នៅកម្ពុជា សត្វ «កង្ហែន» មាននៅក្នុងខេត្តពោធិ៍សាត់, កោះកុង, ដែនជម្រកសត្វព្រៃគូលែន ,ព្រហ្មទេពនៃខេត្តព្រះវិហារ និង តំបន់ផ្សេងៗទៀត។ ជាមួយគ្នានេះ វាក៏ត្រូវបានរកឃើញនៅប្រទេសថៃ, ឡាវ, និងវៀតណាមភាគខាងត្បូងផងដែរ។ នេះបើយោងតាមសៀវភៅថនិកសត្វកម្ពុជា ដែលរៀបរៀងដោយ ម៉ែន សូរិយន់, សួន ផល្លា, ស៊ិន ប៉ូលីន និង Joe Walston ឆ្នាំ២០០៨។
 

សៀវភៅខាងលើ បញ្ជាក់ថា មានប្រវែងដងខ្លួនពី ១៨៤-២១០ម.ម និងកន្ទុយមានប្រវែងពី ១៤០-១៧៥ម.ម។ «កង្ហែន» មានមាឌមធ្យម និងមានលក្ខណៈខុសគ្នាពី សត្វ «កង្ហិច» ដោយសារទំហំ។ ក្បាលវាមានពណ៌ប្រផេះត្នោត និង មានឆ្នូតពណ៌ខ្មៅផង ដោយមានពណ៌ពងមាន់នៅលើខ្នងនិងចំហៀងខ្លួន។ ចំណែកឯពោះមានពណ៌ប្រផេះភ្លឺ កន្ទុយ របស់វាវិញ មានប្រវែងខ្លីជាងប្រវែងនៃក្បាល-ដងខ្លួន ប៉ុន្តែច្រមុះរបស់វាវែងបន្តិច។ «កង្ហែនមានរស់នៅស្ទើរគ្រប់ទីកន្លែង ដោយមានចលនារហ័សរហួន និងរងគ្រោះថ្នាក់តិចតួចពីការទាក់ចាប់»។ នេះបើតាមសៀវភៅដដែល។
(ប្រភពឯកសារសត្វនេះ សារព័ត៌មានថ្មីៗ ដកស្រង់ពីសៀវភៅថនិកសត្វកម្ពុជា)៕