មហាផ្ទៃ ប្រកាសថា ចាំជួយសង្គមស៊ីវិល បើរងការរឹតត្បិតពីអាជ្ញាធរ

ជាតិ

សង្គមជាតិ

មហាផ្ទៃ ប្រកាសថា ចាំជួយសង្គមស៊ីវិល បើរងការរឹតត្បិតពីអាជ្ញាធរ

01, Nov 2018 , 1:27 pm

រូបភាព

ដោយ: ថ្មីៗ

បើរងការរឹតត្បិតក្នុងការធ្វើសកម្មភាព ក្រុមសង្គមស៊ីវិល ត្រូវប្រាប់ទៅគណៈអភិបាលរាជធានី-ខេត្ត ឬក៏ឈានទៅដល់ក្រសួងមហាផ្ទៃ ដើម្បីឲ្យជួយដោះស្រាយ។ ក្រសួងមហាផ្ទៃ បានប្រាប់ក្រុមសង្គមស៊ីវិលបែបនេះ។

ជាដំណឹងល្អសម្រាប់ក្រុមមនុស្ស ដែលធ្វើការងារសង្គម នៅក្រៅស្ថាប័នរដ្ឋាភិបាល ក្រោយពីសម្តេច ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីណែនាំមួយស្តីពី «កិច្ចសហប្រតិបត្តិការរវាងរដ្ឋាភិបាល និង រដ្ឋបាលថ្នាក់ក្រោមជាតិជាមួយសមាគម អង្គការក្រៅរដ្ឋាភិបាល និង សហគមន៍នានានៅមូលដ្ឋាន»។

បើគេបានអាន គេ នឹងដឹងថា ខ្លឹមសារនៃសេចក្តីណែនាំនោះ បានបង្កលក្ខណងាយស្រួលដល់ក្រុមសង្គមស៊ីវិល ក្នុងការបំពេញការងារ។ សេចក្កីណែនាំរបស់រដ្ឋមន្ត្រីក្រសួងមហាផ្ទៃ ដែលបានចេញនៅថ្ងៃទី៣១ ខែតុលា ឆ្នាំ២០១៨ បានប្រាប់ក្រុមអង្គការក្រៅរដ្ឋាភិបាលថា ពួកគេ មានសេរីភាពពេញលេញក្នុងការធ្វើសកម្មភាព ដោយគ្មានការរារាំងនិងការរំលោភបំពានឡើយ។

រដ្ឋមន្ត្រីក្រសួងមហាផ្ទៃ បានបញ្ជាក់ក្នុងសេចក្តីណែនាំយ៉ាងដូច្នេះថា៖«បើមានការរារាំង ឬ ការរឹតត្បិតពីអាជ្ញាធរមូលដ្ឋាន សមាគម អង្គការមិនមែនរដ្ឋាភិបាល និង សហគមន៍នៅមូលដ្ឋាន ត្រូវរាយការណ៍ជូនអភិបាលរាជធានី-ខេត្ត ឬក្រសួងមហាផ្ទៃ ដើម្បីជួយសម្របសម្រួល និង ដោះស្រាយ»។

លើសពីនេះ សេចក្តីណែនាំរបស់រដ្ឋមន្ត្រីក្រសួងមហាផ្ទៃ បានបង្គាប់ទៅរដ្ឋបាលថ្នាក់ក្រោមជាតិ ឲ្យជួយសម្របសម្រួលរៀបចំវេទិកាពិគ្រោះយោបល់ជាមួយសមាគម និង អង្គការ-សង្គមស៊ីវិល ដែលធ្វើសកម្មភាពក្នុងដែនដីរបស់ខ្លួន ឲ្យបានទៀងទាត់រៀងរាល់ឆមាសឬតាមការចាំបាច់។ បើតាមសេចក្តីណែនាំ អភិបាលរាជធានី-ខេត្ត ត្រូវធ្វើរបាយការណ៍អំពីសកម្មភាពទាំងនោះ ទៅក្រសួងមហាផ្ទៃ និងស្ថាប័នពាក់ព័ន្ធនានា ហើយក៏ត្រូវផ្សព្វផ្សាយទៅកាន់រដ្ឋបាលក្រុង ស្រុក ឃុំ សង្កាត់ ឲ្យបានដឹងផងដែរ។

ថ្មីៗនេះ ក្រសួងមហាផ្ទៃ បានប្រកាសថា នឹងជួបអង្គការ-សង្គមស៊ីវិល ចំនួនពីរដង ជារៀងរាល់ឆ្នាំ ដើម្បីពិភាក្សាពីបញ្ហាប្រឈម។ ផ្អែកលើរបាយការណ៍ពីក្រសួងមហាផ្ទៃ បច្ចុប្បន្ននេះ សមាគមនិងអង្គការមិនមែនរដ្ឋាភិបាល មាន៥៤៦៨ ដែលបានចុះឈ្មោះក្នុងបញ្ជីត្រឹមត្រូវ៕