អន្តរជាតិ
លោក មហាធៀ ទៅពិភាក្សាពីកិច្ចព្រមព្រៀងលក់ទឹកជាមួយសិង្ហបុរីនាខែក្រោយនេះ
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ នឹងធ្វើដំណើរទៅកាន់សិង្ហបុរី នាថ្ងៃទី ១២ ខែវិច្ឆិកា ក្នុងគោលបំណងចូលរួមកិច្ចប្រជុំកំពូលអាស៊ានលើកទី៣៣ ។ កិច្ចព្រមព្រៀងលក់ទឹកទៅឲ្យសិង្ហបុរីដែលជារឿងចម្រូងចម្រាស់មួយ ក៏ស្ថិតក្នុងរបៀបវារៈនៃដំណើរទស្សនកិច្ចរបស់លោក មហាធៀ ដែរ។
យោងតាមសាព័ត៌មានម៉ាឡេស៊ី Bernama អនុរដ្ឋមន្ត្រីការបរទេសម៉ាឡេស៊ី Marzuki Yahya បាននិយាយ នៅថ្ងៃទី៣០ ខែតុលា ថា រដ្ឋាភិបាលម៉ាឡេស៊ីនៅតែរក្សាជំហដ៏រឹងមាំរបស់ ក្នុងការពិភាក្សាអំពីការសើរើតម្លៃទឹក ដែលខ្លួនលក់ទៅឲ្យសិង្ហបុរី។ ត្រង់នេះ លោកបានបញ្ជាក់នៅក្នុងរដ្ឋសភាទៀតថា លោកសង្ឃឹមថាសមាជិកសភាទាំងអស់នឹងសហការ និងផ្តល់ជាកម្លាំងដល់កិច្ចខិតខំប្រឹងប្រែង ដើម្បីទទួលបានតម្លៃគួរឲ្យពេញចិត្តមួយ សម្រាប់រដ្ឋាភិបាលម៉ាឡេស៊ី។
លោក Marzuki ក៏បានកត់សម្គាល់ផងដែរថា ដោយផ្អែកទៅលើលក្ខខណ្ឌនៅក្នុងកិច្ចព្រមព្រៀងទឹកឆ្នាំ១៩៦១ និង១៩៦២ តម្លៃទឹកឆៅដែលម៉ាឡេស៊ីលក់ទៅឲ្យសិង្ហបុរី គឺមានតម្លៃ ០,០១២ ដុល្លារ សម្រាប់ប្រមាណទឹក ៣៧៨៥ លីត្រ។ ត្រង់នេះ លោកបានលើកឡើងថា តម្លៃនេះគឺទាបខ្លាំងណាស់ ហើយវាមិនផ្តល់ផលចំណេញអ្វីដល់ម៉ាឡេស៊ីឡើយ។
តាមពិតទៅម៉ាឡេស៊ីបានប្រកាសពីជំហររបស់ខ្លួនក្នុងការសើរើពីតម្លៃទឹកឆៅ ក្នុងអំឡុងពេលកិច្ចប្រជុំទ្វេភាគីជាមួយសិង្ហបុរី កាលពីខែកក្កដាកន្លងទៅ។ នេះបើតាមការបញ្ជាក់បន្ថែមរបស់លោក Marzuki។
កាលពីខែមិថុនាកន្លងទៅ លោក មហាធៀ ធ្លាប់បាននិយាយថា តម្លៃទឹកដែលម៉ាឡេស៊ីកំពុងលក់ទៅឲ្យសិង្ហបុរីគឺពិតជាអស់សំណើចខ្លាំងណាស់ ហើយខណៈនេះម៉ាឡេស៊ីបានចាប់ផ្តើមសិក្សាលើករណីនេះយ៉ាងយកចិត្តទុកដាក់បំផុត។ មួយខែក្រោយការអះអាងរបស់លោក មហាធៀ នាយករដ្ឋមន្ត្រីសិង្ហបុរី លី សៀនឡុង បានឆ្លើយតបវិញថា កិច្ចព្រមព្រៀងទឹកគឺពិតជាសំខាន់បំផុត ហើយប្រជាជាតិទាំងពីរត្រូវតែធ្វើការពិនិត្យយ៉ាងតឹងតែងបំផុត ដោយអនុលោមទៅតាមលក្ខខណ្ឌនៃកិច្ចព្រមព្រៀង។
សម្រាប់កិច្ចព្រមព្រៀងដែលនឹងត្រូវផុតកំណត់នាឆ្នាំ២០៦១នេះ សិង្ហបុរីត្រូវបានផ្តល់សិទ្ធិផ្តាច់មុខក្នុងការទាញយកទឹកដល់ចំនួនអតិបរមាជាង ៩៤៦លានលីត្រ ក្នុងមួយថ្ងៃពីរដ្ឋ Johor ។ ជាការទទួលបានត្រឡប់មកវិញ រដ្ឋ Johor មានអាទិភាពទទួលបានប្រាក់ចំនួន ០,២ដុល្លារ សម្រាប់ទឹកចំនួន ៣៧៨៥ លីត្រ ប៉ុន្តែមានលក្ខខណ្ឌខ្លះត្រូវបានអនុវត្ត។
គួរបញ្ជាក់បន្តិចថា មេដឹកនាំនៃបណ្តាប្រទេសជាសមាជិកអាស៊ាន នឹងអញ្ជើញទៅចូលរួមកិច្ចប្រជុំកំពូលអាស៊ានលើកទី៣៣ ក្នុងប្រទេសសិង្ហបុរី ចាប់ពីថ្ងៃទី១១ ដល់ថ្ងៃទី ១៥ ខែវិច្ឆកា ឆ្នាំ២០១៨ខាងមុខ៕
Tag:
សិង្ហបុរី
ម៉ាឡេស៊ី
កិច្ចព្រមព្រៀងទឹក
© រក្សាសិទ្ធិដោយ thmeythmey.com