កីឡាជាតិ
ជាតិ
កីឡាករ សុខ ធី ដែលចៅក្រមកាត់ក្តីឲ្យចាញ់ថៃ គំរាមដកខ្លួនចេញ បើការតវ៉ាគ្មានប្រសិទ្ធភាព
× លោក សាន់ សៅយ៉ាន់ គ្រូបង្វឹករបស់កីឡាករ សុខ ធី ហៅ កាកា បានដាក់ពាក្យប្តឹងតវ៉ា ក្រោយមិនចេញចិត្តចំពោះលទ្ធផល ដែលចៅក្រមកាត់ក្តីឲ្យកូនសិស្សរបស់លោកចាញ់កីឡាករថៃដោយពិន្ទុ។ កាកា គំរាមដកខ្លួនចេញពីពានរង្វាន់ ISI Palm រដូវកាលទី៣ បើការតវ៉ានេះគ្មានប្រសិទ្ធភាព។
អ្នកលេងគុនខ្មែរវ័យក្មេងកីឡាករ សុខ ធី ត្រូវបានចៅក្រមកាត់ក្តីឲ្យចាញ់កីឡាករថៃ ធ្នូ សឹកឡេក ដោយពិន្ទុ នាជំនួបដែលរូបគេរំពឹងទទួលបានជ័យជម្នះ។ ភ្លាមៗនោះគ្រូបង្វឹករបស់គេ គឺលោក សាន់ សៅយ៉ាន់ ដែលមិនពេញចិត្តចំពោះការកាត់ក្តីនេះ បានដាក់ប្តឹងតវ៉ាទៅកាន់គណៈកម្មការរៀបចំ ដើម្បីសុំត្រួតពិនិត្យការប្រកួតឡើងវិញ។
ជាមួយគ្នានេះ កីឡាករ សុខ ធី បានគំរាមថា រូបគេអាចនឹងដកខ្លួនចេញការប្រកួតពានរង្វាន់ ISI Palm របស់ស្ថានីយទូរទស្សន៍ CNC បើការតវ៉ាពុំទទួលបានលទ្ធផលល្អ ឬគ្មានដំណោះស្រាយ។ ការគំរាមបែបនេះ បន្ទាប់ពីរូបគេយល់ថា ការកាត់ក្តីនេះគ្មានយុត្តិធម៌ ព្រោះគ្មានហេតុផលណា ដែលរូបគេត្រូវចាញ់កីឡាករថៃរូបនេះឡើយ។
កីឡាករមកពីខេត្តបន្ទាយមានជ័យរូបនេះបានរៀបរាប់យ៉ាងដូច្នេះថា៖«ខ្ញុំមើលទៅគឺមិនសមចាញ់នោះទេ ព្រោះខ្ញុំវាយចូលច្រើន និងវាយឲ្យអាជ្ញាកណ្តាលរាប់កីឡាករថៃនៅទឹកទី២ទៀតផង។ ទោះបីទឹកទី៤និង៥ ខ្ញុំថយក៏ពិតមែន តែគេធ្វើអ្វីខ្ញុំមិនបាននោះទេ។ បើកាត់ក្តីតែបែបនេះ ខ្ញុំគ្មានអារម្មណ៍វាយនោះទេ គឺចង់ឈប់វាយតែម្តង»។
សម្រាប់ កាកា ការកាត់ក្តីគ្មានភាពយុត្តិធម៌ មិនត្រឹមតែធ្វើឲ្យកីឡាករបាក់ទឹកចិត្តប៉ុណ្ណោះ តែថែមទាំងធ្វើឲ្យវិស័យកីឡាប្រដាល់គ្មានការរីកចម្រើនទៀតផង។ ទន្ទឹមនឹងអរគុណអ្នកគាំទ្រ កាកា បានអះអាងថា រូបគេបានធ្វើអស់ពីសមត្ថភាពហើយ។
ក្រោយឆ្លងកាត់ការប្រកួតអស់រយៈពេល៥ទឹកលើសង្វៀនស្ថានីយទូរទស្សន៍ NCN នៅរសៀលថ្ងៃទី២៨ ខែតុលា កីឡាករ សុខ ធី ត្រូវបានអាជ្ញាកណ្តាល២រូបកាត់ក្តីឲ្យឈ្នះ និងអាជ្ញាកណ្តាល៣រូបកាត់ក្តីឲ្យចាញ់។ គួរបញ្ជាក់ថា នេះជាជំនួបលើកទី២របស់ កាកា ក្រោយរូបគេទទួលបានជ័យជម្នះនៅលើកទី១៕
© រក្សាសិទ្ធិដោយ thmeythmey.com