ក្រសួងបរិស្ថាននិងសហព័ន្ធ រៀបចំប្រណាំងយានយន្ត ដើម្បីការពារនិងអភិរក្សធនធានធម្មជាតិ

កីឡាជាតិ

ជាតិ

ក្រសួងបរិស្ថាននិងសហព័ន្ធ រៀបចំប្រណាំងយានយន្ត ដើម្បីការពារនិងអភិរក្សធនធានធម្មជាតិ

01, Nov 2018 , 8:19 pm

រូបភាព

លោក នេត្រ ភក្ត្រា ថ្លែងក្នុងសន្និសីទសារព័ត៌មានស្តីពីការប្រណាំងយានយន្តខ្មែររ៉ាលីរ៉េដ នៅមុខទីស្នាក់ការក្រសួងបរិស្ថាន

ដោយ:

សហព័ន្ធកីឡាយានយន្តកម្ពុជា សហការជាមួយក្រសួងបិរស្ថាន រៀបចំព្រឹត្តិការណ៍ប្រណាំងយានយន្តឆ្លងកាត់តំបន់អភិរក្សចំនួន៣ខេត្ត ដើម្បីផ្សព្វផ្សាយ ការពារ និងអភិរក្សធនធានធម្មជាតិនៅកម្ពុជា។ ព្រឹត្តិការណ៍នេះ រៀបចំចន្លោះពីថ្ងៃទី១-៤ ខែវិច្ឆិកា ឆ្នាំ២០១៨ ដោយមានកីឡាករកីឡាការិនីមកពី៦ប្រទេសចូលរួម។

រដ្ឋលេខាធិការក្រសួងបរិស្ថានលោក នេត្រ ភក្ត្រា បាននិយាយថា ក្រសួងបានសហការជាមួយសហព័ន្ធកីឡាយានយន្តកម្ពុជា រៀបព្រឹត្តិការណ៍ប្រណាំងយានយន្ត«ខ្មែររ៉ាលីរ៉េដ»កាត់តំបន់អភិរក្សក្នុងខេត្តកំពង់ស្ពឺ កំពត និងព្រះសីហនុ។ ព្រឹត្តិការណ៍រៀបចំក្រោមប្រធានបទ«រួមគ្នាដើម្បីការពារនិងអភិរក្សធនធានធម្មជាតិ»នេះ ធ្វើឡើងដើម្បីបង្ហាញពីភាពសម្បូរបែបនៃធនធានធម្មជាតិ និងបំផុសគំនិតឲ្យប្រជាពលរដ្ឋស្រលាញ់បរិស្ថានកាន់តែខ្លាំង។

ក្នុងសន្និសីទសារព័ត៌មាននៅទីស្នាក់ការក្រសួងបរិស្ថាន កាលពីថ្ងៃទី៣១ ខែតុលា លោក នេត្រ ភក្ត្រា រៀបរាប់ថា៖«ព្រឹត្តិការណ៍នេះរៀបចំឡើង ដើម្បីបង្ហាញពីភាពសម្បូរបែបនៃធនធានធម្មជាតិរួមមានព្រៃឈើ ជីវចម្រុះ និងសត្វព្រៃ ពិសេសដើម្បីចូលរួមអនុវត្តច្បាប់ និងការការពារធនធានធម្មជាតិ និងបរិស្ថាន»។

បន្ថែមលើនេះ គឺដើម្បីបង្ហាញពីទេសភាពដ៏ស្រស់ស្អាតនៅតំបន់អភិរក្សដល់ភ្ញៀវទេសចរជាតិ និងអន្តរជាតិ និងបង្ហាញពីជីវភាពរស់នៅរបស់ប្រជាសហគមនៅតំបន់នោះ។ ការផ្សព្វផ្សាយ គឺឡើងតាមរយៈការចូលរួមផ្ទាល់កីឡាករកីឡាការិនី និងការទស្សនារបស់ប្រជាពលរដ្ឋ ដែលបើកសេរីសម្រាប់ការចូលរួម ពិសេសតាមរយៈប្រព័ន្ធផ្សព្វផ្សាយរួមមាន កាសែត ទូរទស្សន៍ ព័ត៌មានអនឡាញ និងហ្វេសប៊ុកជាដើម។

«យើងជិះម៉ូតូជិះឡានកាត់តំបន់ការពារធម្មជាតិ ដែលត្រូវអភិរក្សនេះ គឺមិនមែនគ្រាន់តែជាការកម្សាន្តរបស់អ្នកជិះទាំងនោះទេ។ តែតាមរយៈរូបភាពនិងវីដេអូរបស់ពួកគាត់ ដែលបានផ្សាយតាមប្រព័ន្ធផ្សព្វផ្សាយ វាបានបង្ហាញពីភាពសម្បូរបែបនៃធនធានធម្មជាតិ ក៏ដូចជាជួយបំផុសគំនិតឲ្យប្រជាជនខ្មែរស្រលាញ់ធនធានធម្មជាតិ សត្វព្រៃ និងជីវចម្រុះផ្សេងៗកាន់តែខ្លាំងថែមទៀត»។ នេះជាការបន្ថែមរបស់លោក នេត្រ ភក្ត្រា។

តាមរយៈព្រឹត្តិការណ៍ ដែលជាការសហការលើកដំបូងរបស់ក្រសួងបិរស្ថាន រដ្ឋលេខាធិការខាងលើរំពឹងថា នឹងជួយផ្សព្វផ្សាយពីធនធានធម្មជាតិដ៏សម្បូរបែបក្នុងតំបន់អភិរក្សនៅកម្ពុជាឲ្យពិភពលោកស្គាល់កាន់តែច្បាស់ ពិសេសជួយទាក់ទាញភ្ញៀវទេសចរឲ្យមកកម្សាន្តនៅកម្ពុជាកាន់តែច្រើន។ បើតាមលោក ភក្ត្រា បច្ចុប្បន្នកម្ពុជាមានតំបន់អភិរក្សធនធានធម្មជាតិ និងច្រករបៀងជិត៦០កន្លែង ដែលលាតសន្ធឹងលើផ្ទៃដីជាង៧,២លានហិកតា។

សម្រាប់ការប្រកួតនេះដែរមានកីឡាករកីឡាការិនី៣៤រូបមកពី៦ប្រទេសចូលរួម ដែលមានការថយចុះចំនួន២ប្រទេស។ ប្រទេសទាំង៦នោះរួមមានកម្ពុជា ថៃ ណូវែលសេឡង់ វែល អូស្ត្រាលី និងស្កុដឡែន។ កីឡាករទាំងនេះ ត្រូវប្រកួតប្រជែងគ្នាលើផ្លូវភ្នំ ភក់ជ្រាំ ដីខ្សាច់ ដីក្រហម និងផ្លូវឧបសគ្គជាច្រើនទៀត។

បើតាមលោក ហូ សិទ្ធិគុណ អនុប្រធានសហព័ន្ធកីឡាយានយន្តកម្ពុជា នៅថ្ងៃប្រកួតដំបូងរៀបចំនៅខេត្តកំពង់ស្ពឺក្នុងតំបន់ដែនជម្រកសត្វភ្នំឱរ៉ាល់ និងឧទ្យានជាតិគីរីរម្យលើចម្ងាយផ្លូវ១៣៧គីឡូម៉ែត្រ។ បន្ទាប់មក ធ្វើនៅខេត្តកំពតនៅតំបន់ឧទ្យានជាតិមុន្នីវង្សភ្នំបូកគោលើចម្ងាយ៨០គីឡូម៉ែត្រ និងចុងក្រោយខេត្តព្រះសីហនុក្នុងតំបន់ឧទ្យាជាតិភ្នំក្រវ៉ាញលើចម្ងាយ៥៨គីឡូម៉ែត្រ។ ការប្រកួតនេះ មានឡាន៩គ្រឿង និងម៉ូតូ១៦គ្រឿង៕