ជាតិ
រដូវត្រីធ្វើចរាចរផ្លាស់ទីដ៏មហាសាល ចេញពីបឹងទន្លេសាប ជិតចូលមកដល់ហើយ រូបភាពពីលើអាកាសនៃឧបករណ៍នេសាទ «ដាយត្រី» ស្ថិតនៅក្នុងទន្លេសាប។ ឈុត ឈាណា / គម្រោងអច្ឆរិយភាពនៃទន្លេមេគង្គ។
× ការធ្វើចរាចរផ្លាស់ទីប្រចាំឆ្នាំរបស់ត្រីដ៏ច្រើនមហាសាល ក្នុងចំណោមការធ្វើចរាចរផ្លាស់ទីធំៗ នៅក្នុងពិភពលោក ចេញពីបឹងទន្លសាប បានខិតចូលជិតមកដល់ហើយ។ ជាទូទៅ ការធ្វើចរាចរផ្លាស់ទីរបស់ហ្វូងមច្ឆជាតិដ៏មហាសាលនេះ ចាប់ផ្តើមនៅចុងខែកញ្ញា ឬដើមខែតុលា បន្ទាប់ពីទឹកជំនន់ក្នុងបឹងទន្លេសាប (បឹងដ៏ធំជាងគេនៅក្នុងតំបន់អាស៊ីអាគ្នេយ៍) ស្រកចុះដល់កម្រិត អតិបរមា។
ត្រីដែលចាប់ផ្តើមធ្វើចរាចរផ្លាស់ទីមុនគេ នៅក្នុងចំណោមការធ្វើចរាចរផ្លាស់ទីដ៏ធំបំផុតនេះ គឺត្រីរាជ និងត្រីគល់រាំង ដែលជាពពួកត្រីប្រភេទធំៗ វាអាចធំលូតលាស់រហូតដល់ប្រវែង៣ម៉ែត្រ និងមានទម្ងន់ ៣០០គីឡូក្រាម។ ត្រីទាំងពីរប្រភេទនេះ កំពុងឈានទៅក្នុងប្រភេទរងគ្រោះជិតផុតពូជ នាពេលបច្ចុប្បន្ននេះ។ គួរបញ្ជាក់ផងដែរថា ត្រីគល់រាំង ត្រូវបានប្រកាសកំណត់ជាមច្ឆានិម្មិត្តរូបនៃព្រះរាជាណាចក្រកម្ពុជា តាមព្រះរាជក្រឹត្យលេខ នសរកត / ០៣០៥ / ១៤៩ ចុះថ្ងៃទី២១ ខែមីនា ឆ្នាំ២០០៥។
បន្ទាប់មក ពពួកត្រីប្រភេទតូច មធ្យម និងធំ ជាច្រើនប្រភេទទៀត ក៏បានចាប់ផ្តើមធ្វើចរាចរផ្លាស់ទីចេញពីបឹងទន្លេសាបតាមដែរ ពិសេស ពពួកត្រីរៀល។ ការធ្វើចរាចរផ្លាស់ទីនេះ ភាគច្រើនប្រព្រឹត្តទៅនាថ្ងៃពេញបូរណ៌មី។ ការណ៍នេះ ក្រុមអ្នកស្រាវជ្រាវ ក៏មិនទាន់ដឹងពីមូលហេតុដែលថា ហេតុអ្វីបានជាពពួកត្រីទាំងនោះ នាំគ្នាធ្វើចរាចរច្រើនបំផុត នាថ្ងៃពេញបូរណ៌មី (ព្រះច័ន្ទពេញវង់) តែពីរ-បីថ្ងៃ ជារៀងរាល់ខែនោះ។
សកម្មភាពធ្វើត្រីប្រហុករបស់ប្រជាជនខ្មែរ ដែលមកពីតាមបណ្តាខេត្តនានា នៅតាមដងទន្លេសាប កាលពីឆ្នាំ ២០១៧។ រូបភាព៖ ឈុត ឈាណា / គម្រោងអច្ឆរិយភាពនៃទន្លេមេគង្គ។
នាខែមករា ហ្វូង «ត្រីរៀល» បាននាំគ្នាយ៉ាងច្រើនអនេក ធ្វើចរាចរផ្លាស់ទីចុះតាមចរន្តទឹកហូរមក។ នៅតាមបណ្តោយដងទន្លេសាប ដែលមានចម្ងាយប្រមាណ១២០គីឡូម៉ែត្រ ចេញពីបឹងទន្លេសាប រហូតដល់រដ្ឋធានីភ្នំពេញ គេឃើញសកម្មភាពនេសាទតាមគន្លង «ដាយត្រី» ទាំង១៤គន្លង ព្រមទាំងការនេសាទដោយឧបករណ៍ផ្សេងៗ មានសភាពមមាញឹកយ៉ាងខ្លាំង។
ឧបករណ៍នេសាទ «ដាយត្រី» គឺជាឧបករណ៍នេសាទខ្នាតធំ និងស្មុគស្មាញបំផុត ព្រមទាំងប្រើប្រាស់កម្លាំងពលកម្មច្រើនផងដែរ ។ ឧបករណ៍នេសាទ «ដាយត្រី» ទាំង១៤គន្លងនេះ មានចំនួនសរុបទាំងអស់៦៣មាត់ ដាក់នៅតាមបណ្តោយដងទន្លេសាប ចាប់ពីខែតុលា រហូតដល់ខែមីនា ដើម្បីត្រងចាប់ហ្វូងត្រី ដែលពួកវាធ្វើចរាចរផ្លាស់ទីចុះតាមចរន្តទឹកហូរចេញពីបឹងទន្លេសាប។ រយៈពេលតែ១ម៉ោងប៉ុណ្ណោះ ក្នុងឧបករណ៍នេសាទ «ដាយត្រី» មួយមាត់ ដែលមានប្រវែង ទទឹងមាត់ ២៤ម៉ែត្រ និងបណ្តោយប្រវែង ១០០ ម៉ែត្រ អាចចាប់ត្រីបានជាង៥តោន។
សកម្មភាពរបស់កម្មករនេសាទចាក់ត្រីចេញពីឧបករណ៍នេសាទ «ដាយត្រី» មួយមាត់ នៅតាមបណ្តោយទន្លេសាទ ក្នុងឆ្នាំ២០១៧។ រូបភាព៖ ឈុត ឈាណា / គម្រោងអច្ឆរិយភាពនៃទន្លេមេគង្គ។
ទោះជាយ៉ាងណា ដោយសារការនេសាទហួសកម្រិត ការធ្វើការនេសាទក្នុងរដូវត្រីពង-កូន ការធ្វើនេសាទចាប់យកកូនត្រីសម្រាប់ធ្វើត្រីនុយ ការប្រើប្រាស់ឧបករណ៍ល្មើសច្បាប់ ពិសេសឧបករណ៍ឆក់ក្តៅ ឆក់ត្រជាក់ ការបាត់បង់ព្រៃលិចទឹកជាទីជម្រក និងការកសាងទំនប់វារីអគ្គិសនី បានធ្វើឲ្យប៉ះពាល់យ៉ាងធ្ងន់ធ្ងរដល់កំណើនមច្ឆជាតិទាំងនេះ ជាពិសេសពពួកត្រីមានទំហំខ្លួនធំៗ ដែលមានរស់នៅច្រើនក្នុងប្រព័ន្ធទន្លេមេគង្គ ដូចជាត្រីរាជ ត្រីគល់រាំង ត្រីបបែលយក្ស ត្រីត្រសក់ ត្រីពោព្រុយជាដើម។ល។ ដែលត្រីទាំងអស់នេះ ប្រជាជនខ្មែរមួយចំនួនធំ មិនដឹងថាវាមានរស់នៅក្នុងប្រទេសរបស់ខ្លួន ហើយក៏មិនជឿថា វាមានរស់នៅក្នុងប្រទេសកម្ពុជាផងដែរ។
© រក្សាសិទ្ធិដោយ thmeythmey.com