតអាមេរិកប្រចាំកម្ពុជា

ដោយ: ប៉ូ សាគុន

ភ្នំពេញ៖ ស្ថានទូតសហរដ្ឋអាមេរិកប្រចាំកម្ពុជា ស្ថានទូតអាល្លឺម៉ង់ និងក្រសួងវប្បធម៌ និងវិចិត្រសិល្បៈកម្ពុជា នឹងរួមគ្នារៀបចំបុណ្យតន្ត្រីអន្តរជាតិលើកទី១៥ ក្រោមប្រធានបទ «តន្ត្រី និងចំណាកស្រុក» ពីថ្ងៃទី១ដល់ថ្ងៃទី៤ ខែវិច្ឆិកា ឆ្នាំ២០១៨។

កម្មវិធីនេះរៀបចំនៅសណ្ឋាគារ Raffles Hotel-LeRoyal ដែលបើកការប្រគំតន្ត្រីនៅថ្ងៃទី១ ខែវិច្ឆិកា វេលាម៉ោង៧យប់។ ពិធីបុណ្យនេះប្រព្រឹត្តទៅស្របពេលគ្នានឹងការអបអរខួបកំណើតលើកទី១០០ របស់អ្នកនិពន្ធ និងជាអ្នកដឹកនាំភ្លេងដ៏ល្បីរបស់អាមេរិក នៅសតវត្សទី២០ គឺលោក Leonard Bernstein ។

ឯកអគ្គរដ្ឋទូតលោក William Heidt មានប្រសាសន៍ថា ប្រធានបទនេះស័ក្តិសមណាស់ទៅនឹងប្រវត្តិរបស់លោក Bernstein និងការរួមចំណែករបស់គាត់ ចំពោះវប្បធម៌អាមេរិក ក្នុងនាមជាជនអន្តោប្រវេសន៍ម្នាក់។ លោក Bernstein, George Gershwin និងតន្ត្រីករដទៃទៀត ដែលមានឈ្មោះនៅក្នុងពិធីបុណ្យនេះ បានចាកចេញពីប្រទេសរបស់គេ ដើម្បីកសាងជីវិតថ្មីមួយ និងស្វែងរកឱកាសថ្មីៗ។ លោកថាជនអន្តោប្រវេសន៍ បានរួមចំណែកយ៉ាងច្រើន ដល់ប្រពៃណីផ្នែកសិល្បៈ របស់ប្រទេសអាមេរិក ដោយទាញយកប្រយោជន៍ពីប្រពៃណីរបស់គេ និងសង្គមនៅប្រទេសអាមេរិក ដែលមានគំនិតច្នៃប្រឌិតថ្មី និងមានភាពរស់រវើក ដើម្បីបង្កើតស្នាដៃដែលល្បីបំផុតផ្នែកតន្ត្រី នៅជុំវិញពិភពលោក។

លោកឯកអគ្គរដ្ឋទូតបញ្ជាក់យ៉ាងដូច្នេះថា៖«ការប្រគំតន្ត្រីនេះគឺជាឱកាសដ៏អស្ចារ្យមួយ ដើម្បីបង្ហាញការរួមចំណែកទាំងឡាយ ដែលពលរដ្ឋអាមេរិកមានដើមកំណើតនៅបរទេសបានផ្ដល់។ ខ្ញុំសង្ឃឹមថា លោកអ្នកនឹងរីករាយចំពោះការសម្ដែងដ៏ល្អ ដែលត្រូវបានរៀបចំឡើងដោយនាយករៀបចំពិធីបុណ្យ Anton Isselhardt និងក្រុមរបស់លោក»។

រដ្ឋមន្ត្រីក្រសួងវប្បធម៌និងវិចិត្រសិល្បៈលោកស្រី ភឿង សកុណា បានមានប្រសាសន៍ថា ក្នុងចំណោមអ្នកសិល្បៈ អ្នកនិពន្ធឈ្មោះ អ៊ុង ជិនណារី មានដើមកំណើតនៅខេត្តតាកែវ គឺជាអ្នកនិពន្ធដ៏ជោគជ័យមួយរូប ហើយត្រូវបានសាទរជាអន្តរជាតិ ជាមួយនឹងពានរង្វាន់ល្បីៗជាច្រើន។ បណ្ឌិត សំ សំអាង អ្នកសិក្សាស្រាវជ្រាវផ្នែកភ្លេងទាក់ទងនឹងវប្បធម៌ ដែលបានធ្វើការនៅសហរដ្ឋអាមេរិក និងនៅកម្ពុជា ដើម្បីអភិរក្ស និងបំផុសសិល្បៈសម្ដែងរបស់ខ្មែរ។

អ្នកស្រីបានបញ្ជាក់ថា៖«ខ្ញុំសង្ឃឹមថា លោកអ្នកនឹងរីករាយជាមួយនឹងភាពសម្បូរបែបនៃតន្ត្រី ដែលត្រូវបានបង្កើតឡើងនៅក្រោមកាលៈទេសៈផ្សេងៗ នៃការធ្វើអន្តោប្រវេសន៍ ហើយដឹងថាប្រទេសកម្ពុជាស្ថិតនៅក្នុងចំណោមប្រទេសរួមចំណែកចំពោះការអភិវឌ្ឍបែបនេះ។ ចំពោះព័ត៌មានបន្ថែមសូមចូលទៅកាន់ www.musicfestival-phnompenh.org ៕